2017-08-19 07:41:08 clouds 27o High | Kigali Rwanda

Dukurikire:
 
 

Ingengabitekerezo ya Jenoside muri Rubavu iterwa no guturana na Congo - Gen. Kabarebe

Yanditswe na IMVAHO NSHYA

Kuya 2017-06-04 08:16:15

 
Share on:
 
Yasuwe:495
 
Yavuzweho:200
 
10
 
10

Minisitiri w’Ingabo Gen. James Kabarebe avuga ko ingengabitekerezo ya Jenoside yiganje mu karere ka Rubavu kubera ko gaturanye na Repubulika Iharanira Demukarasi ya Congo ikigaragaramo abanzi b’u Rwanda.

Mu bushakashatsi bwakozwe muri 2015 na Komisiyo y’Igihugu y’Ubumwe n’Ubwiyunge, byagaragaye ko Akarere ka Rubavu ari aka kabiri mu gihugu mu karimo ingengabitekerezo ya Jenoside.

Ubwo Gen. James Kabarebe yatangizaga ihuriro rya “Unity Club” mu karere ka Rubavu, yavuze ko impamvu zituma uturere duhana imbibi na Repubulika Iharanira Demukarasi ya Kongo tukirangwamo ingengabitekerezo ya Jenoside, ari uko muri kiriya gihugu hakiri umwanzi.

Yagize ati “Abasize bahekuye u Rwanda abenshi baracyazerera mu mashyamba ya Kongo babeshya abaturage ko bazataha barwana, ni ho habaye inkambi nyinshi z’impunzi, hari bamwe mu banzi b’igihugu bakihatuye.

JPEG - 302.8 kb
Minisitiri w’Ingabo Gen. James Kabarebe n’abahoze ari abayobozi bafashe ifoto y’u Rwibutse (Foto Magarambe T.)

Gusa ibyo ntibigomba kubaca intege kuko u Rwanda rutakiri igihugu cyo kugeragerezwamo Jenoside, n’ababigerageza ni amagambo gusa bafite nta cyo bashobora kugeraho”

Nk’uko byagaragajwe na Depite Renzaho Giovanni uhagarariye Komisiyo y’Ubumwe n’Ubwiyunge mu ntara y’uburengerazuba, mu turere tukirimo ingengabitekerezo ya Jenoside, Akarere ka Rubavu kaza ku mwanya wa kabiri nyuma y’Akarere ka Musanze kaza ku mwanya wa mbere.

Yagize ati “Mu bushakashatsi bwakozwe mu mwaka wa 2015 na Komisiyo y’Ubumwe n’Ubwiyunge mu Rwanda, bwagaragaje ko Akarere ka Musanze ari ko kaza ku mwanya wa mbere mu turere tukigaragaramo ingengabitekerezo ya Jenoside, kagakurikirwa n’Akarere ka Rubavu.”

Abaturage b’Akarere ka Rubavu, bavuga ko batishimira na gato uko akarere kabo gahagaze mu bumwe n’ubwiyunge. Mugunga Javan, ni umwe mu bahoze ari abayobozi mu mwaka wa 2000.

Yagize ati “Ubushakashatsi bwakozwe turabwemera, ariko bwagombye gushingira ku mateka yihariye aka karere kahuye nayo nyuma ya Jenoside.
Ntitwishimiye umwanya duhagazeho, ariko kandi aka karere kahuye n’intambara y’abacengezi yarangiye hafi mu 1999, mu gihe abandi bari mu mutekano, tugomba guhagurukira rimwe tukivanaho icyo gisebo.”

Mu ihuriro ry’ubumwe n’ubwiyunge hanashyizweho ku rwego rw’Akarere ka Rubavu Unity Club zizajya zifasha inzego z’ubumwe n’ubwiyunge guhera ku tugari kugeza ku midugudu.

Zizafasha mu kurushaho gukangurira abaturage kwimakaza umuco w’ubumwe n’ubwiyunge kandi abahoze ari abayobozi guhera mu 1994 bagafatanya n’abayobozi bahari mu kugera kuri iyi ntego.

MAGARAMBE THEODORE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE