2017-06-28 15:02:12 clouds 27o High | Kigali Rwanda

Dukurikire:
 
 

Ibyo mwansabye nzabishyiramo umutima n’ubushobozi bwanjye bwose – Perezida Kagame

Yanditswe na IMVAHO NSHYA

Kuya 2017-06-18 10:39:57

 
Share on:
 
Yasuwe:336
 
Yavuzweho:200
 
10
 
10

Nyuma y’aho Abanyarwanda baturutse mu mitwe ya politiki inyuranye basabiye Perezida Paul Kagame kongera kwiyamamariza kuyobora u Rwanda, bikaza no kwemezwa na kongere idasanzwe y’Umuryango FPR-Inkotanyi; yamenyesheje Abanyarwanda ko ibyo bamusabye azabishyiramo umutima we n’ubushobozi bwe bwose.

Ibi yabivuze ejo hashize ku wa 17 Kamena 2017, ubwo hateranaga kongere idasanzwe y’Umuryango FPR-Inkotanyi, nyuma y’uko mu banyamuryango 1930 bayitabiriye, abangana na 1929 bemeje Paul Kagame ngo abahagararire mu matora y’Umukuru w’Igihugu.

Mu ijambo rye, Chairman wa FPR-Inkotanyi akaba na Perezida wa Repubulika, yavuze ko uko azi imbaraga za FPR-Inkotanyi, biteguye gutsinda, abwira Abanyarwanda ko yemeye ibyo bamusabye, kandi akazakoresha imbaraga nyinshi.

Ati “Ndashaka kubabwira ko ibyo nasabwe, nk’uko mpora mbigenza, nzabishyiramo umutima n’ubushobozi bwanjye bwose.”

Umukuru w’Igihugu yavuze ko buri gihe azakora igishoboka cyose kiri mu bushobozi bwe kugira ngo akorere Abanyarwanda.

Ati “Tubasezeranyije kuzagumana na mwe mu rugamba turimo duharanira ahazaza heza. Nta nzira ya bugufi ihari, tugomba gukora cyane.”

Gusa yasabye ko hagomba kubaho gukorana, aho yagize ati “Tugomba gukorana kugira ngo dukemure ibyatumye munsaba gukomeza inshingano […] Nzashyiramo imbaraga zanjye zose mu gukora kugira ngo tugabanye ibituma munsaba gukomeza kubayobora.”

Yasezeranyije Abanyarwanda ko mu myaka irindwi iri imbere hazabaho gukora ibidasanzwe, kandi byiza.

Perezida Kagame kandi avuga ko hari abagiye bamugira inama kenshi yo kutabyemera, ariko ababimubwiraga ngo ntacyo bagaragazaga kandi nta shingiro bari bafite.

Yagize ati “Igitutu cyo kutemera ibyo mwansabaga, nta cyo cyari kivuze ugereranyije n’impamvu mwansabaga ko dukomezanya urugendo.”

Kagame yasabye abari aho n’Abanyarwanda muri rusange gutekereza ku hazaza h’u Rwanda, ati “Icyo nshaka ko twumvikana, ni uko iyi myaka 7 iri imbere yatubera umwanya mwiza wo gutekereza ku hazaza h’igihugu cyacu.”

Yahamagariye urubyiruko kwitoza hakiri kare, bakagira uruhare muri politiki y’igihugu, badashaka kuba abayobozi gusa, ahubwo kuba abayobozi u Rwanda rukwiriye kandi rwifuza.

Ati “Iyo ukomeje kumva ko politiki itakureba, wisanga politiki mbi yakugizeho ingaruka, uyoborwa n’abantu batabikwiriye”.

Perezida Paul Kagame yasoje ashimira abahagarariye imitwe ya Politiki y’inshuti za FPR-Inkotanyi bari baturutse hirya no hino ku isi bitabiriye iki gikorwa cyanahujwe no gutaha ku mugaragaro Ingoro y’Umuryango FPR-Inkotanyi, yanabereyemo iyi kongere.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE