Advertisement
 
 
 
 
 
 
 
 

Politiki | Mu Rwanda

Hari imiryango mpuzamahanga ishaka ko abana b’u Rwanda bicwa n’urumogi - Busingye   

  Yanditswe na Iyaremye Yves
 1 month ago

 
 

Minisitiri w’Ubutabera akaba n’Intumwa Nkuru ya Leta, Johnston Busingye yavuze ko amaraporo avuga ko abana bajyanwa mu bigo ngororamuco batotezwa bagakorerwa n’iyica rubozo, akorwa n’abihishe inyuma y’imiryango mpuzamahanga, bitwaza uburenganzira bwa muntu bashaka ko urubyiruko rw’igihugu ruhera mu ngeso mbi.

Ubwo Minisisitiri Busingye yasuraga ikigo ngororamuco cya Nyabishongo giherereye mu murenge wa Mudende, mu karere ka Rubavu, amaze kuganira n’abana bakuwe mu ngeso mbi bakagororwa, yatangaje ko abakora raporo nk’izo ari abavugabinyoma.

Ati “Baba batazi ibyo bavuga kuko ntibigerera aho abana bagororerwa ngo bamenye ubuzima babayeho.”

JPEG - 157.3 kb
Bamwe mu bana barererwa i Nyabishongo (Foto: Iyaremye Y)

Minisitiri Busingye avuga ko abana baba mu bigo ngororamuco babayeho neza kuko Leta ibakura mu buzima bwo kunywa ibiyobyabwenge n’ubujura ikabatoza ikinyabupfura n’indangagaciro zibereye umwana w’Umunyarwanda.

Yagize ati “ Ariya maraporo ntabwo ashingiye ku muntu wafashe inzira ngo aze i Mudende yicare aha aganire n’abana amenye aho bavuye n’aho bageze n’uko babayeho, iyo rero utafashe umwanya ngo wumve impamvu igihugu gikora ikintu runaka, ahubwo ukavuga ibyo wishakiye uba ufite ikibazo.”

Akomeza agira ati “ Barakora raporo ngo mu Rwanda bafunga abana, babakorera iyica rubozo? Ariko twe turavuga tuti ‘Gereza ntabwo ari iy’umwana w’imyaka cumi n’ine, cumi n’itanu, cyangwa cumi n’itandatu, kuki umwana atahabwa andi mahirwe?”

Minisitiri Busingye akomeza avuga ko u Rwanda ruramutse rwubahirije ibyo iyo miryango mpuzamahanga isaba rwatakaza abana barwo, kandi hari inzira yo kubafasha kuba abagabo bahamye.

Ati “ Biriya batangaza, ni ibintu bishobora gutuma igihugu gitakaza abana ntikibakure mu rumogi, ubusinzi, ubujura n’izindi ngeso mbi zose ariko kuri iyo miryango, kunywa urumogi, ni uburenganzira bwa muntu, kuba umusinzi, ibyo niba ari byo bita uburenganzira u Rwanda rufite amahitamo bitewe n’aho igihugu cyavuye n’aho gishaka kugera.”

JPEG - 114 kb
Minisitiri Busingye aganira n’abana barererwa i Nyabishongo(foto Iyaremye Y)

Minisitiri Busingye asaba buri Munyarwanda wese kugira uruhare mu burere bw’Umwana, kuko Leta ifite ingamba zo gukorana n’inzego zose bakarushaho gukumira icyatuma abana bishora mu biyobyabwenge.

Ati “Abana bakiri hanze bajya mu businzi bajya mu biyobyabwenge, bishora mu ngeso zidashobora kububakira ejo hazaza, ndasaba ko ubutegetsi bw’igihugu mu mirenge, mu tugari, ababyeyi dufatanye turinde aba bana.”

Ibigo ngororamuco bijyanwamo abana biganjemo abakurwa ku mihanda barasariswe n’ibiyobyabwenge n’ubujura.

Umuryango mpuzamahanga uharanira uburenganzira bwa muntu, Human Rights Watch, uherutse gusohora icyegeranyo gishinja u Rwanda gufunga abana bato no kubakorera itotezwa ririmo nko gukubitwa, kurazwa ahantu habi n’ibindi.

Ikigo cya Nyabishongo kimaze kunyuramo abana 3000, muri bo 1900 bajyanywe Iwawa aho bagera bakiga imyuga itandukanye irimo ububaji, ubwubatsi n’ubudozi, naho abandi basubijwe mu miryango yabo .

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Perezida Kagame arakira indahiro z’abagize guverinoma nshya
Perezida Kagame arakira indahiro z’abagize guverinoma nshya

Perezida wa Repubulika y’u Rwanda, Paul Kagame arakira indahiro z’abaminisitiri n’abandi bayobozi bagize guverinoma yavuguruwe ku wa kabiri ku ya 4 Ukwakira 2016. Iyo guverinoma iyobowe na (...)

Trump na Hillary mu kiganiro mpaka cya kabiri ni inde uzatsinda?
Trump na Hillary mu kiganiro mpaka cya kabiri ni inde uzatsinda?

Abakandida bahatanira kuyobora Leta Zunze Ubumwe za Amerika, Donald Trump na Hillary Clinton baraye bagize ikiganiro mpaka. Mu kiganiro cya Mbere Trump yatsinze Hillary Ikiganiro mpaka cya (...)

 Kenya: Perezida Kagame yitabiriye inama ku buhinzi
Kenya: Perezida Kagame yitabiriye inama ku buhinzi

Perezida wa Repubulika, Paul Kagame, kuri uyu wa Gatatu, ari i Nairobi mu gihugu cya Kenya aho yitabiriye ihuriro ku mpinduramatwara mu birebana n’ubuhinzi butangiza ibidukikije ku mugabane wa (...)

Perezida Kagame  na Kabila  barahurira mu mujyi wa Rubavu
Perezida Kagame na Kabila barahurira mu mujyi wa Rubavu

Perezida wa Repubulika y’u Rwanda Paul Kagame, kuri uyu wa 12 Kanama 2016 yahuye n’uwa Repubulika Iharanira Demokarasi ya Congo, Joseph Kabila mu mujyi wa Rubavu. Biteganyijwe ko Perezida Kagame (...)

Amateka y’umuryango AU wateranyiriye ibihugu bisaga 50 mu Rwanda
Amateka y’umuryango AU wateranyiriye ibihugu bisaga 50 mu Rwanda

Inama ya 27 y’Umuryango w’Ubumwe bw’Ibihugu by’Afurika, AU yateraniye i Kigali mu Rwanda kuva ku ya 10 kugeza ku ya 18 Nyakanga 2016. Uyu muryango, uhuza ibihugu bya Afurika, abakuru babyo na za (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.