2017-08-17 08:49:58 clouds 27o High | Kigali Rwanda

Dukurikire:
 
 

Gusezera kuri Hon. Nyandwi : Perezida Kagame asanga u Rwanda rubuze umuyobozi mwiza

Yanditswe na IMVAHO NSHYA

Kuya 2016-10-17 11:27:32

 
Share on:
 
Yasuwe:1
 
Yavuzweho:200
 
10
 
10

Depite Nyandwi Joseph Desire, witabye Imana ku wa Gatanu ku ya 14 Ukwakira yasezeweho bwa nyuma kuri uyu wa Mbere ku ya 17 Ukwakira 2016.

Ni umuhango wabereye mu Nteko Ishinga Amategeko y’u Rwanda, icyumba cy’abadepite, witabiriwe n’abayobozi bakuru muri guverinoma barimo Minisitiri w’Intebe, Murekezi Anastase, Perezida wa Sena, Bernard Makuza n’Umukuru w’Urukiko rw’Ikirenga, Prof. Sam Rugege.

JPEG - 68.2 kb
Ho. Mukabarisa asezera bwa nyuma kuri Depite Nyandwi

Mu butumwa Perezida Kagame yatanze, bwasomwe na Minisitiri muri Perezidansi, Venantie Tugireyezu, yavuze ko u Rwanda n’Abanyarwanda babuze umuyobozi mwiza wagiraga ibakwe mu kazi, akabivanga no gukunda igihugu.

Yagize ati “Igihugu n’ Abanyarwanda, tubuze umuyobozi n’ umukozi mwiza warangwaga n’ukuri no gukunda igihugu n’ Abanyarwanda”.

Umunyamabanga Mukuru w’Umuryango FPR Inkotanyi, Francois Ngarambe nawe yatangaje ko uyu muryango wababajwe n’urupfu rwe.

Yongeyeho ko Depite Nyandwi asize umurage mwiza w’umuntu w’umukozi w’intangarugero. Ibi byanashimangiwe na Perezidante w’Umutwe w’Abadepite, Hon. Mukabarisa Donatille wavuze ko mu nteko bamuzi nk’umuntu warangwaga n’ubushishozi, ubwitange, umurava, ubushake n’ubushobozi.

Ati “Nyandwi yari afite umuco mwiza wo gusoma, agasesengura, agacukumbura,byaba imishinga y’amategeko agiye gutangaho ibitekerezo, byaba n’izindi nyandiko zifasha mu mirimo y’Inteko Ishinga Amategeko.”

Mukabalisa yongeyeho ko urupfu rwa Depite Nyandwi Joseph Désiré rusize icyuho mu Mutwe w’Abadepite ndetse n’igihugu kikaba kibuze umuntu w’inararibonye, wakundaga igihugu cye, umurimo unoze n’Abanyarwanda yari ahagarariye.

Mukabalisa yakomeje avuga ko Depite Nyandwi yubahaga buri wese, akarangwa no gukunda ukuri. Uwo yabonaga ari mu nzira itaboneye, yamugiraga inama yo kwikosora, ukora ibyiza nawe akamushishikariza gukomeza muri iyo nzira.

Nyandwi yari umunyamuryango wa FPR Inkotanyi. Yavukiye mu karere ka Nyamagabe mu 1954, afite impamyabumenyi y’ubwenjeniyeri mu by’ubuhinzi bujyanye no kurinda ibihingwa.

Yabaye perefe w’icyahoze ari Gitarama kuva mu 1994 kugera mu 1999, yahavuye aba Minisitiri y’Ubutegetsi bw’Igihugu, 2000-2002.

Nyandwi yagizwe depite mu Nteko y’Inzibacyuho 2002-2003, akomeza kuba umudepite kuva icyo gihe kugeza ubu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE