2017-06-25 13:58:23 clouds 27o High | Kigali Rwanda

Dukurikire:
 
 

Guhoza imishinga mu magambo gusa biheza Afurika mu bukene - Perezida Kagame

Yanditswe na IMVAHO NSHYA

Kuya 2016-09-05 09:34:44

 
Share on:
 
Yasuwe:1
 
Yavuzweho:200
 
10
 
10

Perezida wa Repubulika y’u Rwanda, Paul Kagame, asanga ibihugu bya Afurika bihora inyuma mu iterambere, kuko imishinga yabyo ihora mu magambo, igihe cyose igahora isubikwa.

Ni mu ijambo yavuze afungura ku mugaragaro inama y’ishoramari ku mugabane wa Afurika iri kubera mu Rwanda kuva kuri uyu wa 5 Nzeli 2016.

Umukuru w’igihugu yasabye ko ibihugu bya Afurika byubahiriza igihe mu byo bikora byose, asabira ibihano buri wese wagaragayeho gukerereza ibikorwa.

Ati “Kugirango utere imbere mubyo ukora byose, ubanza guha agaciro igihe ndetse ukagikoresha neza. Ibikenewe twese turabizi, igisigaye ni ugushyira mu bikorwa ibyo dusabwa kugirango tugere kubyo twifuza. Guseta ibirenge mu ishyirwa mu bikorwa biva ku kwirengagiza ko kwihuta mubyo dukora ariwo musingi w’ubukungu.”

Perezida Kagame kandi yasabye ko ibihugu byakwihutira gushyira mu bikorwa amasezerano yo kwishyira hamwe no korohereza ishoramari, kuko uyu mugabane umaze kuba iciro ry’imigani nk’ufite ubushobozi buhera mu magambo gusa.

Ati” Niba hari abatiteguye, abiteguye nibakore ariko basiga icyanzu kugirango n’abandi bakomeze kuza.Ntabwo Afurika igomba guhora ari umugabane wiyemeza ibintu ntubigereho, Gukomeza kwegezayo ibyihutirwa mubyo dushaka gukora ni amakosa Afurika itakabaye igikora.”

Inama ku ishoramari muri Afurika TGAIS-COMESA yitabiriwe na Yoweri Museveni, Perezida Kagame, abayobozi ba za guverinoma, ab’ibigo by’ubucuruzi n’abashoramari bose babarirwa mu 1000.

Igamije gutangiza umurongo w’ubufatanye mu mishinga ikurura abashoramari kandi isembura ubukungu mu bihugu bya Afurika.

Muri iyi minsi ibiri, abitabiriye inama baraganira ku bucuruzi hagati y’uturere, na gahunda yo gucuruzanya hagati y’imiryango itatu y’ibihugu bya Afurika, Tripartite Free Trade Area (TFTA) .

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE