2017-10-17 06:58:11 clouds 27o High | Kigali Rwanda

Dukurikire:
 
 

FPR: Mu myaka 7 umusaruro wa buri Munyarwanda uzikuba kabiri

Yanditswe na IMVAHO NSHYA

Kuya 2017-06-19 07:01:28

 
Share on:
 
Yasuwe:322
 
Yavuzweho:200
 
10
 
10

Umuryango FPR-Inkotanyi ufite intego yo gukuba kabiri umusaruro wa buri Munyarwanda mu gihe cy’imyaka irindwi iri imbere, ndetse mu mwaka wa 2024 u Rwanda rukazaba rwihaza ku ngengo y’imari.

Ibi byavugiwe muri kongere idasanzwe y’Umuryango FPR-Inkotanyi ku wa 17 Kamena 2017, yanatorewemo Perezida Paul Kagame ngo azahawuhagararire mu matora y’Umukuru w’Igihugu ateganyijwe muri Kanama uyu mwaka wa 2017.

Prof. Shyaka Anastase, umuyobozi w’Urwego rw’Igihugu rw’Imiyoborere, avuga ku byagezweho ndetse n’ibiteganyijwe gukorwa mu gihugu hashingiwe kuri gahunda z’Umuryango FPR-Inkotanyi, uze ko bagamije kugeza Abanyarwanda ku bukire.

Yagize ati “Intego yacu ni ugukomeza kugeza Abanyarwanda ku bukire. Icyo twiyemeje ni ugukuba kabiri umusaruro wa buri Munyarwanda mu gihe cy’imyaka irindwi.”

JPEG - 276.8 kb
Prof. Shyaka Anastase, ubwo yagaragazaga ibyagezweho n’ibiteganywa kuzagerwaho mu myaka irindwi iri imbere

Prof. Shyaka yavuze ko mu myaka 7 ishize, Abanyarwanda bahisemo neza ubwo batoreraga Chairman wa RPF-Inkotanyi Paul Kagame kuyobora u Rwanda.

Ati “Ibyo twagezeho mu myaka 7 ishize birivugira: Iterambere ry’umugore, umutekano, ubukungu bwiyongera n’ibindi… Uko ubukungu bwacu bukomeje kwiyongera, turakataje mu guca ubukene mu Banyarwanda.”

Mu biteganyijwe mu myaka irindwi iri imbere, harimo kuba u Rwanda ruzaba rwihaza.

Shyaka ati “Mu myaka 7 iri imbere, turashaka ko ingengo y’imari yacu nk’Abanyarwanda izaba iva yose mu mbaraga zacu.”

Yakomeje avuga ko ubumwe bw’Abanyarwanda buhamye, bushinze imizi kandi burakomeye.

Ati “Kwishakamo ibisubizo ni ihame dukomeyeho.” Yavuze ko hari gahunda yo kuzamura ireme ry’uburezi birushijeho, Mwarimu akabaho neza kandi yifashije.

Avuga ku butabera, ku muco, ishoramari, guca ruswa, Shyaka yagize ati “Turashaka ubutabera bugera kuri bose nk’uko inzego z’ubutabera zikataje mu guha Abanyarwanda ubutabera bunoze […] Turifuza gukomeza gusigasira umuco wacu, abakora ibijyanye n’umuco bikabatunga […]

Mu ishoramari, turashaka gukomeza kugira igihugu cyacu aho ishoramari ryoroherezwa twese tukunguka […] Turashaka guca ruswa burundu, u Rwanda rugakomeza kuza imbere ku Isi mu bihugu bitarangwamo ruswa.”

Umuryango FPR-Inkotanyi wifuza ko aho Umunyarwanda ari hose ku Isi, humvikana imbaraga z’igihugu, kandi u Rwanda rukomeje kwagura amarembo, rurushaho kuba nyabagendwa, rwongera Ambasade mu bihugu bya kure.

Ati “Mu myaka 7 iri imbere, indege yacu RwandAir izakomeza kwagura inzira ndetse igure n’izindi ndege nshya.”

Akaba yavuze ko ubufatanye nk’injishi ifasha Abanyarwanda gusigasira igisenge cyabo ari cyo u Rwanda, ari inshigano y’Abanyarwanda bose.

Abari bahagarariye imitwe ya Politi yabo iri ku butegetsi hirya no hino ku isi, nk’uwari uhagarariye ANC yo muri Afurika y’Epfo, CCM yo muri Tanzania, Communist Party ryo mu Bushinwa, EPDF ryo muri Ethiopia, Jubilee yo muri Kenya, NRM yo muri Uganda, DRC yo muri Angola, iryo muri Kongo, Djibouti, Eritrea, bose bashimye imbaraga Umuryango FPR-Inkotanyi wakoresheje mu guhagarika Jenoside yakorewe Abatutsi, ndetse no kubaka igihugu nyuma yo guhagarika iyi Jenoside, byose birangajwe imbere na Paul Kagame.

By’umwihariko, Kasire Lumumba Justine wari uhagarariye NRM yo muri Uganda, yashimye ubuyobozi bw’u Rwanda burangajwe imbere na FPR-Inkotanyi, ashima ko itahagaritse Jenoside gusa, ahubwo yimakaje ubumwe n’ubwiyunge by’Abanyarwanda, umutekano no guteza igihugu imbere.

Yashimye ko kuva FPR yagera ku butegetsi yateje imbere Demokarasi ndetse n’imiyoborere myiza. Yanavuze kandi ko we nk’umugore ashima FPR ku bw’imiyoborere ya Kagame yo guteza imbere umugore mu Rwanda.
MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE