2017-05-24 10:43:15 clouds 27o High | Kigali Rwanda

Dukurikire:
 
 

Dushaka ko buri Munyarwanda agenda hose ku Isi atikandagira –Min. Mushikiwabo

Yanditswe na IMVAHO NSHYA

Kuya 2016-04-28 10:08:17

 
Share on:
 
Yasuwe:0
 
Yavuzweho:200
 
10
 
10

Minisitiri w’Ububanyi n’Amahanga, Louise Mushikiwabo, yasobanuye ko korohereza abanyamahanga kwinjira mu Rwanda no gukorana n’ibindi bihugu ari kimwe byihishe inyuma y’iterambere ry’igihugu mu myaka 22 ishize Jenoside yakorewe Abatutsi ibaye.

Mu ruzinduko rw’akazi yagiriye muri Leta Zunze Ubumwe za Amerika muri iki cyumweru , Minisitiri Mushikiwabo yatanze ikiganiro mu ishuri ryitwa The Elliot School ryigisha ububanyi n’amahanga muri kaminuza yitiririwe George Washington.

Yagarutse ku nyungu zo kwihuriza hamwe n’ibihugu byo muri Afurika y’Uburasirazuba, avuga ko u Rwanda rwitandukanyije burundu na politiki yo kwigira nyamwigendaho kandi ko abaturage benshi babigiriyemo inyungu.

Ati” U Rwanda rwashyize hasi kwigira nyamwigendaho none rurimo kubiboneramo umusaruro, dushaka guha Abanyarwanda amahirwe yo kugenda hose ku Isi batikandagira n’abanyamahanga tukabakangurira gusura u Rwanda.”

JPEG - 201.6 kb
Minisitiri Mushikiwabo atanga ikiganiro ku iterambere ry’u Rwanda

Minisitiri Mushikiwabo yabwiye abanyeshuri n’abatumirwa bari bamuteze amatwi ati” Ijambo u Rwanda ubundi risobanuye ‘isanzure (soma isaânzuure)’ , Abanyarwanda ntibinubira ko dufite igihugu gito.”

Yasobanuye ko ibikorwa by’ubucuruzi bivuka buri munsi n’abakozi bafite ubunararibonye barimo n’abanyamahanga biri mu byafashije u Rwanda kugera ku rwego rw’ibihugu by’umutungo uciriritse mu gihe gito.

Avuga ku mfashanyo z’amahanga, Mushikiwabo yashimangiye ko u Rwanda rwiyemeje kutagengwa nazo mu minsi iri imbere cyane ko zavuye ku kigero cya 96% zikagera kuri 37% mu myaka 20 ishize.

Minisitiri Mushikiwabo yavuze no ku byo u Rwanda rwakuye mu kwinjira mu Muhora wa Ruguru, birimo ibikorwa remezo, no koroshya imikorere ya za gasutamo ku buryo igihe cyo kuvana imizigo ku cyambu cya Mombasa iza mu Rwanda cyagabanutse cyane.

Yanagarutse ku mihanda ya gariyamoshi ibiri izagera mu Rwanda, uhuza umujyi wa Kigali na Mombasa ndetse n’uzawuhuza na Dar es Salaam muri Tanzania.

U Rwanda rwugururiye amarembo amahanga narwo rubyungukiramo

Minisitiri Mushikiwabo yasobanuye ko gahunda zo gukingurira imiryango abanyamahanga zunguye u Rwanda cyane.

Ati” Kuvaniraho viza Abanyafurika bose no guhuza imipaka y’ikirere n’ibihugu byatumye kompanyi y’indege y’u Rwanda itera imbere cyane, abakerarugendo bikuba kabiri mu myaka ine ishize, aho miliyoni 1.2 basura u Rwanda buri mwaka.”

Yongeyeho ko Abanyarwanda bamwe babanje gushidikanya ku nyungu z’uko u Rwanda rwakwinjira mu muryango w’Ibihugu bya Afurika y’Uburasirazuba, EAC, ariko nyuma bagahita batangazwa n’inyungu zahise zisukiranya.

Ati” Twahise tubona inyungu zo guhangana mu nzego zitandukanye. Amabanki yagutse mu buryo bwihuse kandi twakira abanyamahanga benshi bafite ubumenyi dukeneye.”

Yasoje avuga ko inzego z’umutekano nazo zungukiye mu kwihuza n’iz’ibindi bihugu cyane cyane mu gukurikirana ibyaha byambukiranya imipaka.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE