2017-07-21 15:15:02 clouds 27o High | Kigali Rwanda

Dukurikire:
 
 

Dufite ubushobozi kweli! Uwatuzanaho ibibazo yatugiriraho ibyago – Perezida Kagame

Yanditswe na IMVAHO NSHYA

Kuya 2017-07-13 15:15:07

 
Share on:
 
Yasuwe:881
 
Yavuzweho:200
 
10
 
10

Perezida Kagame yasoje itorero Indangamirwa, icyiciro cya 10 asaba urubyiruko rurirangije umusanzu wo kongera ubushobozi bw’igihugu nubwo n’ubuhari buhagije ku buryo nta wapfa kugihungabanya.

Mu ijambo umukuru w’igihugu yabagejejeho, yababwiye ko igihugu kigomba kuba cyubakiye ku musingi ukomeye w’umutekano kugira ngo hatagira ikigihungabanya, dore ko n’amateka mabi u Rwanda rwanyuzemo yatewe no kubura uwo musingi.

Yagize ati “Igihugu iyo ba nyiracyo batacyubakiye ku musingi, ibiza biragihitana, twebwe ntabwo ari inkuru mbarirano. Ibiza byahitanye abantu kubera umusingi tutari twarubakiyeho. Ntabwo bizasubira, mukwiye kuba muri bamwe bavuga ko bitazasubira.”

“N’abato muri mwe ibyabaye mutaranavuka, aho mumariye gukura, mufite abavandimwe, barabibabwiye bati ‘ntabwo tugifite kanaka, hari ababyeyi batakiriho, hari abana batakiriho, hari abavandimwe batakiriho’. Byabayeho kubera iyo politiki mbi, abanyarwanda bazira ko igihugu kitari gifite umusingi ukomeye gihagazeho.”

JPEG - 156.5 kb
Abarangije itorero Indangamirwa 10 biyerekana bya gisirikare

Perezida Kagame yakomeje ababwira ko igihugu kigikeneye ko n’abandi banyura mu itorero kugira ngo umubare w’Abanyarwanda b’intore kandi bashoboye ukomeze kwiyongera no gusigasira ibyo igihugu cyagezweho bibashe koroha.

Ati “Mubaye n’urugero rw’abandi bataraza, ndetse n’abahaje nabo bazagaruka. Umubare uracyari muto, dushaka ko bigera hafi kuri buri wese, abo bimaze kugeraho bararenga mu bihumbi 2 kuri twe bitewe n’uko dushaka kubaka umusingi umubare uracyari muto.

“Ni ukuvuga ngo uburemere bw’ibyo twikoreye buracyari bwinshi, kuko iyo bugabanywe n’abantu bake, buri umwe agumana uruhare rwe ariko rukaguma ruremereye. Dushaka kongera umubare w’abubaka igihugu cyacu, n’abaturindira umutekano kugira ngo uburemere bwa wa mutwaro bugabanuke.”

Yongeyeho ko hagize ikinanira Abanyarwanda muri iki gihe bakwibaraho amakosa, bakishinja uburangare n’ubunebwe kuko kuri ubu igihugu gifite ubushobozi buhambaye ku buryo nta wapfa kukivoogera.

Yagize ati “Ubushobozi dufite ubu turi mu nzira yo kubwongera ariko turabufite kweli, nta mwanzi wadukandiraho, uwatuzanaho ibibazo yatugiriraho ibyago, biriya mujya mwumva, bariya bavuga, intambara yo kuvuga yo ntabwo tuzi kuyirwana. Bariya bandi bazi kuvuga niba hari aho bibageza tuzaba tureba, ariko turi kubaka igihugu cyacu, ntawe dusagarira nta matiku, nta bibazo…”

Icyiciro cya cumi cy’itorero Indangamirwa cyitabiriwe n’abagera kuri 523 barimo abiga mu mahanga n’abagize amanota y’indashyikirwa mu bizamini bya leta.

Bahawe amasomo atandukanye arimo ajyanye n’umuco, amateka n’imyitozo ya gisirikare. Muri bo 65 bahise basaba kwinjira mu gisirikare cy’u Rwanda.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE