2017-06-27 13:41:38 clouds 27o High | Kigali Rwanda

Dukurikire:
 
 

CNLG: Ingengabitekerezo ya Jenoside yari yaramunze rubanda mu gihe cy’Inkiko Gacaca

Yanditswe na IMVAHO NSHYA

Kuya 2016-04-22 11:43:49

 
Share on:
 
Yasuwe:5
 
Yavuzweho:200
 
10
 
10

Ubushakashatsi ku miterere y’ingengabitekerezo ya Jenoside mu Rwanda nyuma ya Jenoside yakorewe Abatutsi mu 1994 bwashyizwe ahagaragara bugaragaza ko guhera mu 1995 kugeza mu 2008 ibikorwa biganisha ku gupfobya Jenoside byasize bhitanye ubuzima bw’abantu benshi.

Ubwo bushakashatsi bwakozwe na Komisiyo y’Igihugu Ishinzwe kurwanya Jenoside bugaragaza ko ibikorwa bifite aho bihuriye n’ingengabitekerezo ya Jenoside byasize abarokotse, abatangabuhamya n’inyangamugayo 156 bishwe mu gihe cy’Inkiko Gacaca.

Intara y’Uburasirazuba iza ku mwanya wa mbere mu habonetse imfu ziturutse ku gupfobya Jenoside, yaguyemo 72 ikurikirwa n’Uburengerazuba haguye 48, Amajyepfo 31, Amajyaruguru 19 naho Umujyi wa Kigali 9.

JPEG - 196.4 kb
Uhereye ibumoso ni Minisitiri Uwacu Julienne, Minisitiri Jean Philbert Nsengimana n’Umunyamabanga Nshingwabikorwa wa CNLG, Dr. Jean Damascene Bizimana ubwo hamurikwaga ubwo bushakashatsi

Umushakashatsi Nikuze Donatien avuga ko ingengabitekerezo yashinze imizi mu bantu bakuze ari nacyo gituma abakiri bato bakwiye gukurikiranirwa hafi ntibanduzwe n’abakuze babayeho mu gihe kirekire mu bihe byo gucura no gutegura Jenoside.

Ati “Abakuze bafite ibyago byo kuba bazi ingengabitekerezo bigishijwe mbere ya Jenoside, kuva muri 59 kugeza 1994. Ingengabitekerezo ya Jenoside yigishijwe igihe kirekire iracengera abantu bayimira bunguri, umuntu abaho yumva ko iyo ari yo gahunda ko Umututsi nta kindi atari ukumwica. Ibyo byose ntabwo mu myaka mike tumaze wavuga ko uyiranduye mu muntu wigishijwe iyo myaka yose.”

Minisitiri w’Urubyiruko n’Ikoranabuhanga Jean Philbert Nsengimana yavuze ko kuri ubu hakenewe uruhare rw’urubyiruko n’ikoranabuhanga kuko igihe cyo kwigisha mu mashuri ingengabitekerezo ya Jenoside cyarangiye ubu abayifite basigaye bashaka kwigarurira urubyiruko banyuze mu ikoranabuhanga urubyiruko ruhugiyemo muri ino minsi.

Yongeraho ko ubu buryo buzafasha n’urubyiruko n’abandi bari hanze batagize amahirwe yo kugerwaho na gahunda zitandukanye zifasha mu bumwe n’ubwiyunge bityo nabo bakamenya ukuri no kwima amatwi abashaka kugoreka amateka ya Jenoside yakorewe Abatutsi mu 1994.

Raporo y’ubushinjacyaha bukuru igaragaza ko hagati ya 2011 kugeza 2014 dosiye 303 z’abagaragaweho n’ingengabitekerezo ya Jenoside zashyikirijwe ubutabera, muri bo 223 bahamwe n’icyo cyaha.

Muri iyo myaka kandi hari dosiye 155 z’abagaragaweho n’ibyaha by’amacakubiri n’ivangura zashyikirijwe ubutabera, 101 bahamwa n’icyaha.

Ku cyaha cy’ihakana n’ipfobya rya Jenoside yakorewe Abatutsi hagati ya 2011 na 2014, dosiye z’abantu 176 zashyikirijwe urukiko abantu 125 bahamwa n’icyo cyaha.

Ubushakashatsi busoza bugaragaza ko muri rusange abaturage 29 mu 180 babajijwe mu gihugu bangana na 16.1% bavuze ko ingengabitekerezo ya Jenoside ihari naho 151 bangana na 83.9% bavuga ko yagabanutse.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE