2017-11-18 15:01:27 clouds 27o High | Kigali Rwanda

Dukurikire:
 
 

BNP, imwe muri banki zikomeye ku Isi irashinjwa kugura intwaro zakoreshejwe muri Jenoside

Yanditswe na IMVAHO NSHYA

Kuya 2017-06-29 10:06:45

 
Share on:
 
Yasuwe:288
 
Yavuzweho:200
 
10
 
10

Banki mpuzamahanga ya munani ikomeye ku Isi, BNP Paribas ifite icyicaro mu Bufaransa irashinjwa gutanga amafaranga yaguzwe intwaro muri Jenoside yakorewe Abatutsi mu 1994.

Imiryango Sherpa, Collectif des Partis Civiles pour le Rwanda na Ibuka France yatanze ikirego mu rukiko irega BNP Paribas ubufatanyacyaha muri Jenoside n’ibyaha byibasiye inyokomuntu.

Iyo miryango ivuga ko iyo banki yasabwe na Banki Nkuru y’u Rwanda kwishyura intwaro zakoreshejwe muri Jenoside kandi icyo gihe Loni yari yarafatiye guverinoma embargo.

AFP ivuga ko ibirego by’iyi miryango bishingiye ku buhamya bwatanzwe mu rukiko mpuzamahanga mpanabyaha rwashyiriweho u Rwanda i Arusha, buvuga ko ku ya 16 Kamena 1994, Col. Theoneste Bagosora yaguze intwaro n’umucuruzi Petrus Willem wo muri Afurika y’Epfo ku madorali miliyoni 1.3.

Ibi ngo babinyujije kuri Perezida Mobutu wayoboraga “Zaïre” bavuga ko izo Kalachnikov, gerenade, amasasu… ari iz’ingabo z’icyo gihugu ariko zinyuzwa ku Gisenyi zihabwa Interahamwe nazo zizikoresha zica Abatutsi.

Iyo miryango ihamya ko BNP ifite uruhare muri Jenoside yakorewe Abatutsi kuko yateye inkunga abayikoze kandi ikirengagiza ibihano Loni yari yarabafatiye.

Iyi banki nta kintu iravuga ku byo iregwa. Mu kiganiro na AFP, umuyobozi wayo ushinzwe itamanaho, Bertrand Cizeau yavuze ko bataramenya neza ibyo baregwa kugira ngo babivugeho.

Iki kirego kandi cyatumye undi muryango ukora ubuvugizi, ukanahangana n’ibigo bikomeye bikora amakosa, Sum Of Us ukora inyandiko imaze gushyirwaho umukono n’abantu 230, igomba gushyikirizwa perezida w’u Bufaransa, Emmanuel Macron kugira ngo agire icyo akora kuri BNP Paribas.

Ubwo Imvaho Nshya yageragezaga kuvugana n’Umuyobozi wa Ibuka, mwe mu miryango yatanze ikirego, Prof. Dusingizemungu Jean Pierre, ntiyitabye telefoni ye.

Gusa ubwo yari mu muhango Kwibuka Abatutsi biciwe i Nyanza ya Kicukiro ku wa 11 Mata 2017 yongeye kwibutsa ko igihugu cy’u Bufaransa, ari nacyo BNP Paribas ibarizwamo ari cyo cyari ku isongo mu gufasha abakoze Jenoside yakorewe Abatutsi mu 1994.

Ati "Igihugu cy’u Bufaransa cyari ku isonga muri ibi byose. Twongeye kugaragaza uyu munsi uruhare rw’ubuyobozi bw’iki gihugu mu gutegura no gushyira mu bikorwa Jenoside yakorewe Abatutsi."

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE