2017-06-28 08:00:46 clouds 27o High | Kigali Rwanda

Dukurikire:
 
 

AU igeze igihe cyo kwigira – Mushikiwabo

Yanditswe na IMVAHO NSHYA

Kuya 2017-05-04 07:08:52

 
Share on:
 
Yasuwe:129
 
Yavuzweho:200
 
10
 
10

Minisitiri w’Ububanyi n’Amahanga akaba n’Umuvugizi wa Guverinoma Mushikiwabo Louise, asanga igihe kigeze kugira ngo abagize Umuryango w’Afurika Yunze Ubumwe (AU) baharanire gushaka icyatuma bigira mu rwego rw’ubushobozi.

Yasabye ibihugu 15 bigize akanama gashinzwe umutekano muri AU ku bigiramo uruhare.

Ibyo Minisitiri Mushikiwabo yabivugiye i Kigali, ubwo yatangizaga umwiherero ku nshuro ya 10 uhuje abayobozi bahagarariye ibihugu 15 byo muri AU, akanama kayo gashinzwe umutekano “AU Peace and Security Council”.

JPEG - 292.3 kb
Minisitiri w’Ububanyi n’Amahanga Mushikiwabo Louise ari kumwe n’abahagarariye ibihugu bigize Akanama gashinzwe amahoro n’umutekano (Foto James R)

Baraganira mu gihe cy’iminsi itatu ku byakozwe ku ishyirwa mu bikorwa birebana n’imikorere y’umuryango, ibyemezo bifatwa, ibimaze gukorwa no kunoza ibirebana n’amavugurura, baganire ku ishyirwaho ry’ikigega cy’uwo muryango, ingamba zafasha mu gukumira amakimbirane ashobora kuvuka muri uwo muryango n’ibindi.

Mu butumwa bwe ku bahagarariye ibihugu 15 bigize akanama ka AU gashinzwe amahoro n’umutekano, Minisitiri Mushikiwabo yagarutse ku kamaro k’uwo muryango, ku baturage batuye Umugabane w’Afurika, kuko asanga na bo baba bakeneye kumenya no gusobanukirwa n’ibyo Akanama ka AU gashinzwe umutakano gakora ku birebana n’imibereho myiza yabo.

Akomeza agira ati “Umuco wo gukorera hamwe nk’abatuye uyu mugabane ni ingenzi, kuko bituma abantu bashakira hamwe ibisubizo by’ibibazo bibareba, ari nabwo Afurika butuyemo irushaho kugira ituze no kugira umutekano uhamye.

Nk’ubu duharaniye kwishakamo ubushobozi mu rwego rw’amafaranga yo gufasha mu bibazo by’umutekano wacu utureba, ni ingenzi kuko bituma twivana mu bibazo by’abahora bavuga ngo Afurika ni umugabane uhorana ibibazo, ndetse n’ubuzima bw’abaturage bacu bukazamurwa ku yindi ntera’’.

Umuyobozi wungirije w’Akanama gashinzwe umutekano muri AU, Dr Admore Kambudzi, avuga ko kuva uyu muryango washingwa hari intambwe imaze guterwa ku birebana n’amahoro n’umutekano muri Afurika hagamijwe Afurika izira amakimbirane, no gukomeza gukumira ibindi bibazo bishobora kuvuka byerekeranye n’imvururu muri Afurika.

Asaba buri wese gushyira imbaraga mu bikorwa bishyigikira ingengo y’imari y’uwo muryango mu kigega ‘AU PEACE FUND’ kugira ngo Afurika ikomeze kwigira mu byumutekano wayo, dore ko ngo amafaranga amaze kugera muri icyo kigega angana na 22% gusa.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE