2017-11-22 09:53:14 clouds 27o High | Kigali Rwanda

Dukurikire:
 
 

Abayoboke ba PSD baravuga ko Perezida Kagame ari umuyobozi mwiza ukunda Abanyarwanda

Yanditswe na IMVAHO NSHYA

Kuya 2017-06-14 14:43:01

 
Share on:
 
Yasuwe:239
 
Yavuzweho:200
 
10
 
10

Abayoboke b’Ishyaka Riharanira Demokarasi n’imibereho myiza y’abaturage PSD batangaje ko mu matora y’Umukuru w’Igihugu ateganyijwe ku itariki ya 4 Kanama 2017 bazashyigikira umukandida Nyakubahwa Paul Kagame.

Ibi babishingira k’ubusabe bw’Abanyarwanda basabye ko Perezida wa Repubulika Paul Kagame yakomeza kubayobora kubera ibyiza byinshi amaze kubagezaho ariko by’umwihariko abayoboke bashimangira ko Perezida Kagame ari umuyobozi udasanzwe ukunda Abanyarwanda.

Bavuga kandi ko guhitamo Paul Kagame babiterwa no kuba baragize uruhare rugaragara mu gutanga ibitekerezo no gutora Itegeko Nshinga rya Repubulika y’u Rwanda ryo muri 2003 muri referendum yo muri 2015, banashingiye ku mahame remezo y’ishyaka PSD ariyo ubutabera, ubwisungane n’amajyambere, bigaragara muri gahunda za Guverinoma.

Bashingiye ku ruhare rw’ishyaka PSD mu kubaka ibyagezweho n’igihugu muri iyi myaka ishize bafatanyije n’indi mitwe ya politiki yemewe mu Rwanda, bazirikana ko ishyaka PSD ari umutwe wa Politiki wigenga, uzakomeza guharanira ibitekerezo n’amahame remezo ugenderaho kandi wishimira imikoranire myiza n’ubwubahane usanzwe ufitanye n’umuryango wa RPF Inkotanyi.

Ibi byemejwe muri Kongere ya mbere idasanzwe y’iri shyaka yahuriranye no kwizihiza isabukuru y’imyaka 25 iri shyaka rimaze rishinzwe aho abanyamuryango ba PSD bishimiye ibyo bamaze kugeraho ndetse bavuga ko bakeneye umuyobozi utanga icyizere mu gusigasira ibyagezweho.

Gutanga Perezida Kagame ho umukandida ni ukwiteganyiriza

JPEG - 243.5 kb
Kongere ya mbere idasanzwe ya PSD yahuriranye no kwizihiza isabukuru y’imyaka 25 imaze ishinzwe

Dr. Vincent Biruta, Perezida w’Ishyaka PSD yagarutse ku cyemezo cyafashwe na Kongere idasanzwe, agira ati “ Mu byukuri, iki cyemezo gifatiwe hano na kongere yacu idasanzwe, ni icyemezo gituruka mu by’Abanyarwanda bifuje, babivuga ku mugaragaro mu gihe basabaga ko Itegeko Nshinga rivugururwa, kandi muri abo banyarwanda namwe mwari muri mo.”

“Rero, gutanga Perezida Kagame nk’umukandida, twifuza ko azayobora u Rwanda imyaka 7 iri imbere ni ukwiteganyiriza, ni umuyobozi udasanzwe ukunda Abanyarwanda, wagaragaje ubutwari mu bihe bitandukanye, hari mu gihe cy’urugamba rwo kubohora u Rwanda, guhagarika Jenoside yakorewe Abatutsi mu 1994, kubaka ubumwe bw’Abanyarwanda nyuma ya Jenoside no kubagarurira icyizere, uyu munsi tukaba dufite Igihugu cyubashywe kandi n’Abanyarwanda bafite ishema ry’uburyo bayobowe. Ibi bikiyongeraho kuba bafite icyizere cy’ejo hazaza kubera ko babona icyerecyezo gisobanutse kandi byose tubikesha umukuru muri twebwe utuyoboye Perezida Paul Kagame.”

Byongeye kandi, ngo umubano mwiza wa PSD na RPF Inkotanyi si uwa none.

Dr Biruta arakomeza ati “Ubu bufatanye ntimugire ngo ni ubwa none, mu gitabo twabagejejeho muraza kubonamo n’amafoto ya mbere ya Jenoside, aho abayobozi ba PSD bashyikiranaga, basabanaga n’aba RPF na nyuma ya Jenoside uwo mubano warakomeje. Mu mwaka wa 2003, twashyigikiye kandidatire ya Perezida Kagame kuri uriya mwanya kandi twaramwamamaje dufatanyije n’abandi, bigenda neza bityo, umusaruro w’ibyo byose uyu munsi turawishimiye.”

Manda iri imbere ntisanzwe kuko yasabwe n’Abanyarwanda

Dr. Biruta avuga ko manda iri imbere idasanzwe kuko yasabwe n’Abanyarwanda mu bwinshi n’abayoboke ba PSD barimo “ Niba rero dufashe iki cyemezo, umukandida wacu ni Perezida Paul Kagame.

“ Nkaba ngira ngo mbabwire ko niba twafashe iki cyemezo umurongo ni uwo ahubwo twitegure, turebe uruhare tuzagira mu kwamamaza umukandida wacu, tumwamamaze ku buryo budacagase, dufatanye n’indi mitwe ya politiki, Abanyarwanda duhaguruke, tumwamamaze dore ko kumwamamaza bitagoye kuko ibikorwa bye byivugira.”

Ngo bazabonereho kumugaragariza ko bashima ibyo amaze kugeza kuri iki gihugu ari nako bamugaragariza ko biteguye gukomezanya nawe kugera ku bindi byinshi.

Biruta ati “ Mu gutegura ibiri imbere twatangiye no gutegura ibitekerezo twifuza ko byazajya muri gahunda y’ibizagerwaho mu myaka 7 iri imbere, biri n’amahire iyi manda igiye gutangira izahura na gahunda y’imbaturabukungu ya gatatu nayo twatangiye gutegura ndetse ubu hatangiye no gutegurwa icyerecyezo 2050 aho twifuza ko u Rwanda ruzaba rugeze mu myaka mirongo 30 iri imbere.”

Yaboneyeho gusaba abayoboke kongera umuvuduko mu iterambere rishingiye kuri demokarasi, ubumwe n’ubwiyunge by’Abanyarwanda, barushaho gusenyera umugozi umwe witwa u Rwanda rwubakiye ku bunyarwanda.

Manda ishize yabaye idasanzwe kuri PSD

Dr. Biruta yabwiye abayoboke ko mu nama ya biro politiki yabo basanze iyi manda iri gusozwa yarabaye idasanzwe kuri PSD.

Yagize ati “ Iyi manda dusoza yabaye idasanzwe kuri twe, kuko umuyoboke umwe wacu w’imena Nyakubahwa Murekezi Anastase niwe Nyakubahwa Perezida wa Repubulika yagiriye icyizere cyo kumugira Minisitiri w’Intebe ngo ayobore ishyirwa mu bikorwa rya gahunda ya Guverinoma imyaka itatu yose ishize. Kuri PSD ntabwo ari ibintu bisanzwe, kuko si ibintu biteganyijwe mu Itegeko Nshinga, si n’ibintu biteganyijwe mu mategeko yandi tugenderaho. Gusa, tugira amahirwe, tukagira Perezida ushishoza, urenga n’imipaka y’amahame y’ibiteganyijwe mu Itegeko Nshinga byo gusangira ubutegetsi, akajya hirya y’ibyanditse ku buryo butaziguye. Iki ni icyizere gikomeye kandi tumushimira.”

Dr Biruta ashimira Perezida Kagame ibyo amaze kugeza ku gihugu ndetse akagaragaza ko biteguye gukomezanya nawe kugera ku bindi byinshi.

Imikoranire y’Ishyaka PSD n’indi mitwe ya Politiki yemewe mu Rwanda ni ntamakemwa

Ishyaka PSD rishimwa gukorana neza n’indi mitwe ya Politiki yemewe mu Rwanda.

PSD imaze imyaka 25 mu rugendo rwa Demokarasi. Ni urugendo bagikomeje bafatanyije n’indi mitwe ya Politiki yemewe mu Rwanda kugira ngo bubake Igihugu kiza, gifite icyerecyezo, kigendera ku mategeko kandi buri munyarwanda wese yishimira kubamo.

Umuvugizi w’Ihuriro ry’Imitwe ya Politiki yemewe mu Rwanda yashimiye Imana yafashije Ishyaka PSD mu myaka 25 rimaze mu nzira ya demokorasi bubaka Igihugu ariko riharanira ubutabera , ubwisungane n’amajyambere.

Yagize ati “Turabashimira cyane kuko mwagize uruhare runini mu guteza Abanyarwanda imbere ndetse n’Igihugu cyacu imbere. Mbashimiye ubutumire mwagejeje ku ihuriro ry’Igihugu nyunguranabitekerezo ry’imitwe ya Politiki kugira ngo tuze kubasha kwifatanya muri iki gikorwa cyo kwishimira iyi myaka 25, akaba ari ikimenyetso k’imikoranire myiza ikomeza kuranga imitwe ya politiki, n’abanyapolitiki u Rwanda rukeneye mu kwiteza imbere.”

PSD ishimirwa kandi uruhare bakomeje kugaragaza mu gukomeza kubaka ishyaka n’inzego zaryo, muri iyi myaka 25 ishize, PSD yageze kuri byinshi bishimishije, ihuriro rirashima cyane gahunda z’amahugurwa atandukanye mu gutegura abanyapolitiki n’Abanyarwanda muri rusange zigisha umuco wo kubona ko uwo muhanganye atari umwanzi ko ahubwo mwafatanya mu bitekerezo byubaka igihugu.

Ubuhamya

Mariko Rugenera uri mubashinze ishyaka PSD muri 1991, akaba yarabaye no mu buyobozi bwaryo igihe kirekire, yavuze ko intwari zabo zabavuyemo zabaye abagabo.

Yagize ati “ Kuba barabaye abagabo nibyo bituma Ishyaka PSD rikiriho, nibyo bituma bakibukwa, nibyo bituma uyu munsi Igihugu cyacu n’ubwo cyanyuze mu bikomeye kikiriho, ni nabyo biduka icyizere ko kizagumaho. Nibyo biduha icyizere ko Abanyarwanda bazakomeza bakabana.”

Abagira inama yo gutumbira ibiri imbere bareba mu yindi myaka 25 igiye kuza, bareba icyo ishyaka rizakorera u Rwanda muri icyo gihe cyose, icyo abarwanashyaka ba PSD bazamarira Abanyarwanda bose muri rusange bakora ibikwiriye byose ngo babe abagabo.

Muri iyi kongere hamuritswe igitabo cy’amateka cy’ishyaka PSD na filime mbarankuru, hatanzwe ishimwe rya bamwe mu bashinze ishyaka PSD ndetse n’imiryango y’abayobozi baryo bazize ibitekerezo byabo muri Jenoside yakorewe Abatutsi mu 1994.

Ishyaka PSD ryavutse mu mwaka wa 1991, rivukira ku Kabusunzu mu mujyi wa Kigali. Intego yaryo ni ubutabera, ubwisungane n’amajyambere.

MUKAGAHIZI ROSE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE