2017-09-21 09:07:12 clouds 27o High | Kigali Rwanda

Dukurikire:
 
 

Abanyarwanda barushije imbaraga abo hanze batifuzaga ko nongera kwiyamamaza –Perezida Kagame

Yanditswe na IMVAHO NSHYA

Kuya 2017-06-25 13:57:45

 
Share on:
 
Yasuwe:758
 
Yavuzweho:200
 
10
 
10

Perezida wa Repubulika y’u Rwanda, Paul Kagame yavuze ko imbaraga z’Abanyarwanda bashakaga ko yiyamamariza kuyobora manda ya gatatu, zaburijemo ubukana bwa bamwe bari hanze y’igihugu, bifuzaga ko ava ku butegetsi.

Mu kiganiro yagiranye na Televiziyo na Radiyo Rwanda kuri uyu wa 25 Kamena 2017, yabajijwe impamvu nyamukuru yatumye afata icyemezo cyo kongera kwiyamamariza kuyobora iyindi manda y’imyaka irindwi.

Perezida Kagame yasubije ko yabitewe ahanini n’ubusabe bw’Abanyarwanda, banakoze referandumu ku mpinduka mu itegeko nshinga mu 2015.

Yagize ati “Impamvu ya mbere ni Abanyarwanda. Hari n’abandi bo hanze, tubana nabo kuko u Rwanda atari igihugu cyitaruye. Abo hanze ni nk’abanyamakuru, abari muri politiki mu bindi bihugu, n’abo muri za kaminuza, bakavuga bati ntabwo mu Rwanda ibintu bigomba kugenda bitya ndetse dore itegeko nshinga ryavugaga ibi none Abanyarwanda barabihinduye rimwe na rimwe bakavuga ko ari njye wabihinduye, bakavuga ko bidakwiriye kuba.”

JPEG - 194.2 kb
Ikiganiro cya Perezida wa Repubulika kuri RBA cyari cyitabiriwe n’urubyiruko rwifuzaga kumubaza ibibazo

Yakomeje avuga ko imbaraga z’abari imbere mu gihugu zaruse iz’abari hanze kuko nta muntu wo hanze warusha imbaraga abanyagihugu mu gufata ibyemezo bibareba.

Umukuru w’Igihugu kandi yabajijwe ku buryo abona isura nshya y’urugamba rwo kwibohora cyane ko rwatangiye ari intambara y’amasasu yo guhirika ubutegetsi bubi bushingiye ku ngengabitekerezo ya Jenoside.

Yasobanuye ko urwo rugamba rwari rufite ishingiro, rugatangira mu ngorane nyinshi ariko Abanyarwanda bagakora iyo bwabaga ibintu bikajya mu murongo, ubu bakaba bari mu rugamba rwo kubaka igihugu kugira ngo abantu biteze imbere.

Perezida Kagame yanagaragaje ingorane Leta y’u Rwanda yahuye nazo nyuma y’urugamba rwo kwibohora, kuko yagombaga guhangana no kwiyubaka ari nako yunga Abanyarwanda cyane ko n’abakoze Jenoside yakorewe Abatutsi mu 1994 bari bacyidegembya.

Tugomba gutekereza kure, tukabona gushaka amikoro yo kuhagera

Umukuru w’igihugu kandi yavuze ko kuba amikoro y’u Rwanda ari make, bitabuza Abanyarwanda dutekereza ibyiza, hanyuma bakabona kugira ishyaka ryo gushaka ubushobozi bubibagezaho.

Ati “ Birakwiye gutekereza ibyiza, ukiha gutekereza kugera kure, hanyuma ugasubira inyuma gato uti “nzahagera nte” ugahura n’ukuri, niho utangira gutekereza aho uzakura bwa bushobozi. Ariko kwifuza mbere na mbere bigomba kubaho, ntuzitirwa n’uko ntabyo ufite byatuma ugera kure.”

Yongeyeho ko buri wese akwiye no kureba ibyo u Rwanda rwagezeho mu myaka ishize, bigatuma agira ikizere cy’uko n’icyerekezo rwerekezamo ruzakigeraho nta kabuza n’ibibazo bitarakemuka bigakemuka.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE