2017-06-28 08:00:46 clouds 27o High | Kigali Rwanda

Dukurikire:
 
 

2010-2017: Politiki yo gutwara abantu n’ibintu yashyizwe mu bikorwa ku kigero gisaga 70%

Yanditswe na IMVAHO NSHYA

Kuya 2017-05-17 14:24:08

 
Share on:
 
Yasuwe:390
 
Yavuzweho:200
 
10
 
10

Umuyobozi ushinzwe gutwara abantu n’ibintu mu rwego rw’Igihugu rushinzwe kugenzura imirimo imwe n’imwe ifitiye igihugu akamaro (RURA), Eng. Katabarwa Asaba Emmanuel avuga ko ibikorwa bimaze gukorwa muri serivise zo gutwara abantu n’ibintu biri ku kigero gisaga 70% kubyo bari biyemeje gukora.

Mu kiganiro n’Imvaho Nshya ku iterambere rya serivise zo gutwara abantu n’ibintu (Transport) mu Rwanda, Katabarwa yavuze ko bamaze kugera kuri byinshi aho hashyizwe imbaraga mu kunoza umurimo wo gutwara abantu n’ibintu hashingwa amasosiyete ndetse n’amakoperative y’abatwara abantu n’ibintu kandi arakora neza.

Katabarwa yagize ati “ Twavuye aho umuntu yabyukaga akagura imodoka yo gutwara abantu n’ibintu akabikora uko abyumva n’uko abishaka; ariko ubu dufite amasosiyete n’amakoperative akora iyo mirimo ku buryo twicara hamwe tugafatira hamwe imyanzuro n’umurongo ugomba gukurikizwa. Ubu umuntu utahawe serivisi nziza afite aho kubariza kandi agafashwa.”

JPEG - 203.4 kb
Bus zikora umurimo wo gutwara abantu mu mujyi wa Kigali zagejejwemo interineti

Avuga ko iyo bagendeye ku bipimo by’ibyo bamaze kugeraho, Ibyo RURA yari yimeje gukora imaze kubirenza ku gipimo cya 70%. Katabarwa avuga ko RURA yari yimeje ko mu myaka irindwi hazaba hariho amasosiyete atwara abantu n’ibintu akora neza kandi afite imodoka nziza . Ibi byose byamaze kugerwaho kandi aya masosiyete n’amakoperative arakora neza.

Bimwe mu by’ingenzi byaranze iterambere ryo gutwara abantu n’ibintu mu myaka irindwi ishize

Mu myaka irindwi ishize hamaze gukorwa byinshi mu guteza imbere urwego rwo gutwara abantu n’ibintu. Mu mwaka wa 2012 nibwo hatangijwe gahunda yo guhuza ibikorwa byo gutwara abantu hifashishijwe imodoka zigezweho zitwara abantu mu buryo bwa rusange, zasimburaga imodoka ntoya zizwi ku izina rya twegerane aho n’ inyinshi muri zo zari zishaje.

Ibi byakozwe mu mujyi wa Kigali ndetse no mu yindi mijyi itandukanye yo mu gihugu. Iki gikorwa cyunganirwaga no kugabanya igihe umuntu yamaraga mu modoka ihagaze ku cyapa itegereje abagenzi, cyangwa igihe abantu bamaraga bategereje imodoka. Imodoka isigaye igera ku cyapa abagenzi bakavamo abandi bakajyamo igakomeza . Nk’uko Umuyobozi ushinzwe gutwara abantu n’ibintu muri RURA yakomeje abivuga ngo imodoka yose isabwa kutarenza iminota itanu igihagaze ku cyapa.

JPEG - 119.3 kb
Umuyobozi ushinzwe gutwara abantu n’ibintu mu kigo cy’igihugu gishinzwe kugenzura imirimo imwe n’imwe ifitiye igihugu akamaro RURA Emanuel Katabarwa Asaba

Ibi byaje bikurikirwa no kunoza uburyo bwo kwishyura igihe umuntu agiye kugenda hifashishwa uburyo bw’ikoranabuhanga haba mu gukata amatike ndetse no kwishyura amafaranga y’urugendo hifashishijwe ikarita ya Tap&Go. Haje kandi gutanzizwaigikorwa cy’indashyikirwa cyo gushyira interineti muri bus zimwe na zimwe zikorera mu mujyi wa Kigali.

Nk’uko Katabarwa yakomeje abivuga ibi byose bijyana no kwiyongera ku mubare w’abantu bakoresha imodoka rusange aho bavuye ku bagenzi ibihumbi magana abiri na mirongo itanu (250,000) ku munsi mu mwaka wa 2013 bagera ku bagenzi ibihumbi magana ane na mirongo itanu (450,000) mu mwaka wa 2016.

Kigali urugero rwiza rw’Umujyi ufite uburyo bwo gutwara abantu n’ibintu bugezweho

Umujyi wa Kigali ufatwa nk’umujyi w’icyitegererezo muri Afurika. Urwego rwo gutwara abantu n’ibintu biri mu byateye imbere ku buryo bugaragara. Imodoka zitwara abagenzi zihari kuburyo buhagije, izitwara abanyeshuri ndetse n’izindi zikora muri serivise zigenzurwa na RURA. Umuyobozi ushinzwe gutwara abantu n’ibintu avuga ko byakozwe mu rwego rwo gufasha abantu kugera aho bashaka kujya mu mahoro kandi ku gihe.

Katabarwa yagize ati “ Mu mujyi wa Kigali ndetse n’ahandi mu gihugu wasangaga hari imodoka nyinshi ntoya za Hiace,ariko igihe abagenzi ari benshi bategereje imodoka zaza ntizishobore kubatwara bose. Byabaye ngombwa ko habaho ivugurura. Hashyizweho gahunda yo kwimakaza ikoreshwa ry’imodoka rusange, hashyirwaho uduce(Public Transports Zones) aho zagizwe ishenu. Enye zijya mu ipiganwa haboneka abazajya bazikoreramo ndetse nindi imwe yo mu mujyi wa Kigali rwagati bose bagomba guhuriramo."

JPEG - 304 kb
abagenzi bakoresha amakarita yo gutega ya Tap&Go bishimira ko yabakijije guhora bagendana amafaranga

Asobanura ko ibi byakozwe mu rwego rwo kugira ngo habeho abantu bazwi neza bakora imirimo yo gutwara abantu n’ibintu ndetse nihagira n’ibikorwa binyuranye n’amasezerano bagiranye hagire ababibazwa.

Ibi byakozwe kandi hagamijwe kwagura imihanda,kugira ngo imodoka zigera no mubindi bice by’Umujyiwa Kigali. Kenshi wasangaga imodoka zikorera ahari imihanda ikoze neza ndetse haboneka n’abagenzi benshi. Kuva buri gace kabona ushinzwe gukoreramo, imihanda bus zigeramo yavuye kuri 42 none ubu igeze ku mihanda 78.

Ikindi cya Gatatu cyari kigamijwe ni uguhindura imodoka zakoreshwaga, aho wasangaga hifashishwa Hiace itwara abantu mbarwa ubu hakaba hakoreshwa bus nziza. Ubu mu mujyi wa Kigali harakoreshwa Bus zisaga 100 na Coester zisaga 400.”RURA ivuga ko ibijyanye no kubahiriza igihe aribyo bigisabwa gushyirwamo imbaraga ndetse ko gihe cya vuba bizaba byagezweho.

RURA igararagaza ko imodoka zitwara abantu mu buryo bwa rusange zikora guhera saa kumi n’imwe za mugitondo zigahagarara saa tanu z’ijoro. Nta modoka igomba kumara iminota isaga 5 itarava ku cyapa , igomba guhagarara ivanamo abantu abandi binjira igakomeza.

Aburyo bwo gutanga ibyangombwa ku muntu wemerewe gutwara abantu n’ibintu bwaravuguruwe

JPEG - 188 kb
Abatwara abantu kuri moto ndetse n’abandi boroherejwe uburyo bwo kubona ibyangombwa bibafasha mu kazi

Mu myaka yashize umuntu washakaga gukora umurimo wo gutwara abantu n’ibintu yahabwaga icyangombwa ku giti cye, ariko ubu abakora uyu murimo bakomeje kuba benshi cyane bityo uburyo bwo gutanga ibyangombwa burahinduka.

Katabarwa yagize ati “ Ubu dusigaye dutanga ibyangombwa tugendeye ku bigo abantu bibumbiyemo ndetse n’amakoperative.” Umuyobozi ushinzwe gutwara abantu n’ibintu avuga ko gutanga ibyangombwa bisigaye byihuta cyane ndetse ngo bageze no ku kigero cyo gukoresha ikoranabuhanga.

Ikoranabuhanga ku isonga mu kunoza serivisi yo gutwara abantu n’ibintu

• Ikoreshwa ry’ikarita ya Tap&Go;
• Umurongo mugari wa interineti;
• Kugenzura imikorere y’imodoka ;
• Kugenzura imyitwarire y’abashoferi.

Iri ni rimwe mu ikoranabuhanga rigaragara cyane mu bikorwa byo gutwara abantu n’ibintu. Umuyobozi ushinzwe gutwara abantu n’ibintu avuga ko gukoresha ikoranabuhanga bizakomeza gushyirwamo imbaraga.

Katabarwa yagize ati “ Ibintu byo kugendana amafaranga ntabwo bikigezweho iyo ufite amafaranga ntabwo habura ibiyatwara ariko iyo ufashe amafaranga ukayashyira ku ikarita uba wizeye ko uzamara ukwezi ugenda nta kibazo ufite. Gukoresha ikoranabuhanga kandi birinda ubujura aho wasangaga umushoferiyakoreye amafaranga 70,000 ariko ugasanga abikije 50,000 . Iyo hakoreshejwe ikoranabuhanga ibi byose ntabwo bibaho.”

Ikarita ya Tap&Go ikoreshwa mu mujyi wa Kigali gusa ariko no mu ntara basigaye bafite imashini itanga amatike hifashishijwe ikoranabuhanga ku buryo bifasha umuntu kumenya abantu bakoresheje imodoka mu gihe iki n’iki.

Twegerane nayo n’igihe gito ikagerwamo n’ikoranabuhanga

Nk’uko Katabarwa Asaba Emmanuel yakomeje abivuga, kwishyura muri twegerane nabyo bigiye kunozwa aho biteganyijwe ko Convoyeri agiye kuzajya agendana akamashini umuntu yakwishyura agahabwa itike itangwa n’imashini z’ikoranabuhanga mu rwego rwo guca uburiganya mu kwishyura.

U Rwanda rurimo gukora ibishoboka byose ngo umugenzi yishimire serivisi ahabwa n’ibigo bishinzwe gutwara abantu n’ibintu, ndetse abenshi bareke kugenda mu modoka zabo ahubwo bitabire gukoresha imodoka rusange. Umuyobozi ushinzwe gutwara abantu n’ibintu muri RURA Katabarwa Asaba Emmanuel avuga ko umwaka wa 2020 imihanda izaba imaze gukorwa bityo imodoka zikabasha kwihuta.

Abashoferi bashyiriweho amakarita y’imyitwarire

JPEG - 11.8 Mb
Ntabwo ari mu mujyi wa Kigali gusa no mu ntara gutwara abantu bikorwa mu buryo bunyuze mu mucyo, aha ni i Huye mu ntara y’Amajyepfo

Abashoferi b’imodoka zikora muri serivise zo gutwara abantu muri rusange bahawe amakarita y’ikoranabuhanga anagaragaza imyitwarire, uwitwaye neza ikabigaragaza kandi n’uwitwaye nabi bikagaragara kugira ngo yikosore. Iyi karita kandi izajya ifasha abashoferi kugaruka mu murongo igihe batannye binyuze mu mahugurwa ahabwa abagaragaje imyitwarire idahwitse.

Mu kiganiro Imvaho Nshya yagiranye n’ Umuyobozi ushinzwe gutwara abantu n’ibintu muri RURA, Emanuel Katabarwa Asaba, yavuze ko iyi karita izafasha mu kumenya imikorere ya buri munsi y’abashoferi kandi ikanabafasha kunoza no guhabwa agaciro mu mwuga bakora kuko nta mushoferi uzakora adafitanye amasezerano n’umukoresha we.

Imiyoborere myiza ya Nyakubahwa Perezida Paul Kagame na guverinoma ayoboye niyo igihugu gikesha ibyagezweho.

RURA Yishimira ubufatanye n’izindi nzego bafatanya mu gushyira mu bikorwa politike ya leta yo gutwara abantu n’ibintu. Aha twavuga umujyi wa Kigali, Polisi y’Igihugu hamwe n’abikorera kugiti cyabo.

Mu myaka irindwi(7) ishize u Rwanda rugeze kuri byinshi mu rwego rw’iterambere, aho n’urwego rwo gutwara abantu n’ibintu rutasigaye inyuma. Ibi igihugu kibikesha imiyoborere myiza ya Nyakuibahwa Perezida wa repubulika Paul Kagame na guverinoma ayoboye.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE