Advertisement
 
 
 
 
 
 
 
 

Politiki | Mu Rwanda

1993-1994: RPF yari ibayeho ite muri CND?   

  Yanditswe na UWIMANA DONATA
 25 April

 
 

Mu gihe RPF yari imaze gufata igice cy’u Rwanda, Habyarimana yasanze nta kundi byagenda yifuza ko haba imishyikirano ari nayo yabaye imishyikirano ya nyuma ku rwego mpuzamahanga yaje kuvamo amasezerano yiswe amasezerano y’Arusha.

Ayo masezerano yari akubiyemo ibintu byinshi, byaba ibijyanye na Politiki, ubutegetsi no guhagarika imirwano, humvikanwa ko hajyaho Guverinoma y’inzibacyuho yari gutegura indi ihamye ishingiye ku matora.

Abaturage bakiranye ubwuzu abanyapolitiki n’ingabo za RPF

JPEG - 109.8 kb
Sheikh Harelimana Abdulkarim

Mu kiganiro Imvaho Nshya yagiranye na Sheikh Abdulkarim Harerimana umwe mu banyapoliti ba RPF wagombaga guhabwa umwanya muri Guverinema y’inzibacyuho, yasobanuye ko muri Guverinoma y’inzibacyuho hagombaga kujyamo abaminisitiri n’abadepite baturutse muri RPF, mu zindi nzego za Leta ndetse no mu yandi mashyaka ataravugaga rumwe na MRND (Ishyaka rukumbi ryari riyoboye icyo gihe).

Ayo masezerano yagenaga ko RPF iza i Kigali. Sheikh Harerimana yasobanuye ko ku itariki ya 29 Ukuboza 1993 ari bwo haje abagombaga kuba abadepite, abaminisitiri n’abanyamabanga bahoraho n’ingabo zigera kuri 600 zagombaga gucunga umutekano wabo.

Abo banyapolitiki bahageze ku mugoroba, baturutse ku Murindi. Baje bari mu matagisi (Minibus), abasirikare batwarwa mu mabisi ya ONATRACOM; icyo gihe imodoka za MINUAR zabagendaga imbere n’inyuma.

Sheikh Harerimana ati “Twaraje tugeze za Kajevuba twinjira aho ingabo za Habyarimana zayoboraga, abaturage bari ku muhanda ari benshi cyane baturutse mu mpande zose z’igihugu, bari bitwaje amashami bakayamanika, bafite ibyapa byanditseho ngo “murakaza neza, muze twubake u Rwanda turabishimiye, Banyarwanda muze dushyire hamwe twubake igihugu cyacu.” Ubwo tuzamuka za Nyabugogo, Kacyiru turazamuka twinjira ahakoreraga Inama y’igihugu y’Amajyambere CND (Conseil National pour le Developpement) hari nko mu ma saa kumi.”

Hari radiyo 2, Radiyo Rwanda ndetse na RTLM, zakurikiranaga icyo gikorwa.

Sheikh Harerimana ati “Igitangaje ni uko RTLM yavugaga ibintu byiza kuri ayo masaha, iti Abanyarwanda bo muri FPR Inkotanyi bageze i Kigali”.

Abanyapolitiki bacumbikiwe muri CND

JPEG - 93 kb
Ingoro y’Inteko Ishinga amategeko (Yahoze ari CND)

Sheikh Harerimana akomeza avuga ko bahageze bahawe amacumbi yabo mu nyubako iherereye ku ruhande rureba ku Gishushu, ahahoze hoteli yitwaga ‘Hoteli Amajyambere’, yari igenewe gucumbikira Abadepite baje mu mirimo.

Ati “Buri mudepite, abaminisitiri ba RPF n’abasirikare bakuru bari bayoboye ingabo bari bafite ibyumba byabo, abasirikare bandi bo biberaga mu ndaki.”

Muri iyo nyubako bacumbikiwemo hari igice cya resitora, igikoni, ahabikwamo ibintu n’igice cyo kwakiriramo abashyitsi. Tuhageze twashyizemo n’igice cyo kwivurizamo, kuko mu basirikare twari dufite harimo abaganga.”

Sheik Harerimana avuga ko MRND na CDR bahinduye ururimi bavugaga ku manywa, ku mugoroba batangira kuvuga amazina y’abantu baje, bakiha no gusesengura buri muntu cyane cyane abo bari bazi.

Tariki 30 Ukuboza 1993 ni bwo abagize Guverinema y’inzibacyuho bagombaga kurahira.

Abagombaga kurahira barategereje amaso ahera mu kirere

Tariki 30/12/1993 ubwo bagombaga kurahira, abarebwaga n’icyo gikorwa ndetse n’abaturage barategereje baraheba, tariki 31 ntibarahira kugeza ku ya 01 Mutarama 1994.

Ati “Twarumiwe, turavuga ngo ko twaje tuje gufatanya n’abandi kubaka igihugu nk’uko twabyumvikanye Arusha bigenze bite? Ariko ntitwatangaye cyane kuko hari igihe Habyarimana yigeze kuvuga ngo ‘amasezerano se ni iki? Si ibipapuro gusa?’ Ubwo twe twatangiye kwibaza tuti ‘ya masezerano ntiyabaye ibipapuro koko?”

Hagati aho mu minsi ya mbere abantu barabasuraga ariko bo ntibasohoke.

Abari muri CND batangiye no kujya babona amafunguro aturutse muri Hoteli Meridien ari yo Umubano y’iki gihe.

Sheikh Harerimana ati “Twaje kumenya ko mu bagemurira iyo Hoteli harimo n’umugore wa Perezida Habyarimana. Turavuga ngo ibi bintu ni ibiki?”

Ubwo ni bwo bigiriye inama yo kureka ibyo biryo, bakajya bihahira, bakanitekera basubira ku bigori n’ibishyimbo, ibirayi n’ibishyimbo ndetse n’inyama rimwe na rimwe. Ngo banafunguye butike irimo amata, ibinyobwa bisindisha n’ibidasindisha ubikeneye akagura. Gusa abari bafite amafaranga muri bo ngo bari bake.

Sheikh Harerimana avuga ko hashize iminsi mike kurahira byanze, umuyobozi w’Umuryango RPF Inkotanyi bari kumwe, Nyakwigendera Kanyarengwe Alexis yakoranye ikiganiro n’Abanyamakuru.

Yabagejejeho ijambo ryerekeranye n’icyabazanye ariko kitashyizwe mu bikorwa, bakaba bagitegereje ati “Ariko turabona ibintu bitarakurikije gahunda gusa ntabwo tuzi impamvu yabiteye.”

Ku ya 05 Mutarama 1994, harahiye Habyarimana wenyine

Kuri iyo tariki, habayeho ibintu bidasanzwe byatangaje benshi ndetse n’abagombaga kurahira. Sheikh Harerimana avuga ko mbere y’uko uwo munsi nyir’izina ugera barabararitse ko bagomba kurahira.

Ati “Bukeye duturamo imyenda yacu, inshuti zacu ziraza mu bwinshi, inteko iruzura buri muntu afata umwanya we”.

Isaha igeze yo kurahira, ubwo Habyarimana yari yinjiye abazi gukoma amashyi barayamukomera nk’uko bisanzwe, Joseph Kavaruganda wari Perezida w’Urukiko rurinda ubusugire bw’itegeko nshinga, aza kurahiza.”

Perezida Habyarimana yarahiye ko azakorera u Rwanda n’Abanyarwanda ko atazaruhemukira, ko naruhemukira azabihanirwa. Arangije avuga ijambo rigufi ati “Umuhango wari uteganyijwe uyu munsi urarangiye.” Arasohoka ageze aho basohokera ahita yigira mu modoka aragenda.

Minisitiri w’Intebe, Uwiringiyimana Agatha, nawe ngo yari aje kureba Guverinoma nshya, agiye gukorera ihererekanyabubasha.

Abanyamakuru baramubaza bati “Watubwira uko biri bugende ko Habyarimana agiye?

Agatha arabasubiza ati “Murambaza mumbaza ibiki mwagiye mukamubaza agiye mutamureba?

Sheikh Harerimana Ati “Aho twari turi turumirwa, nanjye narasohotse ngo nirebere abantu baje ngo turamukanye abo nzi turaramukanya. “

Nyuma ngo yaje kubona aho hanze Musenyeri Nsengiyumva Vincent wari Archeveque wa Kigali ndetse akaba no muri Komite ya MRND, aganira n’abaturage.

Sheikh ati “Yari afatanyije iby’Imana n’ibya Kayizari kandi bibiliya yigisha ko bigomba gutandukana.”

Icyo gihe uwo musenyeri yabwiraga abo bantu ati “Icyo nkundira Habyarimana ni uko ari umunyakuri.

Uwari uhagararanye na Sheikh Harerimana abwira Musenyeri ati “Ibyo se kandi uzavuga ko byanditse muri Bibiliya ? Agira isoni aragenda.”

Nk’uko Sheikh Harerimana akomeza abivuga ngo uwo munsi warahise ariko bibaza aho umuryango mpuzamahanga uherereye ndetse niba hazakorwa andi masezerano.

Andi mahame atandukanye n’amasezerano y’amahoro

Harelimana avuga ko ayo mahame yavugaga ko nta kintu kigomba kuba CDR itarimo, abari muri FPR nabo bati ”CDR ko ayo masezerano itayemera ko yanze kuza Arusha ndetse yanatangaje umunsi asinywa ko ibyo bitabareba nka CDR none uyu munsi irajya mu masezerano itemera.”

Gusa icyabatangaje ngo ni uko Habyarimana yashyigikiye icyemezo cy’iryo shyaka, akavuga ngo ntari bujye mu bintu abana batarimo.

Sheikh Harerimana ati “Njye nk’umuntu wemera Imana wemera idini naravuze ngo iriya ndahiro uriya muntu yarahiye ntizamukoraho uzi gutangaho Imana umugabo ubeshya n’uwo utareba Rugira akureba anakumva?

Twe twikomereje ubuzima ariko tumutumaho abantu ba MINUAR kuko bazaga kudusura, harimo Dallaire, Jacques Roger Booh Booh n’abandi tukababwira ngo kugira ngo amasezerano ashyirwe mu bikorwa murabikoraho iki? Ubwo ariko nabo ntacyo babikozeho ahubwo bagaragaje intege nke.”

Mu minsi ya nyuma twatangiye kujya dusohoka MINUAR ikatujya imbere. Nkanjye natangiye kujya njya gusengera ku misigiti itandukanye no mu biterane.

Sheikh Harerimana avuga ko abari muri CND, babonye amasezerano adashyizwe mu bikorwa, bagatangira kujya mu rwego mpuzamahanga kuganira n’Isi kuri icyo kibazo, abandi bakajya muri za Ambasade kubabaza amaherezo y’ibyo bintu.

Hafi ya CND, hari igiti CDR n’Interahamwe bategeragamo ababasuraga

JPEG - 206.3 kb
Igiti cy’umunyinya CDR n’interahamwe bicaragamo bategereje guhohotera abasuraga abari muri CND

Mu marembo y’Inteko ku ruhande rureba kuri RDB, ku muhanda ujya I Nyarutarama hari igiti cy’umunyinya. Icyo giti ni cyo ngo aba CDR bategeragamo abantu baje gusura abari muri CND rimwe na rimwe bakabahohotera.

Sheikh Harerimana avuga ko CDR imaze gufataho Leta ingwate, iyo bavugaga ngo CDR irajya mu muhanda, umuntu yahuraga nawe ikeka ko ari Umututsi cyangwa ari mu ruhande rutavuga rumwe na Leta yaramwicaga.

Ati “Kuri uwo munyinya abantu bari bazi ko hakundaga kwicara abategereje kujya gupakira imodoka zitwara umucanga, ariko mu minsi ya nyuma ni ho CDR n’Interahamwe bicaraga bakajya bahohotera abantu.”

Yakomeje agira ati “Uwadusuraga afite imodoka, ikirango cyayo baracyandikaga, bakamufotora, usohotse n’amaguru hari ubwo bamwirukankanaga bakamutera amabuye, bamubwira ngo murajya gukora iki mu nyenzi”.

Rimwe na rimwe bagashyira bariyeri ku muhanda munini, uhise wese bakamuhagarika uretse Habyarimana wenyine”.

RTLM na Kangura byatangaje mbere ko Habyarimana azapfa

Sheikh Harerimana Abdulkarim avuga ko yaje kujya ku Mulindi ahamagawe mu kazi asaba ko yaba ahagumye kuko yabonaga i Kigali hari umwuka utari mwiza.

Ati “Tugiye kumva twumva indege ya Habyarimana yarashwe ndetse yanapfuye, ntibyantunguye kuko Kangura yari yarabyanditse mbere ivuga ko mu kwezi kwa kane mu matariki ya mbere Habyarimana azapfa”.

Sheikh Harerimana avuga ko uwandikaga iki kinyamakuru hari abantu bamwibiraga ibanga barimo abasirikare bakuru nka ba Bagosora n’abandi nka ba Nahimana.

Ati “Ngeze Hassan yari azwi nk’umuntu utarize utari umunyamakuru w’umwuga, kuko mbere yacuruzaga ibinyamakuru ku Gisenyi akadoda n’inkweto nyuma aza guhinduka umunyamakuru mu buryo butunguranye”.

JPEG - 180.5 kb
Ingabo za RPF zatabaye Abatutsi bicwaga muri Jenoside yakorewe Abatusti mu 1994

Inyandiko zikomeye ngo ntabwo ari we wazandikaga kuko hari amakuru atashoboraga kumenya kandi wayasoma ugasanga acukumbuye nta wundi wayakora atari umunyamakuru w’iperereza”.

Habura iminsi ibiri cyangwa umwe ngo Habyarimana apfe RTLM, nabwo ngo yabisubiyemo inshuro zirenga 1000, iti “Vuba aha haraba akantu mukitege kandi kazaba katoroshye hagomba kuba imbarutso ya nyayo abaturage mwabwiwe n’abatarabwiwe mugakora ikintu kitoroshye”.

Ni ko byagenze indege imaze kuraswa, abantu bahise batangira kwicwa ni ibintu byari byarateguwe kuko n’intwaro zari zarakwirakwijwe mu baturage.

Ku ya 7 Mata 1994

Sheikh Harerimana avuga ko hari umunyamakuru wakoreraga igitangazamakuru mpuzamahanga wari wamaze gutangaza ko yanyuze mu mihanda akabona abantu bishwe barenze ibihumbi 25.

Kandi ubwo na CND yari yatewe. Ibyo byatumye RPA (Ingabo zari iza FPR) ifata icyemezo cyo kujya gutabara.

Ati “Icyo gihe ntabwo twagombaga guceceka Abanyarwanda barimo gupfa, impamvu bapfa bazira ubwoko, indi ni uko harimo abantu bari barigaragaje ko bashyigikiye FPR barimo kwicwa bazwi. Inzu zabo zariho utumenyetso uko iminsi yahitaga hagaragaraga ko ikiri kuba ari Jenoside yakorerwaga Abatutsi.”

Icyo gihe Isi yaracecetse nyamara FPR ivuga ko harimo gukorwa Jenoside. Loni yohereza umuntu araza arabitangaza ko ikiri kubera mu Rwanda ari Jenoside, ikora umwanzuro ko Isi ikwiye gutabara ariko ntihagira icyo ikora.

Mu gihe CND yarimo kuraswa hejuru no hasi, Harelimana avuga ko Bagosora yavugaga ngo “ndashaka kubona iriya nzu iri hasi ntihagire akanyenzi kavamo.”

Sheikh Harerimana avuga ko abasivili bagiye muri kave, abasirikare bari muri CND bo basohoka bajya mu bice bitandukanye barwana bifashishije ibikoresho bike bari bafite kugeza igihe haziye ababatabara.

Abasirikare b’Inkotanyi barwanye batabara mu bice byegeranye na CND, za Kimihurura, Remera, Kacyiru, ugasanga abasirikare bakura abantu mu ngo, ahantu hatandukanye babahungishiriza muri CND. Nyuma ni bwo n’abo muri CND babakuyeyo bari kumwe n’abo banyapolitiki babajyana kuri RDB ahari kwa Nzirorera.

Aho ngaho ngo ingabo za Leta ntabwo zashoboraga kuharasa kuko yari umuntu wabo. Hagati aho MINUAR yari mu nzira yo kwigendera.

Twagiramungu Faustin utaravugaga rumwe na Leta y’icyo gihe yari yarahungiye muri Sitade. Bagosora amenye ko ari ho ari, ati “Agomba kuza ari muzima cyangwa ari umupfu.”

Sheikh Harerimana avuga ko ingabo z’Inkotanyi zamenye ayo makuru zikamutabara.

Ati “Aho kuri Sitade harindwaga na MINUAR yari igizwe na Batayo ya Bangladesh, amakuru mfite ni uko ingabo zacu zihageze, uwari aziyoboye yababwiye ko ari RPF. Ingabo za MINUAR kuko nazo zari zifitiye ubwoba aba CDR n’interahamwe ko bazigirira nabi, zibonye ko ari Inkotanyi zirabareka baraza (icyo gihe MINUAR na yo yari ibonye uyitabara).”

Izo ngabo za RPF zakoresheje amayeri, kugira ngo zirokore Twagiramungu bamusohora muri sitade, bamuhungishiriza i Nairobi. Nyuma Ingabo z’amahanga zaje kwigendera, Sitade ifatwa na RPF.

RPF yatabaye abantu hirya no hino ibajyana i Byumba

JPEG - 175.7 kb
Abasirikare ba RPF baratabaye babohora u Rwanda

Hateguwe imodoka zimwe zijya kuri Sitade izindi zijya kwa Nzirorera no mu bindi bice bya Kigali mu rwego rwo guhungisha abari bahahungiye. Sheikh Harerimana avuga ko abo bantu bahungishijwe nijoro bigafata amasaha umunani kugira ngo bagere Kabuye ariko mu buryo bw’ubwenge.

Ati “Abajandarume, abashinzwe kurinda Perezida n’izindi ngabo za Habyarimana bari bagihari, byasabye ko Ingabo za RPF zihungisha abantu bucece kugira ngo hatagira uhohoterwa. Abantu bose babajyanye i Byumba bagerayo nta muntu n’umwe upfuye. Mu bahungishijwe harimo n’abayobozi bacu ariko Ingabo zacu zikomeza kurwana mu bindi bice zikuramo iza Leta y’icyo gihe”.

Sheikh Harelimana yunzemo ati “Ubwo amahanga yarasakuje ngo babatabaye gute? Ibi ntibibaho warokora abantu ibihumbi n’ibihumbagiza gute nta muntu n’umwe upfuye. .
Yasoje avuga ko CND baje kuyigarukamo nyuma y’itariki 04 Nyakanga 1994.

 

Comments

Who are you?
Your post
  • To create paragraphs, just leave blank lines.

 
 
Perezida Kagame arakira indahiro z’abagize guverinoma nshya
Perezida Kagame arakira indahiro z’abagize guverinoma nshya

Perezida wa Repubulika y’u Rwanda, Paul Kagame arakira indahiro z’abaminisitiri n’abandi bayobozi bagize guverinoma yavuguruwe ku wa kabiri ku ya 4 Ukwakira 2016. Iyo guverinoma iyobowe na (...)

Trump na Hillary mu kiganiro mpaka cya kabiri ni inde uzatsinda?
Trump na Hillary mu kiganiro mpaka cya kabiri ni inde uzatsinda?

Abakandida bahatanira kuyobora Leta Zunze Ubumwe za Amerika, Donald Trump na Hillary Clinton baraye bagize ikiganiro mpaka. Mu kiganiro cya Mbere Trump yatsinze Hillary Ikiganiro mpaka cya (...)

 Kenya: Perezida Kagame yitabiriye inama ku buhinzi
Kenya: Perezida Kagame yitabiriye inama ku buhinzi

Perezida wa Repubulika, Paul Kagame, kuri uyu wa Gatatu, ari i Nairobi mu gihugu cya Kenya aho yitabiriye ihuriro ku mpinduramatwara mu birebana n’ubuhinzi butangiza ibidukikije ku mugabane wa (...)

Perezida Kagame  na Kabila  barahurira mu mujyi wa Rubavu
Perezida Kagame na Kabila barahurira mu mujyi wa Rubavu

Perezida wa Repubulika y’u Rwanda Paul Kagame, kuri uyu wa 12 Kanama 2016 yahuye n’uwa Repubulika Iharanira Demokarasi ya Congo, Joseph Kabila mu mujyi wa Rubavu. Biteganyijwe ko Perezida Kagame (...)

Amateka y’umuryango AU wateranyiriye ibihugu bisaga 50 mu Rwanda
Amateka y’umuryango AU wateranyiriye ibihugu bisaga 50 mu Rwanda

Inama ya 27 y’Umuryango w’Ubumwe bw’Ibihugu by’Afurika, AU yateraniye i Kigali mu Rwanda kuva ku ya 10 kugeza ku ya 18 Nyakanga 2016. Uyu muryango, uhuza ibihugu bya Afurika, abakuru babyo na za (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.