Advertisement
 
 
 
 
 
 
 
 

Politiki | Mu Mahanga

Hashize imyaka 5 Osama Bin Laden apfuye; abamwishe n’abo yasize babayeho bate?   

  Yanditswe na HERVE UGIRUMUKUNDA
 May 2016

 
 

Ku ya 2 Gicurasi 2011, ingabo zihariye za Leta Zunze Ubumwe zishe Osama bin Laden, wari umukuru w’umutwe w’intagondwa, Al Qaeda mu gitero zamugabyeho mu bwihisho bwari ahitwa Abbottabad muri Pakistan.

Hari nyuma y’imyaka 10 Osama ayoboye ibitero ku nyubako zikomeye mu mijyi ya Washington na New York bigahitana benshi, naho USA igatangaza ko izihorera.

Icyo gitero cyiswe “Operation Neptune Spear” cyagabwe giturutse muri Pakistan nyuma y’igihe kinini Osama Bin Laden ahigwa, ndetse n’intasi za USA zaramaze gukurura amakuru ko ari ho yihishe n’abagore be.

JPEG - 47 kb
Osama Bin Laden

Nyuma y’urupfu rwe, USA yatangaje ko yamushyinguye mu Nyanja nubwo benshi mu bayobozi b’idini rya Isilamu n’abo mu muryango we bari babyamaganiye kure bavuga ko bihabanye n’imyemerere ndetse bikerekana agasuzuguro.

Aba ni bamwe mu bagize uruhare rukomeye mu rupfu rwe n’abo yasize n’uko babayeho muri iki gihe:

1. Barack Obama

Urupfu rwa Bin Laden rwabereye Barack Obama iturufu ikomeye cyane mu matora yo kwiyamamariza manda ya kabiri mu 2012.

Benshi mu bashyigikiye Obama mu matora bagendanaga imyambaro yanditseho ngo “Osama got Obama’d” (Osama yishwe na Obama).

Ku buyobozi bwe, Obama yitirirwa ko yazahuye ubukungu bwa USA, akavana ingabo zayo mu ntambara zidasobanutse nk’iyo muri Iraq ariko cyane cyane agashimirwa kuba yarahanganye n’umutwe wa Al-Qaeda akawuca umutwe yica Osama Bin Laden.

Kuri ubu Obama ari gusoza manda ye ya kabiri ari nayo ya nyuma ku buyobozi bwa USA, umutwe wa Al-Qaeda wacitse intege ariko havuka undi ukomeye cyane uri kubiyogoza muri Syria, Iraq na Libya ndetse ukanagaba ibitero by’iterabwoba bikomeye ku mugabane w’u Burayi.

2. Robert O’Neill

JPEG - 91.2 kb
O’Neill ahamya ko ari we wishe Osama Bin Laden

Mu Gushyingo 2014, umusirikare wa USA uri mu kiruhuko witwa Robert O’Neill yatangaje ko yari mu gitero cyo kwica Osama Bin Laden, anahishura ko ari we wamwishe amurashe amasasu abiri mu mutwe, yagwa hasi akamurasa irindi rya gatatu.

O’Neill akimara kwiyitirira urupfu rwa Osama, bagenzi be bafatanyije mu gitero baramurakariye kuko batashakaga ko ibyo bakoze bijya hanze.

Uyu musirikare we yatangaje ko kuvuga iby’urupfu rwa Bin Laden byari uburyo bwo kuba hafi imiryango y’abahekuwe n’ibitero by’iterabwoba bya Al Qaeda byo ku wa 11 Nzeli 2001.

Kuri ubu O Neill ukora akazi k’ubugishwanama mu by’umutekano, akunze kugaragara kuri teleziviyo asesengura ibijyanye n’igisirikare ndetse yanatangije umuryango utegamiye kuri Leta ugamije gufasha ingabo zivuye ku rugerero.

3. Ayman Al-Zawahiri

Al- Zawahiri yamaze igihe kinini yungirije Laden ku buyobozi bwa Al-Qaeda. Ubwo umuyobozi we yari amaze gupfa, ni we wahise ayobora uwo mutwe w’iterabwoba.

Ku buyobozi bwa Al-Zawahiri, Al Qaeda ntiyongeye kuvugwa cyane ahanini biturutse ku mutwe wa Leta ya Kiyisilamu wahise wigarurira ubutaka bunini muri Syria na Iraq. Ubugizi bwa nabi bukabije bwa Leta ya Kiyisilamu bwatumye Al-Qaeda igaragara nk’idakanganye cyane.

Bivugwa ko Al-Zawahiri yihishe hagati ya Pakistan na Afghanistan.

4.Abagore ba Bin Laden

Bin Laden yari afite abagore batanu ariko ubwo yahungiraga muri Pakistan mu 2002 yajyanye n’abagore batatu gusa, barimo umuto muri bo “Amal” bivugwa ko ari nawe yakundwakazaga.

Amal, ukomoka muri Yemen yari kumwe n’umugabo we ubwo baterwaga n’indege za USA. Mu buhamya yahaye ubucamanza bwa Pakistan, yavuze ko mu gicuku ‘bakanguwe n’igisa n’inkubi y’umuyaga”.

Yongeyeho ko bamaze kubona ko bagabweho igitero bateguye intwaro ngo birengere. Ngo Amal amaze kubona umusirikare wa USA atunze Laden imbunda ku mutwe yirutse amusatira, undi amurasa mu ivi.

Abapfakazi batatu ba Laden bashyikirijwe ubuyobozi bwa Pakistan mbere yo koherezwa muri Saudi Arabia mu 2012. Bivugwa ko nyuma yaho Amal yoherejwe iwabo muri Yemen n’abana be batanu.

5. Sohaib Athar

Uyu mugabo yamenyekanye cyane kubera ukuntu yatangaje amakuru y’igitero cyo kwica Bin Laden imbonankubone.

Ubwo icyo gitero cyatangiraga yari ari mu kazi kuri mudasobwa ye. Yatangiye avuga ko yumvise urusaku rw’indege nyuma avuga ko yumva amasasu.

Ayo makuru ashyushye yatangaga yamukururiye abantu ku mbuga nkoranyambaga kugeza ubwo barenze 100 000 kuri Twitter.

Mu minsi yakurikiyeho yasuwe cyane n’abanyamakuru ndetse n’intasi za Pakistan bamuhata ibibazo. Kuri ubu we n’umuryango baba mu mujyi wa Islamabad.

 

Comments

 
 
USA: Hillary Clinton yibasiye  Trump mu ijambo rye rya mbere nyuma y’amatora
USA: Hillary Clinton yibasiye Trump mu ijambo rye rya mbere nyuma y’amatora

Mu ijambo rya mbere yavugiye mu ruhame nyuma yo gutsindwa amatora, Hillary Clinton yibasiye ubuyobozi bwa Perezida wa Leta Zunze Ubumwe za Amerika , Donald Trump. Yavuye imuzingo gahunda za (...)

USA: Perezida Trump arateganya guha umushahara we abatishoboye
USA: Perezida Trump arateganya guha umushahara we abatishoboye

Perezida wa Leta Zunze Ubumwe za Amerika, Donald Trump, yavuze ko azahembwa, ariko umushahara we akazawutanga mu bikorwa by’urukundo nubwo ubwo yiyamamazaga yari yavuze ko adashaka kuzahembwa. (...)

Perezida Donald Trump arashinja Obama kumviriza ibivugirwa kuri telefoni ye
Perezida Donald Trump arashinja Obama kumviriza ibivugirwa kuri telefoni ye

Perezida wa Leta Zunze Ubumwe za Amerika, Donald Trump arashinja uwo yasimbuye, Barack Obama, gufata amajwi ya telefoni ye mu mpera z’umwaka ushize, harabura ukwezi kumwe ngo atorwe. Abinyujije (...)

USA iriga ku gushoza intambara muri Koreya ya Ruguru
USA iriga ku gushoza intambara muri Koreya ya Ruguru

Leta Zunze Ubumwe za Amerika iri kwiga ku myanzuro yo kubuza Koreya ya Ruguru gukora ibitwaro bya kirimbuzi, irimo no gushoza intambara yeruye mu gihe iki gihugu gikomeje gutsimbarara. (...)

USA: Perezida Trump agiye gushyiraho itegeko rishya ryo gukumira abimukira
USA: Perezida Trump agiye gushyiraho itegeko rishya ryo gukumira abimukira

Perezida wa Leta Zunze Ubumwe za Amerika, Donald Trump yatangaje ko agiye gusohora iteka rishya ryo gukumira abimukira nyuma y’uko urukiko ruburijemo iryo yari yashyizeho bwa mbere rikumira abo (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.