2017-08-17 13:46:28 clouds 27o High | Kigali Rwanda

Dukurikire:
 
 

Umunsi wo kwibohora ugaragaza ubutwari bw’Abanyarwanda - CHENO

Yanditswe na IMVAHO NSHYA

Kuya 2016-07-06 01:00:53

 
Share on:
 
Yasuwe:23
 
Yavuzweho:200
 
10
 
10

Urwego rw’Igihugu rushinzwe Intwari z’Igihugu, Imidali n’Impeta by’Ishimwe (CHENO), rusanga ukwibohora kw’Abanyarwanda gushingiye ku ndangagaciro z’Umuco w’Ubutwari bukomoka ku basekuruza.

Mu kiganiro Imvaho Nshya yagiranye n’Umunyamabanga Nshingwabikorwa w’Urwego rw’Igihugu rushinzwe Intwari z’Igihugu, Imidali n’Impeta by’Ishimwe (CHENO) Nkusi Deo, yavuze ko ubutwari wabuhuza n’Umunsi wo kwibohora kubera ko abagiraga ubutwari mu gihe cyo hambere byashingiraga ku bikorwa umuntu ya koze mu ntambara, mu kurinda igihugu cyangwa kukirwanirira.

Umuyobozi w’Urwego rw’Igihugu rushinzwe Intwari z’Igihugu, Imidali n’Impeta by’Ishimwe (CHENO) yakomeje avuga ko u Rwanda narwo rwabohowe nyuma y’uko hari intwari zabayeho zigatabara u Rwanda bamwe bakamena amaraso ku buryo iyo hataba ubutwari n’ubwitange hatari kubaho ukwibohora.

JPEG - 315.4 kb
Perezida Paul Kagame aha icyubahiro intwari

Ubutwari ntibugaragarira mu ntambara gusa

Umuyobozi w’Urwego rw’Igihugu rushinzwe Intwari z’Igihugu, Imidali n’Impeta by’Ishimwe (CHENO) avuga ko ubutwari butagaragarira mu gutsinda intambara gusa ahubwo bureberwa mu buzima bwose bw’igihugu, mu kugira ubumuntu, kugira ubupfura, kuba umunyakuri, kuba intangarugero, kugira ubushishozi , gukanda umurimo no gukora umurimo unoze buri gihe,kudatinya guharanira ukuri,gukunda igihugu n’ibindi.

Akomeza avuga ko Abanyarwanda bubakiye ku muco w’Ubutwari ukaba umuco uhoraho uranga Abanyarwanda aribyo byakomeza igihugu. Yagize ati”Twubakiye ku muco tugahitamo ibyiza byo mu muco wacu twagera kure cyane kubera ko n’ibihugu byateye imbere ni ibifite abantu bubakiye ku muco wabo.”

Kubohora u Rwanda hari aho byaturutse

Umuyobozi w’Urwego rw’Igihugu rushinzwe Intwari z’Igihugu, Imidali n’Impeta by’Ishimwe (CHENO) avuga ko kugira ngo Abanyarwanda bibohore bashingiye ku muco wa Kanyarwanda, bakurikiza umuco w’abasekuruza bakundaga igihugu cyabo, batashakaga ko hagira ukigabiza akorera nabi Abanyarwanda; abacamo ibice, abadindiza mu iterambere mu mibereho n’imibanire myiza. Ibikorwa bibi by’ingoma y’igitugu nibyo byabahaye ingufu zo guhaguruka bakarwanya ababoshye abana b’u Rwanda.

Ibi bikaba bikomoka mu muco gakondo aho iyo igihugu cyaterwaga, wasangaga, hari abantu bajya kwitangira igihugu bakamena amaraso yabo kugira ngo babone intsinzi.

Igikomeye ni uko hari n’igihe hagendaga mbere umwana w’umwami cyangwa undi muntu ukomeye kandi utagize icyo abuze i bwami.Ariko na buri Munyarwanda agahaguruka akarwanirira igihugu cye,bose bafatanije nta vangura iryo ariryo ryose.

Yakomeje avuga ko nubwo hakoreshejwe ingufu z’intambara, ntabwo ubwayo yari kurangiza ikibazo iyo hatabaho ubwitange, n’urukundo ngo hagire abata amashuri , abata abagore babo, abagabo babo, ibintu batunze bakajya kurugamba; abandi bagatanga ibitekerezo, bagakusanya inkunga n’imisanzu ishoboka, n’ibindi.
Kwibohora byakurikiwe no kwibumbira mu muryango umwe,’’Ndi umunyarwanda’’

Umuyobozi w’Urwego rw’Igihugu rushinzwe Intwari z’Igihugu, Imidali n’Impeta by’Ishimwe (CHENO) ashima ko Abanyarwanda bibohoye bakagira amahirwe yo kugira ubuyobozi bubashishikariza kuba bamwe, bagafatana urunana, bagasangira akabisi n’agahiye, bagateza igihugu imbere.

Umuyobozi w’Urwego rw’Igihugu rushinzwe Intwari z’Igihugu, Imidali n’Impeta by’Ishimwe (CHENO) agira ati” Nta gushidikanya turaha icyubahiro n’Agaciro gakomeye ibikorwa byiza, imyitwarire ntangarugero,byaranze abitangiye kubohora uRwanda ,bishingiye ku muco nyarwanda no ku bumwe bwaranze Bene Kanyarwanda.’’ Urugamba rwo kubaka Igihugu mu Iterambere, mu mibereho myiza, mu mibanire myiza n’ubuyobozi bwiza rurakomeza.

Ibyiza twubakiye ku muco w’u Rwanda ( Home grown solutions) biduhesha ishema kandi nibyo birama,kuko buri wese yumva ari ibye.

Twashima intambwe u Rwanda rumaze gutera , Abanyarwanda turangajwe imbere n’Umuyobozi w’Intangarugero;umuyobozi utaboneka kenshi nkuko byagaragaye mu mateka y’Ibihugu ku isi.

Tugomba gukomeza ubutwari kuko inzira y’iterambere ikiri ndende , urugamba rwo kubaka no kurinda ibyagezweho ntiruhagarara. Umuco w’ubutwari twese dufite inshingano yo kuwigisha ubutitsa no kuwukomeza mu babyiruka bo Rwanda rw’ejo;bakagera ikirenge mucya bakuru babo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE