Advertisement
 
 
 
 
 
 
 
 

Kwamamaza

MININFRA ikomeje kuzamura ibikorwa remezo biramba   

  Yanditswe na Tumukunde Georgine
 17 May

 
 

Muri uyu mwaka w’ingengo y’imari 2015/2016, Minisiteri y’Ibikorwa Remezo ( MININFRA) yageze kuri byinshi bijyanye no kongera ibikorwa remezo dore ko ari umusingi w’iterambere ryihuse.

Guteza imbere ibikorwa remezo ni imwe mu ntego z’Igihugu zikubiye mu Cyerekezo 2020 na gahunda y’imbaturabukungu ya 2 (EDPRS 2), zigamije kurwanya ubukene, kuzamura ubukungu n’imibereho myiza y’abaturage.

Bimwe mu bimaze kugerwaho birebana no kongera ingufu, hifashishijwe Gazi Metane yo mu kiyaga cya Kivu, nyiramugengeri iboneka mu kibaya cy’Akanyaru, no kubaka ingomero hirya no hino mu gihugu hagendewe ku mutungo kamere w’amazi Igihugu gifite.

JPEG - 65.5 kb
Minisitiri w’Ibikorwa Remezo Musoni James

Ibikorwa remezo by’amazi meza na byo bikomeje kongerwa; umubare w’ingo zagezweho n’amazi meza wariyongereye ugeze kuri 84.7%.

Imihanda ikomeje kubakwa hirya no hino mu gihugu, harimo n’iyuzuye abaturage barimo kubyaza umusaruro binyuze mu buhahirane.

Imiturire na yo ntiyasigaye inyuma kuko MININFRA ishyize ingufu mu kuyinoza haba mu Mujyi wa Kigali no hirya no hino mu turere tw’igihugu.

MININFRA iribanda ku gukwirakwiza amashanyarazi no kuvugurura imiyoboro yayo, gukurikirana ishyirwa mu bikorwa ry’imishinga iri mu maboko ya za kompanyi; “Syimbion”, “Hakan” n’izindi no gukurikirana iyubakwa ry’ ibigega by’ibikomoka kuri peteroli.

AMASHANYARAZI YARIYONGEYE AGERA KURI MEGAWATI 186

Muri uyu mwaka w’ingengo y’imari 2015/2016, ingufu zariyongereye, aho amashanyarazi yavuye kuri megawati 160 agera kuri megawati 186. Amashanyarazi yongerewe binyuze mu mushinga wa KivuWatt wo kubyaza Gazi Metani amashanyarazi. Muri Mutarama 2016 uwo mushinga watangiye gutanga megawati 25.

Ibyagezweho mu gukwirakwiza amashanyarazi

Ku bijyanye no gukwirakwiza amashanyarazi, umwaka ushize ingo zigera ku 570 000 zingana na 23% zagejejweho amashanyarazi. Raporo ya Banki y’Isi yo muri 2015 kuri gahunda yo guhanga imirimo yagaragaje ko hari intambwe igaragara yatewe n’u Rwanda mu kongera amashanyarazi akoreshwa mu gihugu bituma ruza ku mwanya wa mbere mu karere ruherereyemo, na ho ku rwego rw’isi rwavuye ku mwanya wa 72 rwariho muri 2014 rugera ku wa 62.

U Rwanda rwahawe inguzanyo n’inkunga

Mu Ukuboza 2015, Banki y’Isi yahaye u Rwanda inguzanyo ya miliyoni 95 z’amadolari y’Amerika, ikazakoreshwa mu mushinga wo kugeza amashanyarazi ku ngo ibihumbi 74 no kuvugurura bimwe mu bikorwaremezo by’amashanyarazi mu Mujyi wa Kigali. Uyu mushinga uzarangira mu mwaka w’2021.

Mu Ugushyingo 2015, u Rwanda rwahawe inkunga n’ikigega gishinzwe gutera inkunga imishinga yo guhangana n’imihindagurikire y’ibihe (CIF) muri gahunda yo kuvugurura ibijyanye n’ingufu z’amashanyarazi (SREP) ingana na miliyoni 50 z’amadolari y’Amerika ni ukuvuga amafaranga y’ u Rwanda arenga miliyari 37.

Iyi nkunga izafasha Igihugu kugera ku muhigo wo kugeza amashanyarazi ku baturage bagera kuri 22% bitarenze umwaka wa 2018, binyuze mu gutanga inguzanyo ku bigo by’abikorera bishinzwe gukwirakwiza imirasire y’izuba. Uyu mushinga uzashyirwa mu bikorwa mu gihe cy’imyaka ibiri.

Amasezerano yo kongera ingufu

JPEG - 101.9 kb
Gazi Metani yo mu Kivu ikomeje kubyazwa amashanyarazi.

Muri Kanama 2015, Leta y’u Rwanda yemeje gukodesha abikorera ingomero nto 15 no kubaka izindi 7. Biteganyijwe ko muri izi ngomero, urwa mbere ruzaba rwatangiye gukora muri Kamena 2016 rutange megawati 4, urwa nyuma rukazarangira muri 2020.

Mu Ukuboza 2015, Leta y’u Rwanda na Sosiyete y’Abanyamerika “Symbion Power LLC” ifite ishami mu Rwanda rya “Symbion Power Lake Kivu Ltd” bashyize umukono ku masezerano y’imyaka 25, yerekeranye no kubyaza Gazi Metane yo mu kiyaga cya Kivu amashanyarazi angana na megawati 50 hamwe no kuyacuruza.

Amasezerano “Symbion Power Lake Kivu Ltd” yagiranye na Leta y’u Rwanda yo kubyaza amashanyarazi Gazi Metane mu cyiciro cya mbere cy’umushinga mu mezi 15 igatanga megawati 14, naho megawati 50 ikazazitanga mu mezi 36.

Muri Mutarama 2016, Guverinoma y’u Rwanda kandi yagiranye amasezerano na kompanyi “Ignite Power Ltd” ikomoka mu birwa bya Maurice, yerekeye gukwirakizwa amashanyarazi y’imirasire y’izuba, agahabwa ingo zo mu cyaro ibihumbi 250 ni ukuvuga 10% bitarenze umwaka wa 2018.

Muri Gashyantare 2016, Minisiteri y’Ibikorwa Remezo yagiranye amasezerano na Kompanyi “Hakan Mining and Generation Industry” ikomoka muri Turukiya agamije kubyaza nyiramugengeri yo mu kibaya cy’Akanyaru amashanyarazi angana na megawati 80, agomba kuba yagejejwe ku Banyarwanda muri Werurwe 2020. Uyu mushinga ufite agaciro ka miliyoni 400 z’amadolari.

Kubaka ibigega by’ibikomoka kuri peteroli

Ibigega byo kubika ibikomoka kuri peteroli byariyongereye, ku buryo ibikomoka kuri peteroli bishobora kubikwa byavuye kuri litilo miliyoni 31 bigera kuri litilo miliyoni 72.

Uku kwiyongera kwagizwemo uruhare na kompanyi zicuruza ibikomoka kuri petelori: aho iyitwa OILCOM imaze kugira ubushobozi bwo kubika litiro miliyoni 19 naho SP Ltd imaze kuzuza ikigega i Rusororo cyo kubika litiro miliyoni 22.

Harimo gukorwa amasezerano hagati ya Leta na SP Ltd yo kubaka ibindi bigega bishobora kubika litiro miliyoni 60 z’ibikomoka kuri peteroli kugira ngo igihugu kiteganyirize ibyashobora gukoreshwa mu mezi abiri mu gihe haramuka havutse ikibazo cy’ibura ry’ibikomoka kuri peteroli.

IBYAGEZWEHO MU GUTUNGANYA IMIJYI N’IMITURIRE

JPEG - 353.5 kb
Umudugudu wa Gacuriro mu Mujyi wa Kigali

Ni inshingano zikomeye z’ibanze kuri Leta y’u Rwanda kugira ngo abaturage babone aho gutura hadashingiwe ku mutungo babona. Ni muri urwo rwego yorohereje abikorera kugira ngo bateze imbere imiturire bubaka amazu arimo n’amacumbi aciriritse. Iyi gahunda ijyana no kureshya abashoramari mu rwego rwo kwagura imijyi hubakwa amazu akomeye y’ubucuruzi.

Korohereza abantu kubona amacumbi aciriritse

Mu mwaka wa 2015 hatangijwe gahunda yo gufasha abantu kubona amacumbi aciriritse. Iyi gahunda ubu irakorwa kandi hari ibimaze kugerwaho.

Hashyizweho amabwiriza ya Minisitiri w’Intebe arebana n’uko ubufasha bwa Leta bwakwihutishwa kugira ngo imishinga yo kubaka amazu ahendutse ishyirwe mu bikorwa. Ni intambwe igenda iterwa ku bufatanye n’abikorera bubaka amacumbi na Leta ikagira uruhare mu gushyira ibikorwaremezo mu duce ayo macumbi yubatsemo.

Hashyizweho itegeko rirebana no guteza imbere ishoramari no korohereza aboshoramari mu bwubatsi buciriritse. Itegeko rishyiraho kandi ibijyanye no korohereza imisoro abashaka gushora imari muri ayo mazu aciriritse hashingiwe ku ngano y’igishoro guhera ku madolari ya Amerika miliyoni n’ibihumbi magana inani kujyana hejuru. Kugira ngo habeho ibikorwa birambye, Leta y’u Rwanda ikorana n’abikorera mu by’ubwubatsi no mu miyoborere.

Hashyizweho kandi urwunge rw’amabwiriza agenga imitunganyirize y’imijyi.

Mu bindi byagezweho harimo inyigo yarangiye y’umushinga wiswe “Batsinda II” ifite amazu arenga 500, kubaka bikaba ari byo bigiye gutangira. Hari ahandi ho kubaka hagera kuri harindwi (7) hafite ubuso bwa hegitari 257.5 heguriwe abashoramari mu by’ubwubatsi, na ho hagomba kubakwa amazu yo kubamo, ay’ubucuruzi, amazu ndangamuco n’ibindi. Biteganyijwe ko hazubakwa amazu agera ku bihumbi 22.

Ibikoresho by’ubwubatsi bikorerwa mu gihugu na byo biragenda byiyongera, urugero ni nka sima, ibindi bikoresho byo gutaka amazu nk’amakaro.

Ibigiye kwihutishwa mu mwaka w’ingengo y’imari 2016/2017

Umushinga w’Itegeko rya Perezida rivuga ku miyoborere n’imikoreshereze y’ikigega cy’iterambere ry’Imijyi waganiriweho n’ abafatanyabikorwa. Nyuma yo kwemeza ikigega cyo guteza imbere imijyi, ikizitabwaho mu mwaka w’ingengo y’imari 2016/2017 ni ugushaka amazu mu rwego rwo gufasha abayakeneye.

Harashyirwa imbaraga mu gushyiraho uburyo bwo kuzigama nk’uburyo bworoshye bwo kubona amazu. Hari kandi gahunda yo kunganira imishinga yo kubaka amazu aciriritse ndetse n’ayo hasi cyane hanarebwa ingaruka bishobora kugira ku bukungu. Ibi biragendana no kunganira abashaka amazu aciriritse, bakoroherezwa kubona amafaranga binyuze mu ngwate, kongererwa amafaranga ku yo bazigamye n’ibindi byaborohereza kubona amazu.

Imiturire mu mijyi

Leta y’u Rwanda ifatanyije na Banki y’Isi bateguye uburyo bw’iterambere ry’imijyi guhera muri 2016 kugeza muri 2021, bakaba baremeranyijwe inguzanyo ya miliyoni 95 z’Amadolari y’Abanyamerika yo gushyira mu bikorwa ishoramari mu bikorwa remezo byemeranyijweho mu Mujyi wa Kigali n’ indi mijyi iwunganira, hiyongereyeho kongerera abantu ubumenyi ndetse no guteza imbere ubukungu.

Iterambere ry’imijyi ririhutishwa. Minisitiri w’Ibikorwa Remezo Musoni James avuga ko iri terambere rigomba gushingira ku igenamigambi n’igishushanyombonera kandi ntiribangamire ibidukikije, ku buryo n’abatuye muri iyo mijyi bagira imibereho myiza.

Ati “Politiki ya leta ni uko twagira abaturage benshi bagera kuri 35% mu mwaka w’2020 batuye mu mijyi. Urebye ubutaka bw’igihugu cyacu, birasaba ko abantu benshi batura mu mijyi, tugasiga bake bashobora gukora nk’ubuhinzi n’ubworozi mu buryo bugari, abandi bakabona imirimo myinshi n’imibereho myiza mu mijyi, bakabona serivisi nziza, uburyo bwo kwivuza, uburezi bwiza, imiyoborere myiza,…”

Ibizashyirwamo ingufu

 Gushyiraho ibikorwaremezo fatizo mu mijyi yunganira Umujyi wa Kigali bikazatwara Miliyoni 80 z’amadolari y’Amerika.

 Umushinga w’ibanze wo kuzamura ahazaturwa hazwi nk’Agatare muri Kigali uzatwara Miliyoni 10 z’amadolari y’Amerika.

 Gufasha mu rwego rwa tekiniki ibikorwa birambye mu Mijyi yunganira Umujyi wa Kigali no gufasha mu iterambere ry’ubukungu mu nzego z’ibanze bikazatwara Miliyoni 3 z’amadolari y’Amerika.

Leta y’u Rwanda irakangurira abashoramari gushora imari cyane cyane mu bikoresho by’ubwubatsi bikorerwa mu gihugu.

ITERAMBERE MU GUTWARA ABANTU N’IBINTU

JPEG - 88.3 kb
Perezida wa Repubulika y’u Rwanda Kagame Paul ( uwa gatatu iburyo), Perezida wa Tanzaniya Dr Pombe Magufuli (uwa kabiri iburyo) n’abandi bayobozi bataha ku mugaragaro ikiraro cyubatswe ku mupaka wa Rusumo

Ibikorwaremezo bifasha kugera ku iterambere ryihuse, ni muri urwo rwego imishinga yo kubaka ibikorwaremezo byo gutwara abantu n’ibintu yihutishijwe kugira ngo ibe umusingi wo kubakiraho ibindi bikorwa birimo imiturire, iterambere ry’imijyi, ibikorwa by’abikorera, kunoza ubuhahirane, n’ubwikorezi rusange.

Imishinga izazamura ubukungu bw’igihugu

Imwe mu mishinga yakozwe izazamura ubukungu bw’igihugu ku buryo bugaragara irimo:

 Iyubakwa ry’ imihanda ahari ibikorwa by’ubukerarugendo mu turere dukikije ikiyaga cya Kivu (Kivu Belt Road Projects). Umuhanda wa Kivu Belt wa km 185 uzateza imbere ubuhahirane: woroshya urujya n’uruza rw’abantu n’ibintu kuko uhuza u Rwanda n’ibindi bihugu ari byo Repubulika iharanira Demokarasi ya Kongo, u Burundi na Tanzaniya.

Uyu muhanda unyura mu turere twa Rusizi, Nyamasheke, Karongi, Rutsiro na Rubavu. Witezweho kandi koroshya ubucuruzi bw’ikawa n’icyayi byoherezwa hanze y’igihugu dore ko uhuza uturere tweramo ibi bihingwa cyane. Uyu mushinga n’indi igenda ikorwa izatanga akazi ku batuye muri turiya turere, izateza imbere ubwikorezi bwo mu Kiyaga cya Kivu, uburobyi mu Kivu no muri Tanganyika n’ubukerarugendo.

 Umuhanda wa Kigali-Gatuna n’uwa Kitabi- Crete Congo Nil-Ntendezi,

 Iyubakwa ry’imihanda; ujya ku bitaro bya Bugeshi, ujya ku ruganda rwa CIMERWA, ujya mu nkambi y’impunzi ya Mugombwa, n’imihanda ijya ku mupaka wa Rusumo n’uwa Kagitumba.

 Ivugururwa ry’ikibuga cy’indege cya Kamembe.

GUKWIRAKWIZA AMAZI, ISUKU N’ISUKURA

JPEG - 1.9 Mb
Perezida wa Repubulika Kagame Paul ataha uruganda rutunganya amazi rwa Nzove II

Nyuma y’aho muri 2010 hashyiriweho politiki n’ingamba zihamye zo gukwirakwiza amazi meza no gushyigikira ibikorwa by’isuku n’isukura, hari intambwe ifatika imaze guterwa iganisha ku ntego yo kuba muri 2020 abatuye mu cyaro no mu mujyi bazaba bagezweho n’amazi meza n’ibikorwaremezo by’isuku n’isukura ku kigero 100%.

Gahunda ya EDPRS 2 na yo imaze kujyaho, hashyizweho umuhigo w’uko mu mwaka w’ingengo y’imari 2017/2018 gukwirakwiza amazi meza n’isuku n’isukura bizaba byagezweho 100%.

Kugira ngo bigerweho, hakozwe ivugurura mu bigo; hashyirwaho ikigo gishinzwe amazi isuku n’isukura (WASAC ltd) n’ Ikigo gishinzwe Ingufu (REG) bisimbura RECO RWASCO na EWSA Ltd.

Ibimaze kugerwaho muri EDPRS 2 mu gukwirakwiza amazi, isuku n’isukura

Imibare yavuye mu mabarura y’imibereho y’abaturage (EICV2, EICV3 & EICV4) yakozwe n’Ikigo cy’Igihugu cy’Ibarurishamibare (NISR), igaragaza ko uhereye muri 2005 imibare y’ingo zagezweho n’amazi meza yagiye izamuka aho yavuye kuri 70.3% ikagera kuri 74.2% mu mwaka w’ingengo y’imari 2010/2011, na ho muri 2014/2015 igera kuri 84.7%. Ubu mu mijyi habarurwa 90%, mu cyaro ni 83.7%.

Ku bijyanye n’isuku n’isukura, ingo zimaze kugerwaho n’iyi gahunda zigenda ziyongera; zavuye kuri 58.5% muri 2005 zigera kuri 83.4% muri 2014/2015. Mu mijyi habarurwa ingo 93.5%. na ho mu cyaro ni 81.3%.

Imishinga yashyizwe mu bikorwa

Hari imishinga myinshi yo gukwirakwiza amazi meza n’ijyanye n’isuku imaze gushyirwa mu bikorwa kandi ikaba igenda neza.

• Umushinga wo kugeza amazi meza mu Karere ka Nyagatare aturutse i Gihengeri, hifahishijwe uruganda rutunganya amazi rufite ubushobozi bwo gutanga amazi angana na metero kibe 2000 ku munsi akagera ku baturage 80 000. Hashyizweho n’urundi rugomero rwimukanwa n’ibindi bikoresho nkenerwa byo gutunganya amazi.
• Umushinga wo kugeza amazi meza mu Karere ka Muhanga i Gihuma hashyizwe inganda ebyiri zitunganya amazi zishobora kwimukanwa n’ebyiri zitimukanwa.
• Mu Karere ka Rutsiro na Rubavu hakozwe umuyoboro w’amazi ureshya na km 123 unyura mu duce twa Mbona - Nyabirasi- Kivumu - Nyamyumba, hakorwa n’amavomo rusange 158, hubakwa ibigega byo mu butaka 27. Uyu mushinga ugeza amazi meza ku baturage 55 000 bo mu Murenge wa Kivumu n’uwa Nyabirasi mu karere ka Rutsiro no mu mirenge ya Nyundo na Nyamyumba yo mu karere ka Rubavu.
• Mu Karere ka Kamonyi (Runda-Gihara) hakozwe umuyoboro ureshya na km 26, ukura amazi ku ruganda rwa Nzove, ukageza amazi meza ku baturage 40 000.
• Mu Karere ka Gakenke, hakozwe umuyoboro wa km 20.7 ugeza amazi ku baturage bo mu mirenge ya Janja na Busengo bagera ku 8 500.
• Mu Karere ka Nyabihu naho abaturage 3 956 bahawe amazi meza.
• Umushinga wo kubaka uruganda rutunganya amazi rwa Nzove II rutanga metero kibe 25 000 ku munsi.
MININFRA n’abafatanyabikorwa bayo bashyizeho uruganda rutunganya amazi mabi aba yakoreshejwe akongera gukoreshwa. Iyi gahunda yageze mu ruganda rw’ Inyange, muri Hoteli Umubano no mu midugudu y’icyitegererezo ya Kabuga.

Imishinga yo gukwirakwiza amazi, isuku n’isukura irimo gukorwa

Mu mishinga irimo gukorwa harimo uwo kongera amazi no kuvugurura imiyoboro yayo mu Mujyi wa Kigali. Ni umushinga mugari uzageza muri 2040, urimo gushyirwa mu bikorwa ku bufatanye na sosiyete yitwa “Metito” yo muri Leta Zunze Ubumwe z’Abarabu (UAE). Witezweho gutanga metero kibe 40 000 z’amazi ku munsi.

Hari umushinga uzashyirwa mu bikorwa ku bufatanye na sosiyete y’Abanyamerika “Culligan International” wo kongerera ubushobozi uruganda rw’amazi rwa Nzove II rutanga metero kibe 25 000 z’amazi ku munsi rukazatanga metero kibe 40 000 ku munsi.

Uruganda rutunganya amazi rwa Mutobo rurongererwa ubushobozi kugira ngo amazi rwatangaga akoreshwa mu Mujyi wa Kigali ave kuri metero kibe 90 000 ku munsi, agere kuri metero kibe 120 000 ku munsi. Harimo kubakwa umuyoboro ufite ubushobozi bwo gutwara amazi meza angana na metero kibe 1.5 mu isegonda. Uyu mushinga ufite agaciro ka miliyoni 350 z’amadolari y’Amerika.

Hari kandi umushinga wa Kanzenze uzatanga amazi angana na metero kibe 40 000 ku munsi, akagezwa mu bigega biri i Nyanza n’i Gahanga mu Karere ka Kicukiro, hanyuma ikigo gishinzwe gukwirakwiza amazi WASAC kikayageza mu duce twa Rebero, Remera, Kicukiro, Busanza na Gikondo.

Mu mujyi wa Rusizi na ho hagiye kugezwa amazi meza hifashishijwe umuyoboro ureshya na km 126 uzanyura mu duce twa Giheke-Kamembe-Nkanka, ukageza amazi meza no mu bice by’icyaro mu Karere ka Nyamasheke. Biteganyijwe ko abaturage bazagerwaho n’amazi meza ari 79 630.

Umushinga wo gukora umuyoboro w’amazi wa Nyungwe -Kibeho - Ndago -Coko ureshya na km 112 ufite ubushobozi bwo gutanga metero kibe 2000 z’amazi ku munsi, uyakura ku isoko iri mu ishyamba rya Nyungwe. Utegerejweho kuzageza amazi meza ku baturage 50 505.

Imishinga iteganyijwe gukorwa y’isuku n’isukura

Mu rwego rw’ isuku n’isukura hari imishinga iteganyijwe gukorwa:

Gutunganya amazi mabi
Hari umushinga (Kigali Centralized Sewerage System) wo gutunganya amazi yakoreshejwe mu mujyi wa Kigali akaba yakongera gukoreshwa ibindi.

Uyu mushinga uri muri gahunda yo kwimakaza isuku mu mujyi wa Kigali, habungabungwa ubuzima bw’abantu, kurengera ibidukikije hirindwa ko ayo mazi y’imyanda yakwanduza imigezi, no guhangana n’ingaruka z’imihindagurikire y’ibihe.

Gutunganya umwanda wo mu bwiherero

Umushinga wo gutunganya imyanda iva mu bwiherero bwo mu ngo wakorewe inyigo, hakaba hazubakwa ibyobo iyo myanda izajya ikusanyirizwamo. Kubaka uruganda ruyitunganya biteganyijwe mu mwaka w’ingengo y’imari 2016/2017.

MININFRA kandi ikomeje kuvugurura ibikorwaremezo by’amazi no kuyongera akagera no mu yindi mijyi mito 6 yunganira Kigali (Rubavu, Musanze, Huye, Rusizi, Nyagatare na Muhanga).

 

Comments

Who are you?
Your post
  • To create paragraphs, just leave blank lines.

 
 
Ibikorwa by’ishyaka PSP birivugira mu gihugu
Ibikorwa by’ishyaka PSP birivugira mu gihugu

Ishyaka ry’Ubwisungane bugamije iterambere PSP ririshimira ibikorwa byinshi rigenda rigeza ku baturarwanda nyuma yo kubona izuba mu 2003 aho ritanga umusanzu waryo muri Politiki y’igihugu uyu (...)

Ishyaka PSD ririshimira umusanzu waryo mu kubaka igihugu
Ishyaka PSD ririshimira umusanzu waryo mu kubaka igihugu

Imyaka 25 irashize Ishyaka Riharanira Demokarasi n’Imibereho Myiza y’Abaturage (P.S.D.) rivutse aho abarwanashyaka baryo bishimira umusanzu wabo mugushyigikira Politiki u Rwanda rwahisemo (...)

Polisi igiye guteza cyamunara ibinyabiziga byakoze amakosa mu muhanda
Polisi igiye guteza cyamunara ibinyabiziga byakoze amakosa mu muhanda

Polisi y’Igihugu ishingiye ku itegeko N0 34/1987 ryo ku wa 17 Nzeri 1987 ryerekeye imihanda n’uburyo bwo kuyigendamo , mu ngingo yaryo ya 35, 36, 37 na 38 zivuga ib¬yerekeye gufunga ibinyabiziga. (...)

 Kaminuza ya STES-Rwanda iratanga buruse ku bayiyandikishamo
Kaminuza ya STES-Rwanda iratanga buruse ku bayiyandikishamo

Kaminuza STES-Rwanda (Sinhgad Technical Education Society-Rwanda) iherereye mu Karere ka Kicukiro, yashyizeho gahunda yo korohereza abashaka kuyigamo; itanga buruse ku bari kwiyandikisha ubu (...)

Impamvu REG yahawe  igihembo mpuzamahanga cyo gukwirakwiza ingufu
Impamvu REG yahawe igihembo mpuzamahanga cyo gukwirakwiza ingufu

Ikigo cy’igihugu gishinzwe ingufu (REG) giherutse guhabwa igihembo na African Leadership Magazine hagendewe ku kuba iki kigo cyaragize imishinga y’ingufu yagize ingaruka nziza mu karere igihugu (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.