2017-08-18 14:28:59 clouds 27o High | Kigali Rwanda

Dukurikire:
 
 

Impamvu REG yahawe igihembo mpuzamahanga cyo gukwirakwiza ingufu

Yanditswe na IMVAHO NSHYA

Kuya 2016-07-05 12:50:15

 
Share on:
 
Yasuwe:19
 
Yavuzweho:200
 
10
 
10

Ikigo cy’igihugu gishinzwe ingufu (REG) giherutse guhabwa igihembo na African Leadership Magazine hagendewe ku kuba iki kigo cyaragize imishinga y’ingufu yagize ingaruka nziza mu karere igihugu cy’u Rwanda giherereyemo.

Iki gihembo cy’inyemezabushobozi cyahesheje ishema u Rwanda mu ruhando mpuzamahanga cyatanzwe tariki 24 Kamena 2016 mu Bwongereza, cyakirwa n’Uhagarariye u Rwanda muri icyo gihugu Ambasaderi Yamen Karitanyi.

Mu gutoranya abazahabwa iki gihembo, umuyobozi mukuru w’ikigo REG Mugiraneza Jean Bosco yasobanuye ko byakozwe n’inama y’ubutegetsi ya African Leadership Magazine habaho gutoranya bikomeye ari bwo basanze REG ariyo igikwiye kuko yabaye indashyikirwa mu mishinga itanga ingufu mu karere k’Afurika y’Uburarirazuba.

JPEG - 171 kb
Mugiraneza Jean Bosco uyobora REG (hagati), Kamanzi Emmanuel ukuriye EDCL (iburyo) na Eng. Major Jean Claude Kalisa (ibumoso) mu kiganiro n’abanyamakuru

Imishinga y’ingufu ya REG irivugira

Umuyobozi w’iki kigo avuga ko batari bazi ko batoranyijwe ahubwo babonye urwandiko rubahamagarira kuzakira iki gihembo.

Ati “Nagerageje kubabaza icyo bahereyeho kuko numvaga bintunguye. Bo barambwiye ngo bifashishije ikoranabuhanga bagenzuye ibikorwa byacu babona ko dukwiriye iki gihembo.”

Mu gutandukanya amazi n’amashanyazi Mugiraneza abona byaratanze umusaruro ufatika kuko ngo REG yandikirwa iyi baruwa tariki 18 Gicurasi 2016 hari haciye iminsi ibiri umushinga Kivu Watt utashywe, kandi ibyo byose byari byaratandukanye.

Ikindi ni uko urogomero rwa Nyabarongo na rwo rwatashywe habayeho gutandukanya amazi n’amashanyarazi. Ubu na Gishoma iri gukora n’ubwo bikiri mu igerageza ariko ikaba ishobora gukora kugeza kuri Megawati 10,8.

Ati “Icyo dutegereje ni uko umuyoboro wa Ntendezi- Bugarama ndetse na Sitasiyo ya Ntendezi byuzura noneho tukagerageza gushyira umuriro ku muyoboro mugari w’igihugu. Impamvu Gishoma itanga ingufu zingana na Megawati 10 ni uko ari zo ngufu CIMERWA ishobora gufata, atari yo yonyine ifata megawati nyinshi n’izindi twazigezamo kuko Gishoma igomba gutanga MW 15.”

JPEG - 128.8 kb
Igihembo REG yahawe na African Leadership Magazine

Iki kigo kikaba gitanga icyizere ko mu mpera z’ukwezi kwa Kanama uyu mushinga uzaba warangiye.

Mu ijambo Ambasaderi w’u Rwanda mu Bwongereza Yamina Karitanyi, yagejeje ku bari bitabiriye umuhango wo gutanga iki gihembo cyagenewe REG yavuze ko mu izina ry’iki kigo yishimiye kwakira iki gihembo kandi ibyagezweho ni iki kigo ari imwe mu ntego igihugu cy’u Rwanda cyihaye, mu kugira uruhare n’impinduka mu kuzamura no guteza imbere urwego rw’ingufu muri Afurika.

Ati “Uyu munsi uko mubibona REG yakabije inzozi, birandenze ntabwo nabasha gusobanura byinshi kuri iki gihembo.”

Mu myaka yashize iki gihembo cyatwawe n’ibigo bitandukanye birimo Chevron, Dormac Offshore, Nigerian National Petrpleum Corporation, NNPC, SGS, Dr. Egbert Imomoh, Dr Kase Lawal, Chrome Group n’abandi.

Ntawe uzaba agicana agatadowa mu 2018

Ikigo cy’igihugu gishinzwe ingufu kirajwe ishinga no kunoza imikorere hatangwa serivisi nziza aho kigerageza kwegera abakiriya bacyo.

Umuyobozi mukuru w’iki kigo Mugiraneza Jean Bosco avuga ko bari kureba uburyo kampani ya EUCL yajya mu bijyanye no gukwirakwiza umuriro ndetse no gucuruza umuriro bakita cyane ku bibazo by’abakiliya. Mu ntangiriro z’umwaka utaha buri karere kazaba gafite ishami ry’iyi kampani bitandukanye na mbere aho wasangaga uturere tubiri twabaga dusangiye ishami.

Ati “Ibyo byatumaga kugera ku mukiliya bibaye ikibazo kuko akarere kabaga ari kanini, umukiliya akaba yategereza igihe kirekire byashoboraga kuboneka nka serivisi mbi. Ubu turagerageza kwegera abakiliya no kubaba hafi kugira ngo ibibazo bafite bikemurwe vuba kandi mu buryo bunoze.”

Inshingano zimwe EUCL yari ifite zimwe zizahabwa EDCL bikaba bizakorwa mu mwaka w’ingengo y’imari ugiye kuza.

Mu byerekeranye no kugeza amashanyarazi ku baturage, igihugu cyihaye intego y’uko 48% bazaba bakoresha ingufu zitangwa n’amashanyarazi asanzwe naho 22% hazakoreshwa ingufu zitangwa n’imirasire y’izuba.

Kugeza ubu iki kigo cyari gifitanye amasezerano na kompanyi ebyiri zitanga imirasire y’izuba ari zo Mobisol na Ignite Power. Iki kigo kikaba cyasinye amasezerano n’ibindi bigo kugira ngo bijyane amashanyarazi mu cyaro hakoreshejwe imirasire y’izuba.

Ingufu zitangwa n’imirasire y’izuba zifashishwa muri byinshi harimo gushyira umuriro muri telefoni, kureba televiziyo, gukoresha bya byuma bikonja n’ibindi.

REG ikaba ibona imirasire y’izuba nk’igisubizo mu bice by’ibyaro ahagaragara ko hatinda kugera amashanyarazi mu buryo bworoshye. Mugiraneza asobanura ko iyo ntego bayishyizemo imbaraga cyane ku buryo hari gahunda yo guca agatadowa mu mwaka wa 2018.

Kuba Leta yarihaye guca Nyakatsi bigashoboka no guca agatadowa ubuyobozi bwa REG bukaba bwizeye ko bizashoboka.

Mu gihe kiri imbere kandi ngo hakaba hagiye gutangira imishinga yo ku rwego rw’igihugu harimo umushinga wa Rusumo, gushyira imbaraga mu kugira ngo haboneke amashanyarazi u Rwanda ruhahirana n’ibindi bihugu nk’umushinga wo kuvana amashanyarazi muri Kenya n’uwa Tanzania.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE