Advertisement
 
 
 
 
 
 
 
 

Kwamamaza

Akarere ka Rutsiro kiyemeje guteza imbere ubuhinzi, ubworozi n’ubukerarugendo   

  Yanditswe na Rutayisire Emile
 18 May

 
 

Umuyobozi w’Akarere ka Rutsiro, Madamu Ayinkamiye Emerence avuga ko bagiye gushyira imbaraga mu buhinzi ubworozi ndetse n’ubukerarugendo nka zimwe mu nkingi zifatiye runini ubukungu bw’u Rwanda.

Rutsiro iherereye mu Ntara y’Iburengerazuba igizwe n’imirenge 13 irimo Kivumu, Kigeyo, Nyabirasi, Boneza, Musasa, Mushonyi, Ruhango, Murunda, Gihango, Mushubati, Manihira, Mukura na Rusebeya . Rutsiro ituwe n’abaturage basaga gato 320 ikaba iri ku buso bwa Kirometero kare (km2)1.157,3.

Urwego rw’ubuhinzi n’ubworozi nirwo rutunze Abanyarutsiro benshi, bakora akazi ku buhinzi n’ubworozi. Ubwo Imvaho Nshya yasuraga Akarere ka Rutsiro, Madamu Ayinkamiye yayitangaje ko bafite intumbero yo gukora ku buryo abaturage bahinga kandi bakorora kijyabere mu rwego rwo kwihaza mu biribwa, bagasagurira amasoko no gukomeza kubaka inganda zitunganya umusaruro bejeje .

Zimwe mu nkingi z’iyi ntumbero ni ukuvugurura ubuhinzi bukava ku guhingira kurya ahubwo bagahinga bagamije kwihaza mu biribwa ndetse no gusagurira isoko.

Mu bworozi; Akarere ka Rutsiro gafite gahunda yo kuzamura umusaruro ukomoka ku bworozi. Umuyobozi w’Akarere ka Rutsiro yashimangiye ko bazashyira ingufu mu bworozi bw’inzuki.

Madamu Ayinkamiye agira ati” Ubuki buturuka muri Rusiro bwashyizwe mu buki bwiza mu Rwanda ndetse no ku rwego mpuzamahanga. Kubera uruganda rwubatswe ruzajya rubutunganya ubuki, turifuza ko buri rugo nibura rugira umutiba w’inzuki. Ibi bizatuma abaturage biteza imbere.”

JPEG - 176.3 kb
Ayinkamiye Emerence uyobora Akarere ka Rutsiro

Akarere ka Rutsiro kabereye ubukerarugendo

Madamu Ayinkamiye uyobora Akarere ka Rutsiro avuga ko usibye ubuhinzi n’ubworozi, bazateza imbere n’ubukerarugendo. Madamu Ayinkamiye asanga umuhanda urimo gukorwa wa kaburimbo uturuka Karongi ugaca ku Karere ka Rutsiro ukazakomeza ugera Rubavu, uzatuma ubukerarugendo butera imbere ndetse bigafasha Rutsiro mu kwihuta mu iterambere.

Akarere gafite imisozi iteye amabengeza, Ikiyaga cya Kivu ishyamba rya Mukura na Gishwati ku buryo hazatunganywa ahantu hagera kuri 20 ho gutemberera mu rwego rw’ubukeragendo. Hamwe mu hantu abantu bamaze kumenyera gusura ni kumurwa w’Umubyeyi Bikira Mariya kuri Crete Congo Nil, ahantu hatoranyijwe na Diyosezi ya Nyundo hakorerwa ingendo nyoboka Mana. Buri mwaka hasurwa n’abantu basaga ibihumbi 20.

Akarere ka Rutsiro gakora ku Kiyaga cya Kivu akaba ari nako karere gafite inkombe ngari kuri iki kiyaga . Hari amashyamba y’amaterano kuri hegitari 10, 395 n’amashyamba ya kimeza. Amashyamba ya kimeza ari muri Rutsiro ni Gishwati na Mukura. Uhasanga kandi imirima y’icyayi ibereye ijisho cyane mu mirenge ya Kivumu Kigeyo Manihira na Gihango.

Nyuma y’imyaka 22 u Rwanda rubohowe n’ingabo za FPR Inkotanyi Akarere ka Rutsiro karagenda kagera kuri byinshi

JPEG - 195.2 kb
Inyubako y’Akarere ka Rutsiro irimo kubakwa

Madamu Ayinkamiye uyobora Akarere ka Rutsiro avuga ko mu myaka 22 ishize, ibyagezweho ari byinshi.

Ubukungu, mu buhinzi n’ubworozi cyane muri gahunda yo guhuza ubutaka byatumye umusaruro wiyongera ariko hakaba hari gahunda yo kongera umusaruro w’ibigori, ikawa, icyayi, ingano, n’ibishyimbo, byose bigamije kwihaza ndetse no gusagurira amasoko.

Hari gahunda yo kongera amahunikiro ndetse n’ahantu ho gutuburira imbuto y’ibihingwa bitanga umusaruro utubutse, kongera umubare w’amaterasi y’indinganire ndetse abaturage bagakomeza gukangurirwa gukoresha inyongeramusaruro. Mu Karere ka Rutsiro kandi hari inganda zihasanzwe zitunganya umusaruro w’ibyoherezwa mu mahanga aha twavuga inganda zitunganya ikawa ndetse n’urutunganya icyayi bikaba biteganijwe kongera ubu buhinzi kugira ngo Rutsiro ifashe igihugu kongera umusaruro woherezwa mu mahanga.

Mu bworozi, kubera umusaruro uboneka mu bworozi bw’inka, hubatswe amakusanyirizo y’amata mu mirenge ya Nyabirasi na Kigeyo ari nako inka zizakomeza kwitabwaho mu kuzivura ndetse no kuzitera intanga. Hari gahunda yo kongera no gutunganya umusaruro ukomoka ku bworozi bw’amafi.

Mu bijyanye n’ingufu: Madamu Ayinkamiye avuga ko amashanyarazi azakomeza kwegerezwa abaturage cyane mu Murenge wa Nyabirasi kandi yongerwe kugira ngo inganda zibashe gukora neza zitange n’imirimo. Biteganyijwe kandi ko ingo zikoresha Biyogazi ziziyongera kugira ngo hagabanywe itemwa ry’amashyamba hagamijwe kubungabunga ibidukikije.

Mu miturire, abaturage bazakomeza gushishikarizwa gutura mu midugudu kubera ko ariho abaturage babona ibikorwaremezo bibegereye nk’amazi, isoko, amashanyarazi imihanda n’ibindi. Muri sentire z’ubucuruzi abacuruzi bazashishikarizwa kubaka inyubako zigezweho z’amagorofa.

JPEG - 212.7 kb
Inzu z’ubucuruzi zirazamuka umunsi ku munsi muri Rutsiro

Gukwirakwiza amazi meza n’isuku

Ubuyobozi bw’Akarere ka Rutsiro buvuga ko n’ubwo amazi amaze kugezwa kuri benshi ku kigero cya 68,2% ibikorwa byo gukwirakwiza amazi meza bizakomeza. Muri uyu mwaka biteganyijwe ko bazageza amazi meza ku baturage ku kigero cya 4,6% hagamijwe kwimakaza umuco wo kugira isuku.

Mu bikorwaremezo, mu Karere ka Rutsiro harimo kubakwa icumbi ryiza (Guest House). Nk’uko Madamu Ayinkamiye yabitangaje ngo barakora ibishoboka byose ku buryo nibura mu Gushyingo uyu mwaka izaba yuzuye ikazaba iri mu bikurura ba mukerarugendo kuko bazaba bafite aho kuruhukira habanogeye.

Iyo Guest House iri ku musozi witegeye ikiyaga cya Kivu. Imihanda ihuza Imirenge yagiye ikorwa kugira ngo yorohereze mu mihahirane kandi hari na gahunda yo gukora indi ndetse no kuyisana ari nako hubakwa ibiraro.

Ubuyobozi bw’Akarere busanga mu Karere ka Rutsiro nihagera umuhanda wa kaburimbo abashoramari baziyongera bakaza bubaka inzu z’ubucuruzi zijyanye n’ibihe kandi hanubakwa n’inzu nshya zo guturamo.

Mu mibereho myiza y’Abaturage, abaturage bakomeje gushishikarizwa gukora uturima tw’igikoni, bahabwa imirimo y’amaboko ituma babona amafaranga nko muri gahunda ya VUP ndetse bagakomeza kwigishwa kwizigamira. Imiryango ikennye izakomeza korozwa binyuze muri gahunda ya Girinka n’ibindi.

Mu kurwanya imirire mibi abana bakeneye amata bazakomeza kuyahabwa. Abarokotse Jenoside yakorewe Abatutsi batishoboye bazakomeza kubakirwa no gusanurirwa kuri bamwe bafite inzu zamaze kwangirika. Abaturage bazakomeza gushishikarizwa gutanga ubwisungane mu kwivuza ( Mituelle de santé ).

JPEG - 60.9 kb
Iyi ni ishusho y’Akarere ka Rutsiro karimo kubakwa

Mu burezi,n’ubwo hari amashuri yubatswe muri uyu mwaka hazubakwa ibyumba by’amashuri 15 mu burezi bw’imyaka y’ibanze 12 ( 12YBE), amasomero (Library) atanu , ibyumba by’amashuri abanza 9 n’ubwiherero 56. Abatazi gusoma no kwandika nabo bazakomeza kwigishwa mu mirenge yose igize akarere ka Rutsiro. Ubuyobozi bw’Akarere buzakomeza gushishikariza abana kwiga ndetse n’abavuye mu ishuri basubizwemo.

Mu buzima, Madamu Ayinkamiye avuga ko kuba akarere gatuwe n’abaturage barenga ibihumbi 320 bakagira ibitaro bimwe gusa bidahagije n’ubwo hari ibigo nderabuzima ndetse n’ibindi byunganira ibigo nderabuzima( Poste de santé ). Umuyobozi w’Akarere ka Rutsiro avuga ko bazakomeza gukora ubuvugizi bakabona ibindi bitaro byunganira ibitaro bya Murunda.

Mu buringanire n’iterambere ry’umuryango, mu midugudu yose haba umugoroba w’ababyeyi kandi bifasha abaturage mu bikorwa by’iterambere binyuze ahanini mu biganiro biva mu mugoroba w’ababyeyi. Muri uyu mugoroba ni naho hakemurirwa amakimbirane agaragaye mu miryango.

Mu miyoborere myiza n’ubutabera, Inzu z’ubuyobozi zagiye zubakwa zegerezwa abaturage, ku buryo n’inzu y’akarere irimo kubakwa ijyanye n’igihe. Mu butabera imanza zigera kuri 91% zaraciwe ku buryo muri uyu mwaka zose zizarangizwa. Ubuyobozi buzakomeza gushyira ingufu mu kurwanya ruswa n’akarengane akariko kose. Gahunda ya Ndi Umunyarwanda yagejejwe mu nzego zose kugera mu mashuri no mu bigo nderabuzima kandi abaturage barayitabira.

Mu gihe cyo kwibuka Jenoside yakorewe Abatutsi, abaturage bafatanya n’ubuyobozi

Madamu Ayinkamiye Emerence uyobora Akarere ka Rutsiro avuga ko mu bihe byo kwibuka Jenoside yakorewe Abatutsi abaturage bafatanya n’ubuyobozi mu kubahiriza gahunda iba yashizweho ku rwego rw’igihugu kandi by’umwihariko bakamenya ko hari abarokotse Jenoside yakorewe Abatutsi batishoboye bakabafasha mu mibereho yabo ya buri munsi.

Madamu Ayinkamiye avuga ko muri uyu mwaka abaturage bakusanyije inkunga isaga miriyoni 24, akoreshwa mu gusana inzu z’abarokotse Jenoside yakorewe Abatutsi batishoboye ndetse no kunganira imishinga yabo iganisha ku iterambere. Gahunda yo koroza abaturage ya Girinka nabo ikaba ibareba.

Abahakana n’abapfobya Jenoside yakorewe Abatutsi barata igihe cy’ubusa

Madamu Ayinkamiye avuga ko abahakana n’abapfobya Jenoside yakorewe Abatutsi ndetse n’abandi bose bafite ingengabitekerezo ya Jenoside biruhiriza ubusa. Madamu Ayinkamiye agira ati” Abo bantu barikoza ubusa kuko dufite Umukuru w’igihugu ufitiye Abanyarwanda icyerekezo cyiza. Icyerekezo giteza imbere Abanyarwanda nta vangura ku buryo n’amahanga ashima u Rwanda. Twariyubatse, abo babuze ibyo bakora bahindure imyumvire baze bafatanye n’abandi banyarwanda kubaka igihugu”.

Ubuyobozi bw’Akarere ka Rutsiro burashima ubuyobozi bwiza bw’umukuru w’igihugu

Madamu Ayinkamiye ashima cyane imiyoborere myiza y’Umukuru w’Igihugu cyacu cyiza cy’u Rwanda ituma Abanyarwanda babaho mu mahoro .Arashima uruhare rw’abaturage mu kubungabunga umutekano bafite bafatanya n’inzego zishinzwe umutekano mu kuziha amakuru kugira ngo icyaha gikumirwe kitaraba.

Icyo umuyobozi w’Akarere ka Rutsiro asaba Abanyarwanda n’abanyamahanga muri rusange ni ukuza bagasura Rutsiro bakibonera ibyiza bitatse u Rwanda ndetse n’ubwiza ntagereranywa bwa Rutsiro. Umuyobozi w’Akarere ka Rutsiro akaba ashishikariza abashoramari bose kuza gushora imari muri Rutsiro.

Umuyobozi yagarutse ku bibazo by’ibiza by’imvura n’umuyaga byibasiriye u Rwanda, by’umwihariko mu Karere ka Rutsiro kubera imisozi ihanamye. Habaye inkangu, inkuba zangiza byinshi, imigezi yaruzuye itwara abantu imihanda n’ibiraro byarasenyutse bitwara ubuzima bw’abantu, imiryango igera kuri 413 ikaba idafite aho yikinga.

Madamu Ayinkamiye arasaba abaturage gukora ibikorwa by’umuganda kugira ngo bikemurire ibibazo bahuye nabyo kandi asaba n’ubufasha abafatanyabikorwa b’akarere nka za Minisiteri ngo babafashe gukemura ibibazo batewe n’ibiza.

 

Comments

Who are you?
Your post
  • To create paragraphs, just leave blank lines.

 
 
Ibikorwa by’ishyaka PSP birivugira mu gihugu
Ibikorwa by’ishyaka PSP birivugira mu gihugu

Ishyaka ry’Ubwisungane bugamije iterambere PSP ririshimira ibikorwa byinshi rigenda rigeza ku baturarwanda nyuma yo kubona izuba mu 2003 aho ritanga umusanzu waryo muri Politiki y’igihugu uyu (...)

Ishyaka PSD ririshimira umusanzu waryo mu kubaka igihugu
Ishyaka PSD ririshimira umusanzu waryo mu kubaka igihugu

Imyaka 25 irashize Ishyaka Riharanira Demokarasi n’Imibereho Myiza y’Abaturage (P.S.D.) rivutse aho abarwanashyaka baryo bishimira umusanzu wabo mugushyigikira Politiki u Rwanda rwahisemo (...)

Polisi igiye guteza cyamunara ibinyabiziga byakoze amakosa mu muhanda
Polisi igiye guteza cyamunara ibinyabiziga byakoze amakosa mu muhanda

Polisi y’Igihugu ishingiye ku itegeko N0 34/1987 ryo ku wa 17 Nzeri 1987 ryerekeye imihanda n’uburyo bwo kuyigendamo , mu ngingo yaryo ya 35, 36, 37 na 38 zivuga ib¬yerekeye gufunga ibinyabiziga. (...)

 Kaminuza ya STES-Rwanda iratanga buruse ku bayiyandikishamo
Kaminuza ya STES-Rwanda iratanga buruse ku bayiyandikishamo

Kaminuza STES-Rwanda (Sinhgad Technical Education Society-Rwanda) iherereye mu Karere ka Kicukiro, yashyizeho gahunda yo korohereza abashaka kuyigamo; itanga buruse ku bari kwiyandikisha ubu (...)

Impamvu REG yahawe  igihembo mpuzamahanga cyo gukwirakwiza ingufu
Impamvu REG yahawe igihembo mpuzamahanga cyo gukwirakwiza ingufu

Ikigo cy’igihugu gishinzwe ingufu (REG) giherutse guhabwa igihembo na African Leadership Magazine hagendewe ku kuba iki kigo cyaragize imishinga y’ingufu yagize ingaruka nziza mu karere igihugu (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.