2017-10-18 18:43:44 clouds 27o High | Kigali Rwanda

Dukurikire:
 
 

Munyampeta yateguye igitaramo azamurikiramo amashusho y’indirimbo yakoreye i Burayi

Yanditswe na IMVAHO NSHYA

Kuya 2017-08-08 09:05:15

 
Share on:
 
Yasuwe:166
 
Yavuzweho:200
 
10
 
10

Munyampeta Jean Luc, umuhanzi mpuzamahanga w’icyamamare mu ndirimbo zihimbaza Imana, yateguye igitaramo gikomeye yise ‘Fragrance of Thanksgiving’, azanamurikiramo amashusho y’indirimbo ze yakoreye ku mugabane w’u Burayi.

Mu kiganiro yagiranye n’Imvaho Nshya, uyu muhanzi umaze imyaka isaga 20 mu buhanzi bw’indirimbo zihimbaza Imana, yavuze ko iki gitaramo kizabera mu nyubako y’icyicaro cy’itorero ry’Abadiventisiti b’umunsi wa karindwi mu Rwanda, kigamije gushima Imana.

Munyampeta avuga ko abazitabira iki gitaramo yizeye ko bazahagirira ibihe byiza, kuko uretse umuziki mwiza wo mu njyana asanzwe azwiho ya ‘country music’, bazanagira amahirwe yo kuririmbirwa na korali zikomeye nka Abakurikiye Yesu, Maranatha, ndetse n’abahanzi ku giti cyabo nka Jacques Mwizerwa, Mahoro Isaac na Phanuel Bigirimana.

Asaba abanyarwanda kwitabira iki gutaramo bagafatanya guhimbaza Imana, banayishimira ibyiza byinshi yabakoreye, ndetse bakanamushyigikira mu gukomeza gusakaza ubutumwa bwiza anyuza mu mpano yo kuririmba.

Yagize ati “Abakunzi b’indirimbo muri rusange bazitwaze inkunga y’amafaranga 5000 na 10000, bahabwe DVD cyangwa CD audio bishya nzaba nashyize hanze, ubundi bakurikirane indirimbo nshya ziryoheye amatwi n’umutima, mu njyana yanjye abantu bamenyereye ya Country music, kandi agashya ni uko zimwe muri izi ndirimbo amashusho yazo nayakoreye i Burayi.”

Iki gitaramo kizitabirwa na bamwe mu bayobozi bakuru b’itorero ry’abadiventisiti mu Rwanda kizaba kuwa gatandatu tariki ya 12 Kanama 2017, kikazatangira saa kumi n’imwe z’umugoroba.

Munyampeta Jean Luc wanamenyekanye cyane muri korali Abagenzi, yatangiye kuririmba ku giti cye mu 1996, mu myaka 20 ishize akaba yararirimbye mu bitaramo bitandukanye hirya ni hino mu Rwanda, ndetse mu mpero z’umwaka wa 2014 akorera ibitaramo bitandukanye ku mugabane w’u Burayi mu bihugu nk’u Budage, Pologne, Repubulika ya Czech, u Bubiligi n’ahandi.

Kanda hano urebe indirimbo Betelehemu ya Munyampeta Jean Luc

TWIZEYIMANA FABRICE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE