Advertisement
 
 
 
 
 
 
 
 

Imyidagaduro

Bimwe mu byatumye hari abijujuta nyuma y’intsinzi ya Urban Boys   

  Yanditswe na NDAMYIROKOYE FRANÇOIS
 August 2016

 
 

Mu ijoro ryo ku ya 13 Kanama 2016 i Kigali mu busitani bwa Sitade Amahoro habereye igitaramo cya nyuma cyo kureba uwagombaga kwegukana igihembo cy’irushanwa rya Primus Guma Guma Super Star ya 6 birangira itsinda rya Urban Boyz ari ryo ryegukanye igikombe.

Nubwo Urban Boyz yatwaye igihembo gihwanye na miliyoni 24 z’amafaranga y’u Rwanda, ubwo bahamagarwaga ko ari bo begukanye igihembo, hari bamwe batangiye kwijujuta bavugaga ko igikombe cyari gikwiye kuba icya Bruce Melody bashimangira ko abarusha ubuhanga mu kuririmba.

Itsinda Urban Boyz ryahawe igihembo, mu gihe ryari risigaye ku rubyiniro riri kumwe na Bruce Melody ndetse na Christopher.

Ubwo Urban Boyz yahabwaga igihembo, Bruce Melody yasigaye ku rubyiniro na Christopher hategerejwe uwegukana umwanya wa kabiri.

Mu mwanya muto Muneza Christopher yaje guhamagarwa ko ari we ubaye uwa kabiri ubona Melody asa n’utunguwe aba abonye na we umwanya wa gatatu.

JPEG - 262.8 kb
Urban Boyz itsinda ryegukanye igihembo nticyavugwaho rumwe nubwo rifite abafana benshi mu Rwanda

Havuzwe menshi hatangwa ibihembo

Nta muntu n’umwe ushobora guhakana ko Urban Boyz ari itsinda rikomeye mu Rwanda rizwiho indirimbo zishyushya abantu, rinambara neza rikaberwa. Mu myaka ya 2007 ryakoreraga umuziki i Huye mu 2009 riza i Kigali ritangira kwiyegereza abafana b’abanyamujyi buke buke.

Mu 2012 Bruce Melody yaje aririmba indirimbo yitwa “Tubivemo” aririmba iyitwa “Ndumiwe” akomeza uko yigarurira imitima ya benshi ntawushidikanya ko azi kuririmba.

Ubuhanga bwa Bruce Melody abenshi bamuziho ni bwo bwatumye bamwe mu bari bari mu birori bavuga ko Urban Boyz yaba ‘yarashoye amafaranga mu bafana kugira ngo bigaragare ko ikunzwe cyane kumurusha.’

Ahamije ayamagambo bavugaga ko Urban Boyz yegamiye umugabo ufite ubushobozi witwa Nsengumuremyi Richard uyibereye umujyanama ubaba hafi uko bishoboka mu gihe ubu Melody we yirwanaho mu muziki we.

JPEG - 231 kb
Young Grace yavuzweho ko atari akwiye kujya imbere y’abahanzi nka Jules Sentore na Danny Nanone

Kuba Christopher yagiye imbere ya Melody na bwo abantu bavuze ko ari uko Ishimwe Clement uyobora Kina Music inzu ya muzika abarizwamo (Clement) yari amuri inyuma ngo bituma Bruce Melody ahera mu cyeragati.

Indi myanya itavuzweho rumwe ni ukuntu Umutare Gaby yabaye uwa nyuma mu gihe ubwo bavugaga ko bari bagiye guhamagara uwa nyuma abantu bashyize mu majwi cyane Allioni aho Anita Pendo yabazaga ati ‘ni nde wa cumi? Abafana na bo bati “Ni Allioni”.”

Utaravugaga Allioni yavugaga TBB dore ko n’ubundi ari bo bahanzi byavuzwe ko batashyushyaga cyane abantu mu bitaramo bitandukanye.

Ukuntu Jules Sentore na Danny Nanone baje inyuma ya Young Grace na Allioni na byo biri mu byatumye abantu bakemanga irushanwa cyane bavuga ko batanga imyanya uko biboneye batagendeye ku muhanzi ukunzwe cyangwa ku buhanga afite mu kuririmba.

Bamwe mu bafana babona iri rushanwa ryaratangiye kuba isaranganya bihembo ku bahanzi kuko bamwe bavugaga ko Urban Boyz yahawe igihembo hagendewe ku kuba mu mateka y’iri rushanwa nta tsinda ryari ryakagitwara.

Ikindi gituma kandi uko gutanga ibihembo gufatwa nk’isaranganya ry’ibihembo, mu 2015 ubwo Knowless yahabwaga igikombe byavuzwe ko yagihawe cyari gikwiye Melody wabaye uwa kabiri ngo ariko Knowless yagihawe kuko nta mukobwa n’umwe wari waregukanye igihembo.

JPEG - 259.4 kb
Umwanya wa nyuma Umutare Gaby yahawe ntiwavuzweho rumwe

Gusa umuntu yakwibaza aho muzika nyarwanda igana niba icyari irushanwa kitakiri ryo umuhanzi akajya yegukana igihembo kuko afite umushyigikiye ufite ifaranga atari uko ashoboye. Ari uko bimeze byaba bibabaje kandi biteye agahinda kuko n’ubwo Urban Boyz yari gutwara igikombe, Christopher akaba uwa kabari, Melody akaba uwa gatatu n’indi myanya yo hejuru ntabwo uko bahawe ibihembo bihwanye n’uko barushanwa ubuhanga.

Nibikomeza uko umuhanzi azajya ashaka umushyigikira wifite aho guharanira gukora ibihangano byiza.

Ikindi cyavuzwe ku myanya itatu ya mbere ngo ni uko Melody yagizwe uwa gatatu kuko hari ijwi rya Mushyoma Joseph uzwi nka Boubou uyobora EAP ryari ryaragiye hanze rivuga ko Urban Boyz yari iya mbere, Melody uwa kabiri, Christopher uwa gatatu, Danny Vumbi uwa kane. Mu rwego rwo kwerekana ko bitari byo bamwe bavuze ko ari yo mpamvu Christopher yagizwe uwa kabiri Melody akagirwa uwa gatatu.

Gusa uko umuntu yabibonaga wabonaga ko Melody atari ashyushye nk’uwiteguye igikombe mu gihe Urban Boyz wabonaga ibyiteguye gusa byatangiye kuvugwa ko Urban Boyz yagombaga kugitwara ku munsi wa mbere w’irushanwa ku ya 14 Gicurasi 2016, ubwo ibitaramo byatangiriraga mu mujyi wa Gicumbi.

Uko urutonde rw’intsinzi rwakurikiranye, Urban Boyz babaye yabaye iya mbere, Christopher aba uwa kabiri, Melody uwa gatatu, Danny Vumbi uwa kane, Young Grace uwa gatanu, Allioni uwa gatandatu, Jules Sentore uwa karindwi, Danny Nanone uwa munani, TBB aba cyenda, Umutare Gaby aba uwa cumi.

 

Comments

 
 
Ras Bambo, umuhanzi uvuga ko azanye impinduka muri Reggae nyarwanda
Ras Bambo, umuhanzi uvuga ko azanye impinduka muri Reggae nyarwanda

Ras Bambo ni umurasita wifuza impinduramatwara muri muzika nyarwanda cyane cyane mu njyana ya Reggae ndetse ngo umunsi umwe yiteze ko abahanzi nyafurika n’abayikomokamo bakora iyi njyana bazunga (...)

Miss Rwanda 2017:  Queen Kalimpinya ari kuza imbere mu matora
Miss Rwanda 2017: Queen Kalimpinya ari kuza imbere mu matora

Abakobwa 15 barimo guhatanira ikamba rya Miss Rwanda 2017 ubu bari mu mwiherero i Nyamata muri Golden Tulip ari nako barushanwa amanota binyuze ku kubatora hifashishijwe ubutumwa bwoherezwa (...)

Umutoni yiyemeje kuzita ku bidukikije aramutse abaye Miss Rwanda 2017
Umutoni yiyemeje kuzita ku bidukikije aramutse abaye Miss Rwanda 2017

Umutoni Pamela, umwe mu bakobwa 15 barimo guhatanira ikamba rya Nyampinga w’u Rwanda 2017 avuga ko niyegukana ikamba rya nyampinga w’uyu mwaka azashishikariza abantu kurushaho kubungabunga (...)

Buravan arimo gukorana indirimbo n’Umunyatanzania AY
Buravan arimo gukorana indirimbo n’Umunyatanzania AY

Burabyo Dushime Yvan ukoresha mu muziki izina rya Yvan Buravan, arimo gusubiranamo indirimbo ye Just a Dance n’umuraperi ukomeye wo muri Tanzaniya witwa AY. Aganira n’Imvaho Nshya, Buravan (...)

Yageneye impano Perezida Kagame amushimira gushyigikira ‘HeForShe’
Yageneye impano Perezida Kagame amushimira gushyigikira ‘HeForShe’

Karemera Yves usanzwe akina akanayobora filime yageneye impano perezida Kagame kubera uruhare yagize mu gushyigikira gahunda ya HeForShe. Ni nyuma yuko umukuru w’igihugu ari mu bagabo ba mbere (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.