2017-08-19 07:41:08 clouds 27o High | Kigali Rwanda

Dukurikire:
 
 

Abahanzi bo mu Rwanda bakuye isomo mu gitaramo cya Sauti Sol

Yanditswe na IMVAHO NSHYA

Kuya 2016-09-19 12:56:50

 
Share on:
 
Yasuwe:20
 
Yavuzweho:200
 
10
 
10

Nyuma y’uko itsinda rya Sauti Sol ri koreye igitaramo i Kigali mu ijoro ryo ku ya 17 Nzeri 2016 kikanyura benshi, bamwe mu bahanzi nyarwanda bari bahari batangaje ko bakigiyeho byinshi.

Hope Irakoze ubarizwa mu itsinda rya 3 Hills uririmbana na Eric Mucyo yabwiye Imvaho Nshya ko igitaramo cya Sauti Sol cyari giteguye neza, ku buryo byagaragara ko buri kintu kiri ku murongo.

Yagize ati «Bakoze igitaramo cyiza kuko byagaragaye ko bari bariteguye bihagije kandi ni abahanga rwose ».

JPEG - 281.8 kb
Sauti Sol babyinana na bamwe mu banyeshuri biga umuziki ku Nyundo

Umuhanzi Irakoze yashimangiye ko abahanzi nyarwanda bakwiye kujya bitoza bihagije mbere yo gukora ibitaramo.

Yanabasabye kutazajya bahindura abacuranzi ngo kuko byagaragaye ko kuba Sauti Sol itabahindura bituma ku mpande zombi barushaho kumenyerana mu kazi kabo.

Rukabuza Richie Pius uzwi nka Dj Pius na we wari uhari ubwo igitaramo cyabaga yemeje ko cyaranzwe n’ubuhanga cyane.

Yagize ati « Igitaramo cya Sauti Sol cyari giteguye neza cyane. Abacuranzi bari biteguye mu buryo buhagije. Ukuntu kandi abagize Sauti Sol baririmbye mu buryo bw’inyumva nkumve byerekana ko baba bafashe umwanya munini wo kwitegura igitaramo ».

Dj Pius yavuze na none ko icyamwemeje ko Sauti Sol yari yiteguye bihagije ari uko uburi gikorwa cyose bakoraga mu gitaramo kitabatunguraga.

Ati «Ukuntu mu gitaramo bakoraga ibikorwa bitandukanye byagaragaraga ko biteguye mu buryo buhagije ».

Umusore Buravan waririmbye no muri iki gitaramo yatangaje ko ukuntu yabonye Sauti Sol iririmba mu gitaramo byamweretse ko abahanzi bo mu Rwanda bagomba gukora cyane kugira ngo na bo bagere ku rwego rwiza mu muziki wabo.

Yagize ati « Cyari igitaramo cyiza bigaragara ko cyari cyateguranywe ubuhanga. Natwe abahanzi nyarwanda dukwiye gukora cyane kugira ngo tugere kure mu muziki ».

Buravan yahakanye amakuru y’uko yaba agiye gukorana indirimbo na Sauti Sol, yavuze aganira na bo kuva hambere ngo ariko ntabwo bigeze baganira ku gukorana indirimbo ngo ahubwo yabanje gushyira imbere kugirana ubucuti nabo kugira ngo bazajye bamwungura inama mu buhanzi bwe.

Mani Martin na we wari muri igitaramo yavuze ko cyari cyiza cyane ngo kandi Sauti Sol ni abahanzi bamaze kugera kure yemeza ko ibihugu bigize Afurika y’Uburasirazuba batewe ishema nayo.

Ubwo igitaramo cyari kigisozwa, Mani Martin yavuze ko yagiranye ikiganiro n’abagize Sauti bamubwira ko ibanga bakoresha mu muziki wabo ari uko buri munsi bakora imyitozo ya muzika n’imyitozo ngororamubiri ibafasha kurushaho kugaragara neza ku rubyiniro.

Muyoboke Alex, Umujyanama wa Charly na Nina wanabaye mu myaka yashize umujyanama w’abahanzi batandukanye barimo Urban Boyz, Dream Boyz, Tom Close na Social Mula, yavuze ko abahanzi nyarwanda bakwiye kwitabira igitaramo nka kiriya kugira ngo bagikuremo isomo ry’uko umuziki ukorwa.

Muyoboke wari witabiriye icyo gitaramo yashimangiye ko abahanzi nyarwanda bakwiye kujya begera abahanzi nka Sauti Sol, Diamond, Chameleone n’abandi bakabaha inama z’ukuntu umuziki ukorwa neza.

Itsinda rya Sauti Sol ryari ryaje mu Rwanda mu rwego rwo kumurika Alubumu yaryo yitwa « Live and die in Africa ».

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE