2017-06-28 15:02:12 clouds 27o High | Kigali Rwanda

Dukurikire:
 
 

Perezida Kagame yibukije abagore bahabwa ubuyobozi kutirara

Yanditswe na IMVAHO NSHYA

Kuya 2017-04-23 07:11:20

 
Share on:
 
Yasuwe:139
 
Yavuzweho:200
 
10
 
10

Perezida Paul Kagame avuga ko guteza imbere umugore atari impuhwe aba agiriwe, ahubwo ko ari inshingano kuri we agomba gusohoza atanga umusanzu mu kubaka igihugu.

Mu butumwa yagejeje ku bagize Inama nkuru ya 3 y’urugaga rw’abagore rushamikiye ku muryango FPR-Inkotanyi ku wa Gatandatu rariki 22 Mata 2017, Perezida Paul Kagame yagize ati "Kuba uri umugore mu myanya y’ubuyobozi ntabwo bigomba gutuma wirara ngo ukore nabi. Ugomba gutanga umusanzu wawe. Tugomba kubaka umuco wo kugendera ku kuri, tugateza imbere Abanyarwanda ntawe uhejwe."

Perezida Kagame yakomeje yibutsa ko Umuryango FPR-Inkotanyi ufite amateka ajyanye n’impinduramatwara yo guteza imbere buri Munyarwanda nta n’umwe usigaye inyuma.

Yasabye buri wese guharanira gushyigikira no guteza imbere Umunyarwandakazi wari warasigajwe inyuma, kuko kumuteza imbere atari impuano aba ahawe ahubwo ari uguteza imbere igihugu o guharanira ko buri wese agendana n’igihe.

Umukuru w’Igihugu akaba na Chairman w’Umuryango FPR-Inkotanyi, yavuze ko umuco wo kubwira abakobwa bagiye gushyingirwa ko bazahura n’ibibazo ukwiye gucika, ahubwo bakajya bahabwa inama nziza zubaka hanyuma ihohoterwa bahura na ryo rikamaganwa.

Perezida Kagame yasobanuye ko bishingiye ku muco wa kera aho umubyeyi yahitagamo ko umwana w’umuhungu aba ari we wiga hashingiwe ku bushobozi buhari, uw’umukobwa agaharirwa imirimo yo mu rugo agategereza gushyingirwa kandi nabwo agashaka imburagihe ataruzuza imyaka y’ubukure. Perezida Kagame avuga ko ibyo bigomba gicika, bose bagahabwa amahirwe angana nk’abana banganya uburenganzira.

Ati "Umuco wo kubwira abakobwa bagiye gushaka ko bagiye guhura n’ibibazo kandi ko bagomba kubyemera ukwiye gucika burundu […] Nta Munyarwandakazi ukwiye kwihanganira gukubitwa. Ikibi tugomba kukirwanya twese duhereye mu miryango."

Perezida Kagame yavuze ko ibyo nta Munyamuryango wa FPR-Inkotanyi ukwiye kurebera abana b’abakobwa bacuruzwa kuko abo atari abacakara.

Ati "Mwe nk’abanyamuryango mukwiye kugira uruhare mu gushakira umuti ibibazo nk’ibyo hamwe n’abandi bemera kujya kwicuruza mu bindi bihugu nyamara bagaca inyuma bakiyita abana b’abanyeshuri, uwo si umuco mwiza."

Mukantabana Mariya uyobora Urugaga rw’abagore rushamikiye kuri RPF-Inkotanyi, nyuma yo kugaragaza ibyagezweho n’ibizakorwa mu myaka 2, yasobanuye zimwe mu nzitizi zibabangamiye zirimo itangwa rya serivisi itaragera ku rwego rushimishije, ibibazo by’isuku, abana b’abakobwa bataritabira kwihangira umurimo kimwe n’abahungu, kutagirirwa icyizere mu itangwa ry’akazi n’ibindi.

Muri iyo nama hakozwe amatora yo gusimbura Umuyobozi wa Komisiyo y’ubutabera mu rugaga rw’abagore usimbura ucyuye igihe, hakaba haratowe Mbabazi Confort usanzwe ari umukozi muri MIFOTRA (Minisiteri y’Abakozi ba Leta n’Umurimo).

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE