Advertisement
 
 
 
 
 
 
 
 

Amateka | Mu Rwanda

Icyo bamwe mu banyapolitiki bakomeye bavuze kuri Jenoside yakorewe Abatutsi   

  Yanditswe na MUGABO LAMBERT
 7 April

 
 

Umuryango w’Abibumbye wemeje ko buri tariki ya 7 Mata Isi yose izajya yibuka Jenoside yakorewe Abatutsi mu 1994. Abantu batandukanye barimo abayobozi b’ibihugu by’ibihangange ku Isi, abayobozi b’imiryango mpuzamahanga bakunze kugira icyo bavuga kuri iyo jenoside yahitanye abasaga miliyoni n’abandi banyuranye.

Bamwe muri bo ni:

Bill Clinton wahoze ayobobora Leta Zunze Ubumwe z’Amerika

JPEG - 69.9 kb
Umunyamabanga Mukuru wa Loni Ban Ki Moon, na Clinton wari perezida wa USA

Ku wa 23 Werurwe 1998 ubwo yasuraga u Rwanda akiri Perezida, Bill Clinton yagize ati “Mu minsi 90 yatangiye ku wa 6 Mata 1994, u Rwanda rwanyuze mu bihe bibi by’ubwicanyi bw’ikinyejana twenda kuvamo. Imiryango yiciwe mu ngo zayo, abantu bahizwe n’abasirikare n’intagondwa, bahigirwa mu mirima no mu mashyamba nk’aho bari inyamaswa”.

Muri iri jambo rye, yakomeje agira ati “Kuva ku Kibuye mu burengerazuba kugera i Kibungo mu burasirazuba, abantu bashakishaga ubuhungiro mu nsengero, mu bitaro no mu mavuriro. Iyo babonwaga, abarwayi n’abashaje, abagore kimwe n’abana, baricwaga kubera indangamuntu zabo zavugaga ko ari Abatutsi, cyangwa kuko bari bafite ababyeyi b’Abatutsi”.

Ati “Guverinoma yakoresheje imbaraga ngo itsembe Abatutsi nk’uko mubizi kundusha, hishwe abarenga miliyoni. Abahanga muri ibi bikorwa, bavuga ko abicanyi bafite intwaro, benshi bafite imihoro n’ibindi, bakoze akazi kabo mu buryo bwihuse inshuro eshanu kurusha abakoreshaga uburyo bwa gazi bwakoreshejwe n’Abanazi. Bireba isi kumenya ko ubu bwicanyi atari impanuka.”

Perezida wa Leta Zunze Ubumwe z’Amerika Barack Obama

Hari mu gihe cyo kwibuka ku nshuro ya 18 Jenoside yakorewe Abatutsi mu 1994, ubwo Perezida Obama yagize ati “Hishwe ababyeyi, abagabo, abana bato na bashiki babo, biracyatubabaza, kandi byibutsa ibihugu by’isi inshingano dusangiye zo gukora ibishoboka byose tukarinda abasivile, tukamenya neza ko ikibi cyo mu rwego nka ruriya kitazongeara kubaho ukundi”.

Arakomeza ati “Leta Zunze Ubumwe z’Amerika zifatanyije n’Abanyarwanda mu kwibuka abambuwe ubuzima mu gihe gito. Kandi turabikora tunemera itearambere u Rwanda rugezeho nyuma ya Jenoside, hafashwe ingamba zo guteza imbere ubuzima bw’Abanyarwanda”.

Mu kwibuka ku nshuro ya 21, bwo Perezida Obama yagize ati “Uyu ni umunsi wo kwibuka abambuwe ubuzima bwabo, guha agaciro abagize ubushake bwo guhara ubuzima bwabo ngo bakize ubw’abandi, no kwifatanya mu kababaro n’Abanyarwanda. Ni umunsi kandi twongeye kwemeza ibyo abantu bose basaba ko twahagurukira kurwanya ubwicanyi nka buriya no gukomeza gukora ibishoboka byose ngo intero ibe imwe ko bitazongera ukundi. Kandi tuzakomeza gukora ibyo twiyemeje kugira ngo abakoze Jenoside mu gihugu cyiza nka kiriya bashyikirizwe ubutabera”.

Umunyamabanga Mukuru w’Umuryango w’Abibumbye, Ban Ki-Moon

Hari mu gihe cyo kwibuka ku nshuro ya 18 Jenoside yakorewe Abatutsi mu 1994 ubwo Ki-Moon yagira ati “U Rwanda rurimo gutera imbere mu kubaka umuryango w’amahoro n’ubutabera. Umuryango Mpuzamahanga wiyemeje ko ibyabaye bitazasubira ukundi […] Kurwanya Jenoside ni inshingano dufatanyije. Reka dukomeze dukorere hamwe tumenye neza ko ejo hazaza hatazongera kuba Jenoside. Iyi izaba ari inzira nziza yo kwibuka ababuze ubuzima bwabo twibuka hashize imyaka 18…”

Naho kwibuka ku nshuro ya 20, Ki-Moon yagize ati “Twashobora gukora byinshi birenzeho. Twagombaga kugira icyo dukora. Mu Rwanda, ingabo zasubijwe inyuma igihe zari zikenewe cyane”

Tony Blair wahoze ari Minisitiri w’Intebe w’u Bwongereza

Hari kwibuka ku nshuro ya 20 Jenoside yakorewe Abatutsi mu 1994, ubwo Blair yagiraga ati “Guverinoma y’u Rwanda yahuye no kunengwa kuri gahunda zimwe na zimwe yahisemo. Nk’urugero, uburyo bwa Gacaca bwashyizweho hagamijwe gucira imanza abakekwaho Jenoside. Yarwanyijwe ko itujuje ibipimo mpuzamahanga. Ariko mu bushobozi buke, abantu bagera kuri miliyoni ebyiri banyuze mu butabera, kandi bwari bukenewe ngo abantu bakire ibikomere”.

Kandi ati “Gacaca ni cyo gisubizo cyashobokaga mu butabera igihugu cyari gikeneye cyane. Kandi abaturage bari bazikeneye. Abanyarwanda bakomeje kuzamuka mu bumwe. Hari ugukunda igihugu mu rwego rwo hejuru, kandi bizera Guverinoma.

Hafi icyenda mu icumi bavuga ko bizeye ubuyobozi bw’igihugu cyabo. Nta bwo bashobora kwibagirwa ibyabaye, ariko kandi ntibashaka kurangwa nabyo. Abakuru bazi neza cyane igiciro cyo kuba nta cyo bakoze, ariko benshi mu baturage, abavutse nyuma ya Jenoside, bavutse hari icyerekezo gitandukanye n’aba mbere yabo.”

 

Comments

Who are you?
Your post
  • To create paragraphs, just leave blank lines.

 
 
Amahano 9 Leta Zunze Ubumwe za Amerika yakoze ntisabe imbabazi
Amahano 9 Leta Zunze Ubumwe za Amerika yakoze ntisabe imbabazi

Uyu munsi, Barack Obama yabaye Perezida wa Mbere wa USA usuye umujyi wa Hiroshima aharashwe igisasu cya kirimbuzi kigahitana abasaga 150 000. Ntiyigeze asaba imbabazi abagezweho n’ingaruka z’icyo (...)

Ibitaro bya Shyira byabaye mpuzamahanga ku ngoma y’Umwami Rudahigwa
Ibitaro bya Shyira byabaye mpuzamahanga ku ngoma y’Umwami Rudahigwa

Ibitaro bya Shyira biherereye mu Murenge wa Shyira Akarere ka Nyabihu mu Ntara y’Iburengerazuba ni bimwe mu bitaro byashinzwe mu Rwanda bwa mbere ahagana mu mwaka 1930 bigera aho kuvura abarwayi (...)

Ibyangizwa n’impanuka z’abanyamahanga mu Rwanda bishobora kwishyurwa
Ibyangizwa n’impanuka z’abanyamahanga mu Rwanda bishobora kwishyurwa

Ubuyobozi bw’Ibiro bya Umuryango w’Ubucuruzi bw’Afurika y’Iburasirazuba n’Amajyepfo (COMESA) mu Rwanda (Bureau National) burasaba Abanyarwanda kwirinda akarengane kavuka mu gihe bagezweho n’ingaruka (...)

Abarokotse Jenoside b’i Nyarugenge ntibazibagirwa ubugome bw’umupfumu ‘Setiba’
Abarokotse Jenoside b’i Nyarugenge ntibazibagirwa ubugome bw’umupfumu ‘Setiba’

Mu buhamya bw’abari batuye ku karere ka Nyarugenge mu gihe cya Jenoside yakorewe Abatutsi mu 1994, bavuga ko batazibagirwa umugabo witwa Setiba waje mu mujyi wa Kigali ari umupagasi aturutse mu (...)

Amateka y’umusozi wa Mwurire wiciweho Abatutsi 26 000 muri Jenoside
Amateka y’umusozi wa Mwurire wiciweho Abatutsi 26 000 muri Jenoside

Umusozi wa Mwurire uri mu murenge wa Mwurire mu karere ka Rwamagana, waguyeho abatusti barenga ibihumbi 26, nyuma yo kwirwanaho mu gihe kigera ku cyumweru. Bamwe mu barokokeye i Mwurire bemeza (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.