2017-11-17 14:59:33 clouds 27o High | Kigali Rwanda

Dukurikire:
 
 

Ibyangizwa n’impanuka z’abanyamahanga mu Rwanda bishobora kwishyurwa

Yanditswe na IMVAHO NSHYA

Kuya 2016-05-03 18:57:11

 
Share on:
 
Yasuwe:24
 
Yavuzweho:200
 
10
 
10

Ubuyobozi bw’Ibiro bya Umuryango w’Ubucuruzi bw’Afurika y’Iburasirazuba n’Amajyepfo (COMESA) mu Rwanda (Bureau National) burasaba Abanyarwanda kwirinda akarengane kavuka mu gihe bagezweho n’ingaruka z’impanuka n’abanyamahanga baje mu Rwanda baturutse mu bihugu bigize uyu muryango.

Umuyobozi wa ’Bureau National’ mu Rwanda Niyokwizerwa Elie, yasabye abaturage gufunguka bakamenya ko hari impanuka zikorwa n’abaturutse mu bihugu bya COMESA zishyurirwa ku byo zangijwe na Sosiyete z’Ubwishingizi zikorana n’Ubwishingizi bw’uyu muryango ‘Yellow Card’.

Mu kiganiro yagiranye n’itangazamakuru, Niyokwizerwa yagaragaje ko ubu bwishingizi ari inyongera y’ubusanzwe butangwa n’ibigo by’ubwishingizi muri buri gihugu, ariko bukaba bwishyurira umunyamahanga ukoreye impanuka mu gihugu kitari icye.

Yasobanuye ko hari umurongo ntarengwa; iyo impanuka yangije ibiri munsi y’amadolari ya Amerika ibihumbi 15, angana n’asaga miliyoni 11 z’amafaranga y’u Rwanda, sosiyete zikorana n’ubu bwishingizi mu gihugu cyabereyemo impanuka zishyura ako kanya.

Iyo amafaranga arenze ibihumbi 15 by’amadolari ngo hitabazwa ubundi buryo bwo gukusanya aya mafaranga masosiyete y’ubwishingizi. Yagaragaje ko hari Abanyarwanda barengana kuko batarasobanukirwa uko bikorwa.

JPEG - 113.4 kb
Abanyarwanda basabwe kutarangara bakarenganywa ku burenganzira ku kwishyurwa byangijwe n’impanuka za bamwe mu banyamahanga

Ati “Amakamyo menshi yo muri Tanzania anyura hano mu Rwanda wenda agiye muri Congo, i Burundi yewe n’iz’Abanyarwanda zitwara icyayi na zo zikenera ubu bwishingizi. Nk’iyo igonze umuntu nka hariya Nyabugogo uwo muntu niba apfuye cyanga amugaye ni ngombwa ko akwiriye kujya kuri Bureau National agatanga ikibazo bakamwishyura ariko ushobora gusanga atabizi. Icyo gihe umuryango we ushobora guhomba, mu gihe na sosiyete ikorana na COMESA itamenye ibya ya mpanuka.”

Yakomeje agira ati “Nk’imodoka yo muri Kenya ishobora kuza mu Rwanda ikagonga inzu yawe ikagenda rimwe na rimwe ikaba yaburirwa irengero. Uwo muturage ashobora kutamenya y’uko ashobora kujya kuri Bureau National ngo yongere imwubakire ya nzu ye.”

Indi mbogamizi ni uko ibihugu bya COMESA bitarumva kimwe agaciro k’ubu bwishingizi bwashyiriweho koroshywa ubuhahirane bw’ibihugu by’ibinyamuryango bwemejwe guhera mu mwaka wa 1987 i Lusaka muri Zambia.

Ubu bwishingizi ngo bufatwa n’umuntu wese ushaka kujya mu kindi gihugu nk’ubwishingizi bw’ikinyabiziga bw’inyongera ku bwo yari asanganywe mu gihugu cye.

Bivugwa kandi ko n’umunyumahanga aramutse agize impanuka ahabwa nk’ibyo Umunyarwanda yahabwa mu gihe yaba afite ubwo bwishingizi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE