2017-07-28 06:05:39 clouds 27o High | Kigali Rwanda

Dukurikire:
 
 

Braddock yashyize ku mugaragaro igitabo kivuga ku butwari bw’Inkotanyi

Yanditswe na IMVAHO NSHYA

Kuya 2017-07-08 06:35:00

 
Share on:
 
Yasuwe:177
 
Yavuzweho:200
 
10
 
10

Igitabo “UBUTWARI, Kwibohora ingaruka z’ibihe by‘amage mu Rwanda 1894-1994, cyanditswe na NSHUTIYIMANA Abraham Braddock Le sage (RWAGASANI), kigaruka ku mateka y‘ u Rwanda rwo hambere kigashimangira ubutwari bw’ingabo za FPR Inkotanyi zarokoye abanyarwanda.

Abenshi biganjemo urubyiruko, bari bitabiriye umuhango wo kumurika icyo gitabo, baganiriye n‘Umwanditsi abasobanurira muri make ibigikubiyemo.

Nshutiyimana yavuze ko yanditse kuri amwe mu amateka yo hambere kuva mu mwaka wa 1894 ku Ngoma y’Umwami KIGELI IV Rwabugili, ahatangiriye umwiryane wo kurwanira ingoma, byateye intambara benshi bita iyo ku Rucunshu.

Yerekanye ko iyo ntambara yorohereje Abadage kwinjira mu miyoborere y’u Rwanda mu 1899, maze Ababiligi bari muri Kongo-Mbiligi, bakaza kwirukana Abadage mu Rwanda bakoresheje intambara, bagafata Umujyi wa Kigali ku ya 06/05/1916.

Abo Babiligi nibo batangije inyigisho zacengeje mu Banyarwanda irondabwoko rishingiye ku nkomoko, imiterere y’umubiri n’imyumvire inyuranye ya buri bwoko Tutsi-Hutu-Twa; bagamije gutanya Abanyarwanda ngo babone uko babategeka.

Umwanditsi yerekana neza ko mu byukuri, hakurikijwe ibimenyetso byashingiweho n’abahimbye ibyerekeye ubwoko, asanga ko biramutse birebweho, Abanyarwanda basanga bose bakwiye guhurira ku gihugu basangiye, kuko nta mwihariko w’ubwoko runaka ugaragara.

Muri iki gitabo herekanywe ko igihe u Rwanda rwari rumaze guhabwa ubwigenge ku ya 01/ Nyakanga/1962, rwayobowe n’ibitekerezo bwa gikoroni. Abategetsi bakoresheje iturufu y’ubwoko, bimakaza imiyoborere yakomeje umuco mubi w‘ivangura, akarengane gashingiye ku bwoko, guhezwa hanze kw’impunzi, ubwicanyi bwibasiye abatutsi (1973), kwimwa akazi, no kutemererwa kwiga kw’Abatutsi.

Uruhare rw’imiyoborere mibi Abanyanyarwanda bakomoye ku Bakoroni, igatuma imibanire y’Abanyarwanda irushaho kuba mibi, hati y’umwaka wa 1959 kugeza 1994, ubwo hahagarikwaha Jenoside yakorewe Abatutsi.

Nshuyimana yerekanye impamvu zikomeye zatumye hatekerezwa kwibohora kw’Ababanyarwanda. Yerekanye ko mu Rwanda hari imiyoborere mibi itaratumaga Abanyarwanda babana neza, ahubwo ikabaryanisha.

Ibyo byatumye mu mwaka wa 1979, hashingwa umuryango RANU (Rwanda Alliance for National Unity) yaje kuvamo Umuryango FPR-Inkotanyi mu nama rusange yabaye hagati ya 25-29 Ukuboza1987. Umwanditsi yasobanuye ibyerekeye ishyirwaho ry’umutwe w’ingabo za RPA (Rwanda Patriotic Army), wagomba kurwna igihe bibaye ngombwa, ariko Abanyarwanda bakabohorwa ku ngoyi y’imiyoborere mibi.

Herekanye kandi ibice byagize urugamba rwo kwibohora kuva mu 1990 kugeza mu 1994. Umwanditsi yasobanuye ubutwari bukomeye Ingabo z’inkotanyi zagize mu nyuma y’imyaka irenga 100 ruri mu mage akomeye.

Mu kiganiro n’ Imvaho Nshya umwanditsi Braddock yagize ati : “ Iki gitabo nagaragajemo ko urugamba rwo kwibohora rutari rugamije gutsinda intambara y‘amasasu gusa, ahubwo ko icyari kigenderewe kwari kuzamura ubukungu, imibereho myiza, kwimakaza ubutabera n’imiyoborere myiza.,, akomeza avuga ko urwo rugamba rugikomeje, aho buri munyarwanda agomba gukora uko ashoboye agakomeza urugamba kuko rugikomeje.

Braddock yakomeje avuga ko ubu nk’urubyiruko rufite amahirwe menshi kuruta ayo Inkotanyi zari zifite aho yagize ati : “ Ubu dufite igihugu, ubuyobozi bwiza, amashuri, amavuriro, umutungo w’igihugu n’ibindi, ntidukwiye gusubira inyuma, ahubwo dukomeze kurwana no gukomeza kujya imbere.„

Uyu mwanditsi yasoje yerekana ko u Rwanda ari igihugu cyacunguwe n’amaraso y’intwari nyinshi bityo ko abanyarwanda bakwiye gukora cyane kugira ngo basigasire ibyagezweho, yashimye cyane ubuyobozi burangajwe imbere na Nyakubahwa Perezida wa Repubulika KAGAME Paul, kuko yazahuye U Rwanda akaruha icyerekezo cyiza cyane cyane akaba yarahaye urubyiruko icyizere.

Umwanditsi NSHUTIYIMANA Abraham Braddock Le sage (RWAGASANI), yavutse mu mwaka wa 1986, ari mu nzego z’urubyiruko mu Karere ka Gasabo ubusanzwe ni umwanditsi, umusizi, umushabitsi ndetse anacuranga bimwe mu byuma bya muzika.

Avuga ko afite indi mishinga itandukanye yerekeranye no kwandika ibitabo, aho yifuza gushyira iki gitabo mu ndimi z’amahanga kugirango n’amahanga arusheho gusobanukirwa byinshu ku mateka y’u Rwanda, nyuma arategura kandi kwandika ibindi bitabo bigera kuri bitanu, arashishikariza abakiri bato kwitabira kwandika cyane ku mateka y’u Rwanda.
Gisubizo Gentil M.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE