2017-06-24 09:49:51 clouds 27o High | Kigali Rwanda

Dukurikire:
 
 

Amateka y’umusozi wa Buhanga ya Musanze uriho igiti cy’amayobera

Yanditswe na IMVAHO NSHYA

Kuya 2017-03-23 13:16:26

 
Share on:
 
Yasuwe:1050
 
Yavuzweho:200
 
10
 
10

Umusozi wa Buhanga wagizwe pariki yitwa Buhanga Eco Park uherereye mu Murenge wa Nkotsi, Akarere ka Musanze, ni igice cya Pariki y’Ibirunga kiri ku musozi abami bakoreragaho imigenzo itandukanye mbere yo kwimikwa akaba ari na ho bimikirwaga.

Iyo uganiriye n’abaturiye uyu musozi bavuga ko ufite amateka menshi wihariye harimo kuba ufite ibiti by’amayobera, kuba urimo ubuvumo n’ibindi bitandukanye.

Igiti cy’amayobera

Kuri uyu musozi habonekaho igiti cy’amayobera, Igiti cy’inyabutatu. Ni igiti kirimo ibiti by’ubwoko butatu aribwo igihondohondo, umuvumu n’umusando kikaba cyaratewe nk’ikigabiro cy’urugo rw’umwami Gihanga.

Ni ibiti bitatu bifatanye byameze byegeranye, bikura buri kumwe, kimwe kigenda cyisobeka mu kindi. Bimeze nk’ibifatanye kubitandukanye ntibiba byoroshye.
Bamwe mu basaza n’abarinda iyi pariki bavuga ko kuba iki giti kirimo ubwoko butatu bw’ibiti bwibumbiye hamwe, ngo bwari buhagarariye rubanda rw’inyabutatau umwami yayoboraga.

Uyu musozi wa Buhanga iki giti giteyeho ari na ho iyi pariki iherereye ni ho abami bakorerwaga imihango ibimika ku ngoma.

Hategekimana Joseph umusaza w’imyaka 67, urinda iyi pariki akaba anavuka muri aka gace yaganiriye n’Imvaho Nshya asobanura amateka ya kiriya giti. Avuga ko iki giti cyari inyabutatau yagaragazaga ko umwami atari uw’ubwoko bumwe ahubwo yayoboraga Abanyarwanda bibumbiye hamwe.

Ati « Iki giti ni kimwe ariko kirimo ubwoko butatu bw’ibiti aribyo igihondohondo, umuvumu, umusando ni inyabutatu y’Abanyarwanda y’i Buhanga kwa Gihanga. Abanyarwanda bari bibumbiye hamwe nta tandukanyirizo bakora bimwe basangira bimwe bihurije hamwe nta kintu kibatandukanya. Iki giti kiri iruhande rw’aho umwami yiyuhagiriraga Abanyarwanda bamutegereje. Nta mwami wayoboraga ubwoko yayoboraga Abanyarwanda muri rusange, iki giti ni cyo gishatse kuvuga ».

Iki giti gifite imiziririzo

Uyu musaza avuga ko iki giti kidakorwaho kuko gifite imiziririzo, avuga ko hari uwabirenze aragitema birangira kimuhitanye arapfa.

Ati: « Iki giti ni cyo giti mwumva cya Buhanga gifite imiziririzo cyari ikigabiro cy’umwami. Mu mwaka 1977 haje umugabo azana ishoka n’umuhoro abaturage baramubaza bati iyo shoka n’umuhoro ubijyanye he ko tubona uri kwerekeza mu bigabiro bya Gihanga, ati nabonye igiti cyiza ngiye kugitema nkibazishemo umuvure. »

Akomeza agira ati « uwo mugabo yaraje atema ishami cyo hagati rigwa hasi azana abafundi babazamo imivure, barayibaza iranoga iba myiza cyane, hanyuma bajya kuzana abikorezi baraza abishyira ku biti bigenzi byabyo by’imikuro ngo babone uko babyikorera, bakibigeza ku rutugu biramenagurika, birasaduka bisubira hasi.”
Hategekimana avuga ko abo bagabo bahise bataha basubira kuri wa mugabo wabatumye ni uko abaha inzoga, baranywa barangije bamubwira uko byabagendekeye ndetse banamubuza kuzasubira mu bigabiro bya Gihanga, nyuma y’amasaha make wa mugabo ahita apfa .

Ati: « Bakimara kugera iwabo imuhira yarazamutse yikoza mu kirere aragaruka yikubita hasi , byabaye ndi kureba n’amaso. Noneho atera amaguru arayatera umugore we agira ubwoba abwira abana ati mwihute mujye kubwira ba bantu bari bari kunywa inzoga hano ko so wanyu apfuye, ni uko baragaruka baraterura bajyana ku bitaro by’ i Nyakinama bamugejeje mu ngobyi umwuka uba urarangiye arapfa. »
Abiru barize nk’abana

Ubwo iki giti cyatemwaga Abiru b’i bwami ngo baje kumenya ko igiti cy’umwami cyangijwe baza kureba birababaza cyane bakimara kubibona bararira.

Hategekimana ati « imivure ikimara kugwa hasi ikameneka Abiru b’i bwami bari bashaje kuko igihe cy’abami cyari cyararangiye bari bakiriho bazi amateka y’ibyo bigabano by’umwami, harimo uwo bita Komayombi, Semahumba na Nyamuhindura baraza n’utubando bageze hano barebye ukuntu icyo giti cyatemwe ukuntu cyabaye bararira amarira arisuka nk’abana. Bahise bajya kwa wa muntu watemye igiti barabasobanurira ba bandi bari baje kwikorera umuvure ni uko babaha amasubyo barabagangahura kugira ngo badahumana cyangwa bagapfa, buracya wa mugabo baramushyingura.”

Hategekimana avuga ko kuva ubwo iki giti kidakorwaho ati « Kuva icyo gihe iki giti n’iyo cyumye, murabona ko hejuru amashami yuma n’iyo yituye hasi nta muntu ushobora kuyatora ngo ajye kuyacana, ntibishoboka kubera ibyo bintu byahabereye n’abaturage barabizi amateka yacyo barayazi barayubahiriza cyane.”

Iriba ryarigishije Burugumesitiri

Ubuyobozi bw’Ikigo cy’Igihugu cy’Iterambere (RDB) ishami ry’ubukerarugendo buvuga ko aha hantu hasurwa n’abantu gusa umubare atari mwinshi nk’abasura Pariki y’Ibirunga ariko abenshi baba bajyanywe n’ibintu bitandukanye hariho amateka, urusobe rw’ibinyabuzima bitandukanye birimo inyoni, injangwe n’ibindi, harimo n’ibijyanye n’iruka ry’ibirunga.

Ubu buyobozi bunavuga ko iriba riherereye muri iyi pariki na ryo rikurura abatari bake bitewe n’amateka abahatuye, banahazi babwira ba mukerarugendo.
Iyo uganiriye n’abaturage batandukanye baturiye aka gace n’abarinzi baharinda bakubwira ko iri riba ari ryo bavomagamo amazi umwami yogaga akabona kwima ingoma. Barayavomaga bakayavanga n’imitsindo akayoga, ari na wo muhango wa nyuma yakorerwaga agahita yimikwa.

Iri riba rya Gihanga ryavomwagamo aya mazi ni kimwe mu bigize iyi pariki. Rivugwaho kurigitisha Burugumesitiri burundu nyuma yo kurivogera ndetse no kurigirira nabi ashaka ko rikama.

Hategikamana Joseph agira byinshi atangaza kuri iri riba n’amateka atandukanye yihariye ribitse.

Avuga ko mu mwaka wa 1988, Burugumesitiri Nkikabahizi Donath yaje kuyobora icyari Komini Nyakinama ubu ni mu karere ka Musanze aho iriba riherereye mu murenge wa Nkotsi, gusa yarigishijwe n’iri riba kubera gukora ibyo ritagenewe.

Ati « Nkikabahizi wari Burugumesitiri yagize umushinga wo kuvugurura ibiro bya komine akajya avomesha amazi mu mugezi utemba wa Mukungwa ariko imodoka zagiye kuvoma zikagera ku biro bya komine mu magunguru amazi yashizemo kubera kumeneka kuko umuhanda wari mubi kubera amakoro, bigeze aho abwirwa n’abaturage ko hafi aho hari iriba rya Gihanga ryamufasha kubona amazi. Ubwo Burugumesitiri bakimubwira iryo riba yahise ababwira ati ese iryo riba ngo ry’amateka numvise rimeze rite?..Twaramuzanye turarimwereka, aratubwira ati mwa baturage mwe abayobozi babayoboye mbere ntacyo babamariye, tuti ese wowe ugiye kutumarira iki? Ati njye ikintu ngiye kubakorera ndabaha amazi meza, iri riba riveho mujyane n’ibigezweho muve mu migenzo. »

Hategekimana akomeza agira ati « Ubwo yahamagaje umuganda w’abaturage baza kuri ya mazi, ababwira ko yose bayakuramo ndebe aho isoko iri guturuka nshyireho amatiyo noneho mujye muvoma kuri robine, baramubwira bati ibyo bintu ugiye gukora iryo riba rya Gihanga n’ushaka ubireke, arabyanga ati iyo ni Gihanga yanyu njyewe amashuri nize anyemerera gukora ibyo nshaka.”

Uyu musaza avuga ko bamuretse nk’umuyobozi banga kumuvogera ariko ngo byarangiye amazi abananiye kuyakuramo ahubwo atungurwa no kubona akamye n’isoko irakama ibyo bashakaga batabigezeho.

Ati "Twaramuretse amazi tuyakuramo , dukoresha amabasi n’ibindi byitwaga amakarayi dukuramo tuyamena hirya no hino ariko amazi ntagabanuke. Akuramo abasore bari barimo ashyiramo abandi bakajya bajugunya hirya no hino ariko akaguma kungana uko yanganaga. Yahise avuga ngo muzane amapiki n’ibitiyo mukucure icyobo kinini hano ku ruhande cya metero ebyiri hanyuma mukate umuferege amazi amanukiremo turabikora, tugiye kugera ku isoko y’amazi arakama na cya cyobo nticyajyamo amazi, turayabura.”

Uyu musaza avuga ko abaturage bavomaga kuri iryo riba batangiye kubura amazi bakajya bafata ibivomesho birimo utubindi n’ibindi bakajya kuvoma kuri Mukungwa. Abaturage ngo bamaze icyumweru cyose bajya kuvoma aho kuri Mukungwa ariko nyuma y’iminsi 9 aragaruka iriba rirongera riruzura.

Ngo biriya Burugumasitiri yakoze byamuviriyemo ibyago aterwa n’inzoka ku biro ndetse we n’umuryango we baburirwa irengero.

Hategekimana ati « Muzi ko mbere ibiro bya komine byagiraga idarapo ryurizwaga mu gitondo nimugoroba bakaryururutsa. Bararyururukije mu gitondo bagiye kurizamura basanga inzoka nini ebyiri ziri ku giti cy’idarapo izindi ebyiri nini ziri ku muryango wa Burugumesitiri, ntabwo yinjiraga mu biro nta n’umupolisi wazamuraga idarapo, zahamaze iminsi irindwi yose ku munsi wa munani Burugumesitiri n’umugore we n’abana baburiwe irengero ntihagira umenya aho bagiye n’umuryango wabo urayoberwa kugeza n’ubu nta muntu uzi irengero ryabo.”

Se wa Hategekimana avuga ko se umubyara ariwe warindaga ririya riba yarabisabwe n’umwami Rudahigwa. Se ngo ku munsi wa cyenda yaraje asanga ryagarutse ryuzuye amazi menshi abaturage bongera kubona amazi.

Umuyobozi w’ishami ry’ubukerarugendo muri Pariki y’Ibirunga mu majyaruguru Uwingeli Licens Prosper aganira n’Imvaho Nshya yagize ibyo atangaza kuri pariki ya Buhanga ndetse n’uko isurwa.

Ati « kariya gace k’umusozi wa Buhanga ni pariki y’ibirunga dufite gahunda yo gukomeza kuhitaho kuko harasurwa n’ubwo umubare w’abahasura atari mwinshi ariko hari Abanyarwanda bajyayo hari n’abazungu bakunda kuhasura. Abakunda gusura parike ya Buhanga abenshi baba bajyanywe no kureba amateka ya bimwe mu bihaba birimo igiti cy’inyabutatu, iriba umwami yogeragaho n’ibindi bitandukanye biharanga bibakurura kandi bituma uhageze yifuza kuhagaruka, ikindi harimo urusobe rw’ibinyabuzima byinshi byihariye harimo inyoni, inkende n’ibindi kandi ni heza cyane. »
Akomeza ashishikariza Abanyarwanda kujya bagira umuco wo gusura ahantu nyaburanga hatandukanye mu rwego rwo kumenya amateka no kuba bayasobanurira abandi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE