Advertisement
 
 
 
 
 
 
 
 

Amateka | Abantu

Menya ibigwi by’Umwami Mohammed VI wasuye u Rwanda   

  Yanditswe na MUGABO LAMBERT
 1 month ago

 
 

U Rwanda rwasuwe n’Umwami Mohammed VI wa Morocco. Mohammed VI wavutse ku wa 21 Kanama 1963 i Rabbat muri Morocco, asuye u Rwanda nyuma y’uko Perezida Paul Kagame na we aherutse gusura kiriya gihugu.

Uyu Mohammed yabaye umwami ku wa 23 Nyakanga 1999 nyuma yo gutanga kwa se umubyara, Hassan II.

Mohammed VI ni umwana wa kabiri akaba ari na we muhungu mukuru wa Hassan II n’umugore we wa kabiri Lalla Latifa Hammou.



Akimara kuvuka, Mohammed yahise afatwa nk’uzasimbura se, maze yambikwa ikamba ry’ubukomangoma. Se umubyara, yamwitayeho mu burezi bw’idini na politiki akiri muto, afite imyaka ine yatangiye kwiga mu ishuri ryigisha ibya Korowani ibwami.

Mohammed yarangije amashuri ye abanza n’ayisumbuye mu ishuri ry’ubwami ayasoza mu 1981 mbere yo kubona impamyabumenyi ihanitse ya kaminuza mu mategeko muri kaminuza ya “Mohammed V University” mu 1985.

Mohammed yaje kugirwa perezida wa “Pan Arab Games” ari yo mikino ihuza ibihugu by’Abarabu, anahabwa imirimo mu gisirikare ku wa 26 Ugushyingo 1985. Yakoze nk’umuhuzabikorwa mu biro na serivise mu ngabo z’Ubwami kugeza mu 1994.

Mu 1987, Mohammed yabonye impamyabushobozi ye ya mbere y’amashuri makuru mu bumenyi bwa politiki, naho muri Nyakanga 1988 abona impamyabumenyi mu mategeko.

Mu Gushyingo 1988, yahuguwe i Buruseli na Jacques Delors waje kuba Perezida wa Komisiyo y’Ibihugu by’Ubumwe bw’u Burayi.

Mohammed yabonye impamyabumenyi y’ikirenga, PhD, afite amanota yo mu rwego rwo hejuru (distinction) ku wa 29 Ukwakira 1993, ayikuye muri kaminuza ya Nice Sophia Antipolis mu Bufaransa.

Ku wa 12 Nyakanga 1994, yazamuwe mu ntera mu gisirikare, maze ahabwa ipeti rya Major General, kandi muri uwo mwaka yabaye Perezida w’Urwego rukuru rushinzwe umuco, n’Umugaba Mukuru w’Ingabo z’Ubwami bwa Morocco. Mohammed VI avuga indimi enye, Icyarabu, Icyongereza, Igifaransa n’Igisipanyolo (Spanish).

Amavugurura mu mibereho myiza n’uburenganzira

Nyuma y’igihe gito yambitswe ikamba ry’ubwami, Mohammed VI yagejeje ijambo ku baturage be arinyujije kuri televiziyo, abasezeranya kurandura ubukene na ruswa, guhanga imirimo kandi akazanateza imbere uburenganzira bw’abaturage.

Impinduka yazanye ntizashimishije abahezanguni bo mu idini ya Isilamu, dore ko muri Gashyantare 2004 yashyizeho itegeko rishya ry’umuryango “Mudawana” riha abagore imbaraga.

Mohammed VI kandi yashyizeho Komisiyo y’Uburinganire n’Ubwiyunge (IER) ikaba yari ifite inshingano zo gukora ubushakashatsi ku ihohoterwa ry’uburenganzira bwa muntu mu gihe cy’ubuyobozi bwa Hassan II.

Iyi ntambwe yakiriwe neza na bamwe mu baharanira iterambere rya Demukarasi, ariko kandi binengwa n’abandi kubera ko raporo ku ihohotera ry’uburenganzira bwa muntu itashoboraga kugaragaza amazina y’ababikoze.

Mu ijambo yatanze ku wa 9 Werurwe 2011, Umwami Mohammed VI yavuze ko Inteko Ishinga Amategeko igomba kugira imbaraga nshya, kandi ubucamanza bwahawe ubwigenge mu gihe cye, hashyirwaho komite yo kugena imbanzirizamushinga y’Itegeko Nshinga muri Kamena 2011. Ku wa 1 Nyakanga 2011, abaturage batoye impinduka muri politiki zifujwe n’Umwami Mohammed.

Impinduka zabayeho mu buyobozi bwa Mohammed VI

Izi mpinduka zibanze ku rurimi rwa Berber, ururimi rukoreshwa muri iki gihugu hamwe n’Icyarabu, harimo kandi ko umwami ubu afite uburenganzira bwo gushyiraho Minisitiri w’Intebe avuye mu ishyaka ryatsinze amatora rikagira imyanya myinshi mu Nteko Ishinga Amategeko, mu gihe mbere Umwami yashobora gushyiraho uwo yishakiye.

Imyanya yo mu rwego rwo hejuru nka ba Ambasaderi, abayobozi b’ibigo, abayobozi b’intara n’uturere, ubu bashyirwaho na Minisitiri w’Intebe binyuze mu nama iba iyobowe n’Umwami, mu gihe mbere umwami ari we wabaga afite izo nshingano n’ubushobozi.

Ubu, Minisitiri w’Intebe muri Morocco ni we muyobozi wa Guverinoma, akaba na perezida w’inama ya Guverinoma, afite ububasha bwo gusesa Inteko ishinga amategeko. Minisitiri w’Intebe ayobora inama ya Guverinoma iba ifite ububasha bwo gutegura gahunda zose z’igihugu. Ibi, mbere byakorwaga n’umwami.

Kuri ubu kandi, mu gihe cy’ubuyobozi bwa Mohammed VI, inteko ishinga amategeko yahawe uburenganzira bwo gutanga imbabazi, mu gihe mbere ibi byakorwaga n’umwami. Urwego rw’ubucamanza rwahawe ubwigenge n’umwami.

Abagore bahawe uburenganzira mu bijyanye n’imirimo n’imibereho myiza, bareshya n’abagabo muri byose. Kureshya muri politiki ni byo byashyizweho mbere, mu Itegeko Nshinga ryo mu 1996 ryavugaga ko abaturage bose bareshya, bafite uburenganzira bumwe imbere y’amategeko.

Gusa, Umwami yakomeje kugira ubugenzuzi bw’ingabo ndetse n’urwego rw’ubucamanza n’ibirebana n’idini ndetse na gahunda z’ububanyi n’amahanga.

Umwami kandi yahamanye ubushobozi bwo gushyiraho no gukuraho Minisitiri w’Intebe. Ikindi ni uko kuri ubu mu bwami bwa Mohammed VI abaturage bose bafite ubureganzira bwo gutanga ibitekerezo, guhanga n’ibindi. Gusa, gusebya no kwigomeka ku mwami biracyari icyaha gihanishwa igifungo.

Mohammed VI afite imyaka 53 y’amavuko, yashakanye na Salma Bennan ku wa 21 Werurwe 2002, bafitanye abana babiri, ari bo igikomangoma Moulay Hassan (wambitswe ikamba) wavutse ku wa 8 Gicurasi 2003, n’igikomangoma (Princess) Lalla Khadija.

Mohamed VI afite abandimwe bane, ibikomangoma Moulay Rachid, Lalla Meryem, alla Asma na Lalla Hasna. Buri tariki 21 Kanama uba ari umunsi w’ikiruhuko muri Morocco kuko ari bwo Mohammed VI yavutseho.

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Menya ibigwi by’Umwami Mohammed VI wasuye u Rwanda
Menya ibigwi by’Umwami Mohammed VI wasuye u Rwanda

U Rwanda rwasuwe n’Umwami Mohammed VI wa Morocco. Mohammed VI wavutse ku wa 21 Kanama 1963 i Rabbat muri Morocco, asuye u Rwanda nyuma y’uko Perezida Paul Kagame na we aherutse gusura kiriya (...)

Amateka ya  Dusingizimana, umunyarwanda wa mbere wanditswe muri  “Guiness World  Record”
Amateka ya Dusingizimana, umunyarwanda wa mbere wanditswe muri “Guiness World Record”

Dusingizimana Eric Umunyarwanda wa mbere wanditswe mu gitabo cy’abaciye uduhigo "Guiness World Record" yaganiriye n’Imvaho Nshya ku buzima bwe bwa mbere na nyuma yo gukora amateka yo kumara (...)

Amagambo akomeye bamwe mu baperezida bavuze ajyanye n’umunsi wahariwe “Afurika”
Amagambo akomeye bamwe mu baperezida bavuze ajyanye n’umunsi wahariwe “Afurika”

Ku ya 25 Gicurasi 1963, abakuru b’ibihugu bya Afurika bashinze Umuryango w’Ubumwe bwa Afurika (OAU/OUA) ari nawo waje guhinduka AU ku ya 26 Gicurasi 2001. Kuri iyi itariki hizihizwa umunsi ibihugu (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.