Advertisement
 
 
 
 
 
 
 
 

Amateka | Abantu

Amateka ya Dusingizimana, umunyarwanda wa mbere wanditswe muri “Guiness World Record”   

  Yanditswe na BIZIMANA Eric
 30 May

 
 

Dusingizimana Eric Umunyarwanda wa mbere wanditswe mu gitabo cy’abaciye uduhigo "Guiness World Record" yaganiriye n’Imvaho Nshya ku buzima bwe bwa mbere na nyuma yo gukora amateka yo kumara amasaha 51 akina cricket ataruhuka.

Dusingizimana yatangiye gukina ku wa gatatu tariki 11 Gicurasi 2016 ageza ku wa gatanu tariki 13 Gicurasi 2016.

JPEG - 319.1 kb
Dusingizimana yamaze amasaha 51 akina Cricket (Foto Bugingo F)

Incamake y’amateka ye

Dusingizimana Eric w’imyaka 29 y’amavuko yabonye izuba taliki 21 Werurwe 1987 i Gikondo mu Karere ka Kicukiro mu mujyi wa Kigali.

Ni umwana wa gatandatu mu muryango w’abana 10 (abahungu 7 n’abakobwa 3) ba Mukagahunga Beatha na nyakwigendera Mushinzimana Martin.

Yize amashuri abanza kuri EP Mburabuturo akomereza muri Eto Kicukiro mu cyiciro rusange cy’amashuri yisumbuye no mu ishami ry’Imibare n’Ubugenge (Math-Physique).

Dusingizimana afite impamyabushobozi y’icyiciro cya mbere cya Kaminuza mu bwubatsi (Civil Engineering) yakuye muri IPRC Kigali, n’iy’ icyiciro cya kabiri cya Kaminuza muri Architecture yahawe na Nile Source Polytechnic of Applied Arts and Science y’ i Huye mu Majyepfo .

Yabaye umukozi mu bigo bitandukanye nka IPRC-South na Rwanda Stadium Cricket Foundation yagezemo muri Werurwe 2016. Dusingizimana agiye kumara umwaka umwe ashyingiranywe n’ Uwimana Sonia bakaba bari hafi kwakira umwana wawo w’imfura.

Gukunda imibare byatumye yiyemeza gukina Cricket

Dusingizimana waje kuba icyamamare ku isi hose, ahamya ko yatangiye gukina Cricket mu 2006 ubwo yigaga muri Eto Kicukiro abitewe no gukunda imibare.

Ati "Ntangira umukino muri 2006 nigaga imibare n’ubugenge (Physique), ndi wa munyeshuri ukunda imibare cyane cyane “Geometrie”. Nabonaga uburyo umuntu atera agapira wa wundi ukubita (batman) akagakubita, kakidunda, nyuma kakazamukira ku mfuruka (angle) na dogere (degree) runaka, bituma numva mbikunze. Njyeze no mu bwubatsi nabonye na byo bifite aho bihuriye na Cricket kuko hari ibibuga dukiniraho bya Tapis, ibitsindagiye cyane n’ibindi."

JPEG - 335.5 kb
Byari ibyishimo bikomeye ku Banyarwanda bose (Foto Bugingo F)

Yakomeje agira ati "Nagize amahirwe Ishyirahamwe ry’umukino wa Cricket batwoherereza abatoza. Njye uwanyigishije bwa mbere yitwa Emmanuel Byiringiro, aranzamura birangira ngeze mu ikipe ndi umusimbura birakomeza ngera ku kuba nomero imwe wa wundi utangirira abandi, nanatangira guhamagarwa mu ikipe y’igihugu muri 2008". Dusingizimana ni kapiteni w’ikipe y’igihugu ya Cricket kuva mu 2010.

Nyuma y’imyaka 10 Dusingizimana yiyemeje guca agahigo ku isi
Dusingizimana wari umaze imyaka 10 muri Cricket , atangaza ko kwiyemeza kumara amasaha 51 akina Cricket nta kuruhuka ryari ishyaka ryo kugira ngo abanyarwanda n’Isi yose bamenye ko mu Rwanda hari Cricket.

Impamvu ya kabiri yatumye ashaka guca agahigo ku isi, ni uko yifuzaga ko hakongerwa inkunga izafasha mu kubaka Sitade ya Cricket izubakwa i Gihanga; yatangijwe n’ikigega cy’Abongereza cya “Rwanda Cricket Stadium Foundation” aho buri wese yitanga uko yifite.

Impamvu ya gatatu Dusingizimana atanga ngo ni uko yarebye indi migabane agasanga hari uduhigo yesheje ku Isi asigara yibaza icyo we nk’umunyafurika cyangwa se umunyarwanda yakora, yiyemeza kujya muri Cricket kugira ngo yandikishe amateka ku isi nk’umunyarwanda.

Dusingizimana atangaza ko nyuma yo gufata icyemezo, yahise atangira imyitozo muri Mutarama 2016 yamufashije kugera kuri aka gahigo. Ati "Nageragezaga kumara amasaha umunani mu myitozo. Cyokora cyo sinumvaga ko namara amasaha 51 nitoza. Nibandaga ku byo nabonaga bishobora kuzagira ingaruka cyane cyane umugongo n’amaguru, hagakurikiraho gutegura umutwe kuko wo ubwawo wari ufite uruhare 70% mu byo nakoze, kugeza maze ariya masaha ntararuha".

Uwo yagezejejeho icyifuzo cye wese yaramusekaga

Dusingizimana avuga ko nta muntu n’umwe wigeze wemera ko azagera kuri aka gahigo kuko benshi bumvaga bidashoboka.

Aha aragira ati “Nagiye gushaka abaterankunga kugira ngo bazamfashe muri kiriya gikorwa, uwo nageragaho wese namubwiraga ko buzira bugacya ngikina agahita abivamo, ambwira ko ntazabishobora. Na Mama ntiyabyumvaga, ariko byarangiye ku munsi wa nyuma nawe ahageze.”
Dusingizimana ashimira yivuye inyuma Minisiteri y’umuco na siporo, umuterankunga wemeye bwa mbere kumushyigikira, imutiza Sitade yo gukoreramo agahigo ke, inamucanira amatara yo gukiniraho amanywa n’ijoro.

Dusigimizimana yagize ati “Abanyamakuru bo mu Rwanda ni bo batangiye kubyandika n’amaradiyo arabivuga, hanabaho kubyandika ku mbugankoranyambaga nka Twetter, birasakara benshi baza kureba niba nza kubigeraho, Radiyo zikomeza kubivuga”.

Yakomeje avuga ati “Kugira ngo umuntu yandikwe hagomba kuba hari Camera zizatanga CD yo guhamya ko byabayeho koko, njye nari naranaziteguriye ubwanjye”. Dusingizimana kandi yongeye ko n’Inama mpuzamahanga yabereye mu Rwanda yamufashije.

Ati “Biriya mbikora mu Rwanda hari inama mpuzamahanga ku iterambere ry’ubukungu (World Economic Forum), hari abanyamakuru mpuzamahanga ba za BBC, Aljazeera, RFI nabo baza kureba iyo nkuru iri kuvugwa ku mbuga nkoranyambaga”.

Aka gahigo icyo kazamumarira

JPEG - 206.3 kb
Akimara guca agahigo, Dusingizimana Eric yagaragaje ibyishimo kuko yari amaze guhesha ishema u Rwanda (Foto Bugingo).

Byaravuzwe cyane ko Dusingizimana azahabwa miliyoni y’amadolari. Yagize ati “Uhuum, ni ibihuha nanjye sinzi iyo byaturutse. Nta mafaranga batanga ni ishimwe rya Certificat bakakwandika mu gitabo . Ikibaho ni uko nka sosiyete runaka ishobora kukwitabaza ukajya uyamamaza”.

Yakomeje agira ati “Nk’ubu hari ibyapa ndiho mu Mujyi byamamaza inzoga ya Legend iriya ni kontaro y’amezi atatu nka Ambasaderi wabo ashobora kongerwa. Icyo byamariye ni uko nageze ku ntego nari natangiranye zo kumenyekanisha umukino mpereye mu Rwanda aho buri wese yamenye ko habaho Cricket no ku isi kuko n’uwo nakuyeho ku gahigo yewe n’abandi muri uyu mukino wa Cricket banyandikiye banshimira ku byo nagezeho”. Ikindi Dusingizimana yishimira ni uko yahesheje ishema igihugu ndetse n’amafaranga ya Sitade akaba yariyongeye.

Sitade ya Cricket y’i Gahanga iratangira kubakwa mu minsi mike

Dusingizimana nk’umwe mu bakozi bari mu bazubakisha iyi Sitade yemeje ko bitarenze muri Kamena 2016 , iyi Sitade ya Cricket izatangira kubakwa ku nkunga ya Leta y’u Rwanda yatanze ubutaka bwo kubakaho bungana na Hegitari 4 n’abaterankunga.

Kuri gahunda, iyi Sitade izuzura itwaye miliyoni 1.2 z’amadolari y’amerika asaga miliyoni 895 z’amafararanga y’u Rwanda, izubakwa mu byiciro uko ubushobozi buzajya buboneka, bahereye ku kibuga kizubakwa mu mezi atandatu, hakurikireho gushyiraho inyubako.

Ubuzima bw’abakinnyi ba Cricket bo mu Rwanda

Dusingizimana avuga ko abakinnyi bo mu makipe yo mu Rwanda nta mushahara babona. Kapiteni w’ikipe y’igihugu avuga ko abakinnyi b’abanyarwanda bafite imbogamizi zo kuba nta kibuga cyari gihari.

Ni mu gihe ikipe zose z’igihugu n’amakipe 14 agize shampiyona agomba kwitoreza akanakinira ku kibuga kimwe cya Kicukiro. Dusingizimana anavuga ko n’itangazamakuru ryo mu Rwanda ritaraha umwanya Cricket.

Andi mabanga y’ubuzima bwe

Mu buzima butari ubwa Cricket, Dusingizimana ni umufana ukomeye wa Rayon Sports na IPRC-South. Dusingizimana anavuga ko asigaye ari umufana woroheje wa Leicester, ikipe yatwaye igikombe cya shampiyona mu Bwongereza n’ubwo bidakuraho ko ari umufana wa Chelsea.

Amasaha menshi ayamara ku nyubako andi akayamara arimo gushushanya, yabirangiza akajya gukina Cricket cyangwa se akanitabira indi myitozo ngororamubiri irimo no koga.

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Menya ibigwi by’Umwami Mohammed VI wasuye u Rwanda
Menya ibigwi by’Umwami Mohammed VI wasuye u Rwanda

U Rwanda rwasuwe n’Umwami Mohammed VI wa Morocco. Mohammed VI wavutse ku wa 21 Kanama 1963 i Rabbat muri Morocco, asuye u Rwanda nyuma y’uko Perezida Paul Kagame na we aherutse gusura kiriya (...)

Amateka ya  Dusingizimana, umunyarwanda wa mbere wanditswe muri  “Guiness World  Record”
Amateka ya Dusingizimana, umunyarwanda wa mbere wanditswe muri “Guiness World Record”

Dusingizimana Eric Umunyarwanda wa mbere wanditswe mu gitabo cy’abaciye uduhigo "Guiness World Record" yaganiriye n’Imvaho Nshya ku buzima bwe bwa mbere na nyuma yo gukora amateka yo kumara (...)

Amagambo akomeye bamwe mu baperezida bavuze ajyanye n’umunsi wahariwe “Afurika”
Amagambo akomeye bamwe mu baperezida bavuze ajyanye n’umunsi wahariwe “Afurika”

Ku ya 25 Gicurasi 1963, abakuru b’ibihugu bya Afurika bashinze Umuryango w’Ubumwe bwa Afurika (OAU/OUA) ari nawo waje guhinduka AU ku ya 26 Gicurasi 2001. Kuri iyi itariki hizihizwa umunsi ibihugu (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.