Advertisement
 
 
 
 
 
 
 
 

Amakuru | Mu Rwanda

Ushinjwa kwiba Leta miliyoni 454 yasabiwe gufungwa iminsi 30   

  Yanditswe na RUBIBI OLIVIER
 May 2016

 
 

Ubushinjacyaha mu Rwanda bwasabiye Mwitende Ladislas umuyobozi wa Kompanyi ya Top Service Ltd, yari ishinzwe gutumiza ifumbire mu mahanga ikayishyikiriza abaturage bo mu majyaruguru, gufungwa iminsi 30.

Mwitende akurikiranweho ibyaha byo gucura no gukoresha inyandiko mpimbano agamije kwishyuza Minisiteri y’Ubuhinzi n’Ubworozi (MINAGRI)amafaranga y’Umurengera.

Mu rubanza ku ifunga n’ifungurwa rwabereye mu rukiko rwisumbuye rwa Gasabo ku mugoroba washize tariki 11 Gicurasi 2016, Mwitende yasabiwe igifungo cy’iminsi 30.

Umushinjacyaha yabwiye urukiko ko Mwitende yakoze ibikorwa byo kuzajya atumiza ifumbire mu mahanga akayigeza ku bahinzi mu ntara y’Amajyaruguru n’Uburengerazuba yamara guhabwa amafishe agaragaza abaturage bahawe ifumbire we agakora andi mafishi ndetse amwe namwe akongeramo abantu akabitirira ko yabahaye ifumbire nyamara bitarigeze bikorwa.

Umushinjacyaha yakomeje ko Minisiteri y’Ubuhinzi n’Ubworozi yaje gukengura imikorere ya Mwitende yohereza abantu bagomba gukurikirana iki cyibazo babona amafishi yabaga yarasigaye mu baturage atandukanye cyane n’amafishi Mwitende yajyaga agaragariza Minisiteri y’Ubuhinzi n’Ubworozi (MINAGRI).

Umushinjacyaha yatangarije Urukiko rwisumbuye rwa Gasabo ko ayo malisite Mwitende yakoze akayagenderaho akishyuza MINAGRI ari ibihumbi n’ibihumbi ariko bakaba barafashemo amalisite make nk’urugero (Sample). Yagize ati “ Guhimba amalisite ndetse no kongera amazina y’abantu Mwitende yavugaga ko yahaye ifumbire byakozwe ku malisite ibihumbi n’ibihumbi ariko twafashe make muri yo”.

Umushinjacyaha yabwiye urukiko ko Minisiteri y’Ubuhinzi n’Ubworozi yamaze kubona amakosa yandikira Mwitende imugaragariza ikibazo ndetse hashyirwaho n’itsinda rihuriweho n’impande zombi zo gukurikirana ikibazo. Minisiteri y’Ubuhinzi n’Ubworozi yahagaritse kwishyura Mwitende nk’uko ubushinjacyaha bwakomeje bubivuga ahanini bitewe n’ibikorwa byo guhimba inyandiko byari byamaze kugaragara mu malisite amwe n’amwe Mwitende yagenderagaho yishyuza MINAGRI.

Mwitende yagaragarije urukiko uburyo yishyuzaga MINAGRI ndetse anavuga ko nta hantu na hamwe yajyaga ahurira n’amalisite kuko yakorwaga n’abayobozi b’inzego z’ibanze ndetse na’bacuruzi bato bagezaga ifumbire ku bahinzi . Umuyobozi wa Top Service yabwiye urukiko ko atazi aho ayo malisite yavuye.

Mwitende yavuze ko iby’amalisite byabazwa abakozi ba MINAGRI, abayobozi b’inzego z’ibanze ndetse n’abacuruzi bato bagezaga ifumbire ku baturage.

Umwunganizi wa Mwitende Shema Gakuba Charles yabwiye urukiko ko umukiliya we arengana kuko ku nyandiko akurikiranweho nta hantu na hamwe hagaragara umukono wa Mwitende ndetse ibi ngo bakaba barabigaragarije ubushinjacyaha ubwo Mwitende yabazwagwa n’Ubushinjacyaha.

Me. Shema yavuze ko ubushinjacyaha bwagaragariza urukiko uburyo Mwitende yishyuzaga MINAGRI agendeye ku malisite mu gihe fagitire yagezaga kuri MINAGRI nta malisite ari ku mugereka ngo MINAGRI imwishyure igendeye kuri ayo malisite.

Me. Shema yasabye ko Mwitende yafungurwa kuko hatagaragara impamvu afunze ndetse Mwitende ngo akaba nta mugambi afite wo gutoroka ubutabera kuko ari umugabo wubatse kandi akaba afite imitungo myinshi ku buryo adashobora kuyirengaho ngo atoroke ubutabera.

Umushinjacyaha Munyamahoro Faustin yabwiye urukiko ko ibyo Mwitende n’Umwunganizi we Shema ibyo bavuga bashaka kujijisha urukiko kuko byagaragaye neza ko amalisite yabaga yakozwe abaturage bamaze guhabwa ifumbire atandukanye cyane n’amalisite Mwitende yakoreshaka.

Yagize ati “ Nasabaga Mwitende ko asobanura inyungu abakozi ba MINAGRI, abacuruzi bato ndetse n’abayobozi b’inzego z’ibanze bari bafite mu gucura inyandiko kandi batazishyuza amafaranga y’inyongeramusaruro.”

Umushinjacyaha yakomeje asaba urukiko ko Mwitende yarugaragariza inyandiko yaba yarandikiye MINAGRI avuga ko nta bikorwa by’ubujura bikorwa hahimbwa amalisite y’abantu batabaho hagamijwe kwishyuza MINAGRI amafaranga y’umurengera nyuma yaho MINAGRI imwandikiye ibaruwa imugaragariza ikibazo ku itariki ya 2/11/2013 ndetse anasobanurire urukiko impamvu yemeye kujya mu itsinda bahuriyeho na MINAGRI ryo kureba abakora iki gikorwa nyamara azi neza ko ntaho ahuriye nabyo.

Perezida w’Inteko iburanisha uru rubanza yasabye impande zombi kureka guterana amagambo ndetse avuga ko urukiko rugiye gusuzumana ubushishozi ibimenyetso byatanzwe. Urubanza MINAGRI iregamo Mwitende ruzasomwa kuwa mbere tariki ya 16 Gicurasi 2016 saa saba z’amanywa.

Mwitende Ladislas umuyobozi wa Kompanyi Top Service yatawe muri yombi mu ntangirio za Gicurasi 2016 ashyikirizwa Parike ku itariki ya Gatatu uyu mwaka. Yatawe muri yombi arimo kwishyuza amafaranga y’u Rwanda angana na 454,859,694 . Muri aya mafaranga hari ayo yari yaramaze kwishyurwa angana na 322,520,994.

 

Comments

 
 
Antoine Hey yasabwe guhesha Amavubi itike ya CAN 2019
Antoine Hey yasabwe guhesha Amavubi itike ya CAN 2019

Umudage Antoine Hey yasinye amasezerano yo gutoza ikipe y’igihugu y’u Rwanda ejo hashize tariki 21 Werurwe 2017 ; yahawe amasezerano y’umwaka umwe ushobora kongerwa igihe yitwaye neza. Perezida (...)

Ingabo z’u Rwanda zirahugurwa ku kurinda ikoreshwa ry’abana mu gisirikare
Ingabo z’u Rwanda zirahugurwa ku kurinda ikoreshwa ry’abana mu gisirikare

Abasirikare 30 batangiye amahugurwa azamara ibyumweru bibiri, aho bazahabwa ubumenyi buzabafasha kugira uruhare mu gukumira iyinjizwa n’ikoreshwa ry’abana mu gisirikare. Ni amahugurwa (...)

 Arkiepiskopi wo muri Pologne yagizwe intumwa ya Papa mu Rwanda
Arkiepiskopi wo muri Pologne yagizwe intumwa ya Papa mu Rwanda

Arkiepiskopi wa diyosezi ya Lauriaco muri Pologne , Musenyeri Andrzej Jowzowicz, yagizwe intumwa y’umushumba wa Kiliziya Gatolika, Papa Francis mu Rwanda kuri uyu wa 18 Werurwe 2017. Jozwowicz (...)

U Buyapani bwahaye UNICEF Rwanda amadolari 636 000  yo kwita ku bana b’Abarundi
U Buyapani bwahaye UNICEF Rwanda amadolari 636 000 yo kwita ku bana b’Abarundi

Guverinoma y’u Buyapani yahaye UNICEF Rwanda amadolari ya Amerika 636 000 yo gufasha abana b’impunzi z’Abarundi bari mu Rwanda mu nkambi ya Mahama kugira ngo bafashwe mu myigire n’ubuzima rusange. (...)

REB ikomeje kuvumbura amakosa mu micungire y’abarimu hirya no hino mu gihugu
REB ikomeje kuvumbura amakosa mu micungire y’abarimu hirya no hino mu gihugu

Ubuyobozi bw’Ikigo cy’Igihugu gishinzwe Uburezi, buratangaza ko bukomeje kubona amakosa mu micungire y’abarimu mu turere dutandukanye tw’u Rwanda. Ni nyuma y’uko mu karere ka Nyagatare hagaragaye (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.