2017-06-24 12:54:56 clouds 27o High | Kigali Rwanda

Dukurikire:
 
 

Umushinga “My Green Home” w’abanyeshuri babiri wahembwe miliyoni zisaga 4

Yanditswe na IMVAHO NSHYA

Kuya 2017-05-19 12:33:43

 
Share on:
 
Yasuwe:109
 
Yavuzweho:200
 
10
 
10

Umushinga “My Green Home” wakozwe n’abanyeshuri Cyinzuzi David na Muhoza Rosette biga muri Kaminuza ya KEPLER wahawe igihembo kiruta ibindi kingana n’amadolari y’Amerika 5000 nyuma yo gutsinda amarushanwa ya “Pitch Night”.

Aya marushanwa yiswe “Pitch Night” yitabiriwe n’urubyiruko ruri munsi y’imyaka 25, yatangiranye n’abanyeshuri 100 bakoze imishinga ijyanye n’ubuzima, uburezi n’ibidukikije, haza gutoranywamo 5 ari nayo yageze mu cyiciro cya nyuma cy’amarushanwa, 3 iza gutsinda igahabwa ibihembo.

Nk’uko bisobanurwa na Muhoza Rosette, umushinga my Green Home uzakorera mu murenge wa Nduba mu karere ka Gasabo, uhere ku kuvangura imyanda ibora n’itabora, ibora ikabyazwemo ifumbire ikoreshwa mu buhinzi naho itabora igakorwemo ibikoresho by’ubwubatsi nka za Paves zisaswa ku mbuga cyangwa mu mihanda.

JPEG - 239.1 kb
Rosette Muhoza na Cyinzuzi David ni bo bahembewe imishinga bakoze

Abakoze uyu mushinga bagaragaje ko bizafasha gukemura ikibazo cy’imyanda ishyirwa mu kimpoteri cya Nduba yajyaga ibangamira abaturage kuri ubu ikaba igiye kubyazwa umusaruro.

Muhoza avuga ko mu gushyira mu bikorwa umushinga wabo bazakenera ibikoresho birimo imashini ndetse n’abakozi bo kuwushyira mu bikorwa, ibyo bikazaha imirimo umubare w’urubyiruko utari muto.

Muhoza ati “Iyi ni gahunda ya Made in Rwanda yatangijwe na Leta y’u Rwanda tuje gushyira mu bikorwa nk’urubyiruko ruri mu mashuri, tukaba tubyaza umusaruro ubumenyi tubona ku ntebe y’ishuri, bukagirira akamaro benshi mu baturage ndetse n’igihugu cyacu.”

Uretse sheki y’amafaranga bahembwe, Muhoza na Cyinzuzi banahembwe mudasobwa igendanwa na telefoni zigezweho.

Ted Mely, umuyobozi wa UNICEF mu Rwanda, yavuze ko imishinga y’urubyiruko itegerejweho ibisubizo n’Abanyarwanda kandi igahindura ubuzima bw’abatari bake.

Naho umuyobozi wa Sosiyete y’itumanaho Airtel, umwe mu baterankunga b’iyi gahunda, Michael Adjei, asanga imishinga y’urubyiruko itanga icyizere cy’umusanzu mu iterambere ry’igihugu.

Irere Claudette, ni umuyobozi mukuru muri Minisiteri y’Urubyiruko n’Ikoranabuhanga wari umushyitsi mukuru wari witabiriye amarushanwa, yashimye urubyiruko rwa Kaminuza, arugaragariza ko rushoboye n’ubwo bakiri bato.

Ati “Mukwiye gushyira mu bikorwa iyi mishinga mwamuritse, yaba iyahembwe n’itahembwe, yose ni imishinga myiza, gusa n’uko habonetse iruta indi.”

Indi mishinga yahembwe ni uwa Uwase Dominique Alonga witwa “ Imagine Nation” n’uwitwa “ Mbaza” wakozwe n’abasore babiri, bakaba barahembwe telefoni za Smart Phone zifite agaciro k’Amadorali 100 y’Amerika zikazahabwa murandasi (internet) mu gihe cy’umwaka wose.

Irushanwa rya “Pitch Night” ryatewe inkunga n’Ishami ry’Umuryango w’Abibumbye ryita ku bana (Unicef) ishami ry’u Rwanda na sosiyete y’itumanaho ya Airtel.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE