2017-11-23 18:23:19 clouds 27o High | Kigali Rwanda

Dukurikire:
 
 

Umuryango w’umuherwe Rubangura wibutse imyaka 10 ishize yitabye Imana

Yanditswe na IMVAHO NSHYA

Kuya 2017-05-07 09:32:00

 
Share on:
 
Yasuwe:165
 
Yavuzweho:200
 
10
 
10

Umuryango, inshuti n’abavandimwe bahuriye mu gikorwa cyo kwibuka imyaka icumi ishize umuherwe Rubangura Vedaste yitabye Imana.

Ni umuhango wabereye mu nyubako ya St Paul, ahabereye igitambo cya Misa ndetse nyuma inshuti ze n’abamukomokaho bakavuga uburyo bamuzi nk’umuntu ukunda akazi, kandi akicisha bugufi afasha abo arusha imitungo n’ubushobozi.

Abuzukuru be nka Robin Rubangura na Ryan Rubangura bavuga ko izina Rubangura ryonyine ryumva bakomeye bakifuza kugera ikirenge mu cya sekuru wabo.

Abana ba Rubangura batabashije kwitabira uyu muhango bohereje ubutumwa bwasomewe mu ruhame.

JPEG - 103.5 kb
Senateri Ntawukuriryayo ari mu bitabiriye igikorwa cyo Kwibuka Rubangura

Kelly Uwase Rubangura wiga muri Leta ya California muri Amerika, yagarutse ku kuntu yabonye nyina na musaza we barira, umunsi bumvaga inkuru y’urupfu rwa se, bikamubabaza.

Uwitwa Teta Shirleen Rubangura wiga mu cyiciro cya Gatatu cya Kaminuza muri Amerika, ubutumwa bwe bwagarutse ku mbaraga aterwa n’izina ‘Rubangura’, kuri we rivuga umuntu ukunda umurimo, umunyembaraga n’umugwaneza ndetse ko abamukomokaho bazagerageza kumwigana.

Umwe mu babaye inshuti na Rubangura witwa Kayiranga Mukama Alphonse yasize ubutumwa bugaruka ku bigwi bya nyakwigendera, aho yagize ati “Hari abantu bibagirana uko imyaka igenda isimburana ariko Rubangura Vedaste ntajya yibagirana.

Umuntu yakwibaza impamvu, nkeka ko yari afite impano yo gukunda abantu akanabishakira umwanya uhagije. Mwarahuraga akakuganiriza, akakubwira ikintu gituma ugenda wishimye, uko ukibutse kikagushimisha nubwo mwaba mutari kumwe. Ndakeka ko ari imwe mu mpamvu abamuzi batajya bamwibagirwa. Kuri uyu munsi wo kumwibuka ku nshuro ya 10, ngize nti ‘Imfura ntiyibagirana. Arakagira Imana.”

Umwe mu babyeyi akaba n’umuvandimwe w’umuryango wa Rubangura, yavuze ko kubera ubugwaneza bwe, yatangaga adasusumira.

Yagize ati “Umusaza yambaye hafi. Umugabo wanjye amaze gupfa, inshuti zatubaye hafi ariko nkumva nkomeye kuko numvaga mufite (Rubangura)[..]. Abana bajyaga kwiga bakamunyuraho, ngira ngo hari abana benshi bagiye bagira ibyago mu bihe twanyuzemo, hari igihe umwana aca ku mubyeyi akamusezera asubiye ku ishuri, ukabona ntacyo bimubwiye. Umusaza si uko yitwaraga ku bana banjye n’ab’abandi. Umwana wamugeragaho ntiyagendaga ntacyo amubwiye. Yashoboraga no kuguha amadorari 1000, akakubwira ngo genda uge kugura bombo.”

Rubangura n’umuhungu we Denis batunguye abazungu

Rubangura yigeze kujya mu Bubiligi, aho umuhungu we Denis Rubangura yigaga, icyo gihe hari ahantu hari hagiye gutezwa cyamunara y’imashini nshya ikata ibyuma. Yari isanzwe igura miliyoni ebyiri z’amadorali ariko kubera cyamunara yari yashyizwe ku bihumbi 200.

Rubangura Denis ati “Yaraje arambwira ati ‘nushaka usibire, niba ufite n’ikizamini gisibire iriya mashini ntincika’. Dusanga abaje kuyigura bayisuzuguye, bavuga ko itagezweho, ahita ayishyura, abazungu baratungurwa. Ubwo abazungu bahita badutumira gusangira muri restaurant, baratubaza bati ‘ariko ubundi iwanyu ni muri Zaïre, iwanyu ni he?’ tuti ni mu Rwanda. Nuko mberekera ku ikarita y’Isi yari aho (kuko batari bazi u Rwanda aho ruherereye).

Bati ‘Ese iwanyu mugira zahabu nyinshi, mugira Peteroli se?’ Tuti oya, abazungu bati ‘nonese iyi mashini muzayimaza iki? Rubangura ati “Mubwire ko kubera u Rwanda ari igihugu gikennye, abantu ibyo bakora babikora bihebye. Utwara imodoka ayitwara cyane, ucuruza acuruza cyane n’uwiba yiba cyane.”

Muri uyu muhango, abantu benshi bagiye bagaruka ku bigwi, byaranze Rubangura Vedaste agihumeka, byiganjemo gufasha abantu atarobanuye, gutebya, gukunda umurimo n’ibindi.

Rubangura Vedaste yari mwene Rukatitabire Augustin na Kabanyana Angeline, yavukiye i Kavumu mu Karere ka Nyanza. Yavutse tariki ya 3 Mata 1942, atabaruka kuya 6 Gicurasi 2007, aguye mu bitaro biri mu Mujyi wa Johannesburg muri Afurika y’Epfo

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE