2017-05-27 10:19:18 clouds 27o High | Kigali Rwanda

Dukurikire:
 
 

Umuganda ni umuco w’Abanyarwanda - Perezida Kagame

Yanditswe na IMVAHO NSHYA

Kuya 2016-05-01 05:28:11

 
Share on:
 
Yasuwe:153
 
Yavuzweho:200
 
10
 
10

Ubwo Perezida Paul Kagame yakoranaga umuganda n’abaturage b’Akarere ka Kayonza, yabwiye Abanyarwanda ko umuganda ari umuco wo gukorera hamwe basanganwe.

Ku wa Gatandatu tariki ya 30 Mata 2016, Umukuru w’Igihugu Paul Kagame yifatanyije n’abaturage ba Kayonza mu Ntara y’Uburasirazuba mu gikorwa cy’umuganda rusange. Nyuma y’uyu muganda, Kagame yaganiriye n’abaturage, maze abagezaho akamaro k’umuganda.

Perezida Kagame yabwiye Abanyarwanda ko umuganda ari umuco wo gukorera hamwe mu rugendo ruganisha ku iterambere.

Ati “Umuganda ni umuco w’Abanyarwanda, harimo gahunda yo gukorera hamwe, abantu kwikorera ibijyanye n’amajyambere bifuza.”

JPEG - 361.7 kb
Perezida Kagame mu muganda

Muri uyu muganda, Umukuru w’Igihugu n’abaturage bakoze igikorwa cyo gutunganya imiyoboro y’amazi no gukata imihanda mu kibanza kinini ahagiye kubakwa amazu ntangarugero mu mudugudu wa Bwiza mu Murenge wa Mukarange mu rwego rwo kubahiriza imyubakire ijyanye n’igishushanyombonera no kurwanya imyubakire yo mu kajagari.

Biteganyijwe ko iyo site izakorwamo imihanda ingana na kilometero 13, hakaba hamaze gutunganywa umunani.

Perezida Kagame yijeje abaturage ko umushinga wo kwagura, no gusana umuhanda Kagitumba- Kayonza- Rusumo ugiye gutangira kubakwa vuba kuko ibyangombwa byose byabonetse.

Yanabasabye kudapfusha ubusa amahirwe bafite yo kuba bari mu ihuriro ry’umuhanda munini ubahuza na bimwe mu bihugu by’akarere nka Uganda na Tanzaniya, ugakomeza no mu Mujyi wa Kigali, abasaba kubyaza umusaruro ayo mahirwe.

Kagame yongeyeho ko abaturage bakwiye kwita ku buhinzi bakongera umusaruro nko kuvugurura urutoki rwera cyane muri ako karere, bagafashwa n’abayobozi.

Yagarutse ku burezi, akangurira ababyeyi kohereza abana mu mashuri kuko nta mpamvu yatuma batajyayo kandi leta yaratanze byose by’ibanze.

Akarere ka Kayonza kagizwe n’imirenge 12, gatuwe n’abaturage basaga ibihumbi 340 batunzwe ahanini n’ubuhinzi n’ubworozi mu gice cyegereye Pariki y’Igihugu y’Akagera.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE