2017-06-28 08:00:46 clouds 27o High | Kigali Rwanda

Dukurikire:
 
 

Ubuhunzi rusage ku banyarwanda bakiri mu mahanga bugiye guhagarikwa

Yanditswe na IMVAHO NSHYA

Kuya 2017-04-21 17:15:30

 
Share on:
 
Yasuwe:374
 
Yavuzweho:200
 
10
 
10

Guverinoma y’u Rwanda yatanze igihentarengwa cyo gukuraho sitati y’ubuhunzi rusange ku mpuzi z’Abanyarwanda , igaragaza ko guhera mu ntangiro z’Umwaka wa 2018 nta munyarwanda urebwa n’iki cyemezo uzaba acyitwa impunzi.

Minisiteri y’Imicungire y’ibiza n’impunzi (MIDIMAR) iratangaza ko icyemezo cyo gukuraho ubuhunzi rusange ku mpunzi z’Abanyarwandakigiye kugira iherezo nyuma y’aho cyatangiye gutekerezwaho mu mwaka wa 2009 kugira ngo Abanyarwanda bahunze igihugu guhera mu 1959 kugeza mu 1998 babone amahirwe yo kongera gusubira mu rwababyaye cyangwa bagume mu bihugu byabakiriye ariko batacyitwa impunzi.

Kuva iki cyemezo cyatangira gushyirwa mu bikorwa mu mwaka wa 2011, hamaze gutahuka Abanyarwanda barenga 5000 kandi n’ubu baracyatahuka cyane ko iminsi ntarengwa bahawe yo kuba bafashe icyemezo irimo kugana ku musozo.

JPEG - 306.9 kb
Minisitiri wa MIDIMAR Mukantabana Seraphine

Minisitiri Mukantabana ashimangira ko mu mezi make asigaye Abanyarwanda bagifite amahirwe yo kubona itike ibacyura n’ubufasha bwose bahabwa nk’impunzi bukabunganira mu kugendana n’abo basanze mu gihugu.

Yagize ati “Mu nama iheruka i Geneve mu Busuwisi, twasanze impunzi zarabonye igihe gihagije cyo kwitegura bityo hashyirwaho itariki ntarengwa ya 31 Ukuboza 2017. Kuri iyo tariki HCR isanzwe yita ku mpunzi izakuramo akayo karenge. Umunyarwanda uri hanze ushaka gufashwa gutahuka, ntazaba akibona itike imugeza iwabo n’ubushobozi bumufasha gusubira mu buzima busanzwe. Nyuma y’iyo tariki nta bushobozi bundi buzaba buhari buturuka hanze, azabikora ku giti cye.”

Minisitiri Mukantabana arasaba abakiri mu buhungiro gufata aya mahirwe bahabwa n’Ishami ry’Umuryango w’Abibumbye ryita ku Mpunzi (HCR) n’abandi bafatanyabikorwa mu kwita ku mpunzi, kugira ngo babone itike n’ubundi bufasha bujyanye no kubongerera ubushobozi.

Ibikoresho bahabwaga batashye byavunjwe mu mafaranga

Minisitiri Mukantabana ahamya ko kuri ubu Abanyarwanda batahuka bahabwaga ubwisungane mu kwivuza, ibyo kurya n’ibindi bikoresho by’isuku n’ibyo mu gikoni, basigaye bahabwa ibyo kurya n’amafaranga kugira ngo utahutse abe yakwigurira ibyo abona akeneye.

Muri ino minsi abatahuka babona amafaranga, umuntu mukuru akabona amadolari y’amerika 250 (amafaranga y’u Rwanda asaga 202, 500) umwana akabona amadolari 150 (asaga121,500).

Minisitiri Mukantabana ati “Twari tukibaha ibiribwa ariko na byo turi mu nzira zo kubivunja mu mafaranga ngo bagende mu muryango bafite igishoro cyabafaha gutangira ubuzima. Niba ari umuryango ufite abantu 10, akenshi aba afite hagati y’amadolari 1000 na 2500; usanga ayo mafaranga ahagije kuko n’Abanyarwanda bayatangiriraho ntabwo ari benshi.”

JPEG - 72.4 kb
Izi ni inzu zubakirwa abatahutse baza batagira aho bahengeka umusaya

Usibye aya mafaranga, biteganyijwe ko buri munyarwanda utahutse azajya ahabwa ubwisungane mu kwivuza, telefoni igendanwa kandi afite uburenganzira busesuye no ku zindi gahunda abaturage bagenerwa na Guverinoma bigendanye n’ibyiciro by’ubudehe barimo.

Hari na gahunda Leta ifatanya n’amashami ya Loni akorera mu Rwanda (One UN), hakubakwa inzu zihabwa abatahutse batishoboye, abandi bagahabwa amabati inzego z’ibanze zikabafasha mu kububakira kugira ngo abatahutse badasohorera ku gasi, ahubwo bahite bafatira aho abandi bageze.

Nyuma yo kubona inzu, abenshi bahabwa amatungo magufi cyangwa amaremare, bakigishwa imyuga, abashoboye guhinga bagahabwa imbuto z’indobanure kugira ngo babashe gutangirana ubushobozi buhagije.

Uwanze gutaha si uko yabuze amakuru

Minisiteri y’Imicungire y’Ibiza no gucyura impunzi (MIDIMAR), irahamya ko ikora ibishoboka byose mu gutanga amakuru amenyesha abakiri mu buhungiro uko igihugu n’Abanyarwanda bafite ubwuzu bwo kubakira.

Mu bikorwa harimo udutabo turimo amakuru y’impamo ku bibazo byinshi bashobora kuba bibaza twoherezwa kuri za Ambasade nazo zikaduha impunzi, n’ibiganiro iyi Minisiteri itanga kuri radiyo na televiziyo by’u Rwanda kuko bikurikirwa mu bihugu byinshi birimo impunzi.

JPEG - 283.8 kb
Nyirarukundo Louise watahutse mu 2013 akubakirwa inzu inzu ijyanye n’igihe yishimira no kuba yarorojwe

Hari na gahunda ya “Ngwino urebe, ugende ubwire abandi” (come and see, go and tell) aho abakiri mu buhungiro bahawe amahirwe yo kuza gusura igihugu kwirebera ukuri kw’aho igihugu kigeze nyuma bagasubira mu bihugu bahungiyemo guha bagenzi babo amakuru y’impamo biboneye n’amaso yabo.

Minisitiri Mukantabana ati “Mu nama y’Umushyikirano 2016 twakiriye abaturutse hanze bagera kuri 73 baje bagasura igihugu bagasubirayo, banifatanyije n’Itorero ry’Urungano. Abo basubiyeyo tunategereje ko bashobora kugaruka, hari n’abandi bafashe pasiporo bavuga bati ‘twebwe iby’ubuhunzi turabisezereye kuko twari twarabeshywe.’”

Ubundi buryo bukoreshwa ni imbuga ngoranyambaga (Facebook, Twitter, Whatsapp…) ndetse hari na filimi irimo gukorwa ku rugendo rw’iterambere ry’abatahutse mu bihe bitandukanye yitezweho kuzafasha n’abatazi gusoma.

Ubundi buryo bukoreshwa ni ibiganiro hagati ya Leta y’u Rwanda, ibihugu bibacumbikiye na HCR kugira ngo hareberwe hamwe ibyakorwa ngo icyemezo cyo gukuraho ubuhunzi gishyirwe mu bikorwa mu buryo budahutaza impunzi n’imwe.

Abanyarwanda barashishikarizwa kubigiramo uruhare, abafite inshuti, imiryango n’abandi bose baziranye bakababwira ukuri kw’ibyo ukiri mu mahanga akomeje guhomba kandi igihugu kimutegeye amaboko kandi cyiteguye kumwakirana ubwuzu n’urugwiro.

JPEG - 283.4 kb
Kazanenda Modeste mu biraro by’ingurube zororoka ubutitsa zikanatanga ifumbire bakoresha mu buhinzi

Umuyobozi wa HCR mu Rwanda Azam Saber, yashimangiye ko biteguye kwakira no gufasha umubare w’Abanyarwanda bose batahuka mu mezi make asigaye ngo bakurirweho ubuhunzi.

Yagize ati “Gutahuka ni uburenganzira bwa buri wese. Ariko umuntu wese uzakenera gutahuka tuzamufasha kandi Guverinoma y’u Rwanda izishimira kubona benshi batahuka.”

Akomeza agira ati “Itariki isoza ikurwaho ry’ubuhunzi rusange ntabwo izigera ihinduka, bivuze ko tariki ya 1/1/2018 sitati y’ubuhunzi ku banyarwanda bahunzekugera 1998 izarangira, nta mpamvu yo kuyihindura.”

Abanyarwanda bakiri mu buhungiro baributswa ko amahirwe bafite kugeza ubu ari ugutahuka, cyangwa kuza mu Rwanda bakaka ibyangombwa bibemerera kuguma mu mahanga bitwa Abanyarwanda.

JPEG - 246.9 kb
Umuyobozi wa HCR mu Rwanda Azam Saber, yashimangiye ko biteguye kwakira no gufasha Abanyarwanda bose batahuka
atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE