Advertisement
 
 
 
 
 
 
 
 

Amakuru | Mu Rwanda

U Rwanda rurikoma Human Rights Watch yongeye kurushinja gufunga abakene   

  Yanditswe na HERVE UGIRUMUKUNDA
 4 months ago

 
 

Leta y’u Rwanda iramaganira kure raporo y’umuryango uharanira uburenganzira bwa muntu, Human Rights Watch (HRW), iyishinja gufunga abakene n’inzererezi mu buryo butemewe n’amategeko no kubafata nabi aho bafungiwe.

Iyo raporo ivuga ko inzererezi n’abanyagataro bafungirwa mu bigo bya Gikondo mu Mujyi wa Kigali, Mbazi mu karere ka Huye n’i Mudende mu karere ka Rubavu kandi ko hose bakubitirwayo abandi ntibagire gikurikirana.

Minisitiri w’Ubutabera akaba n’Intumwa Nkuru ya Leta, Johnston Busingye, mu kiganiro yagiranye n’Imvaho Nshya, yavuze ko ibyo HRW itangaza ari ibinyoma bigamije guharabika isura y’u Rwanda no kwishakira amaramuko.

Ati” Ni umuryango ucuruza ibinyoma, umaze kubicuruza igihe kinini, nta na rimwe bigeze batuvuga ibintu bizima.”

Yasobanuye ko bibabaje cyane gushinja Leta y’u Rwanda gutererana abakene no kubafunga kandi ahubwo iri mu zibafasha cyane kurusha izindi ku Isi.

Ati” Bakoresheje ijambo rikomeretsa, ngo dufata abakene nka “undesirable” (nk’ibicibwa), kandi 70 % by’ingengo y’imari y’igihugu zijya mu kuzamura buri muntu wese utishoboye, hari gahunda zo guca nyakatsi , umurenge VUP, gusakaza amashanyarazi, gutabara abahuye n’ibiza, gufasha abanyeshuri, … none se izo zose zishyirwaho kuko leta yanga abakene?”

Minisitiri Busingye kandi ntiyemeranya n’iyo raporo ivuga ko polisi n’igisirikare bakubita abana bari mu bigo byakira inzererezi inshuro ebyiri ku munsi, bakagaburirwa igikombe cy’impungure, kandi ngo hari abasohoka bafite ubumuga.

Avuga ko babajije uyu muryango gutanga urugero rw’umuntu umwe wakubiswe cyangwa akagirira ubumuga mu kigo cyakira inzererezi ariko HRW ikarya iminwa.

Ati” Bigeze kutubaza icyo kintu, bavuga ngo hari n’abasohokamo bafite ingaruka, z’ibyababayeho, turababwira tuti muduhe izina rimwe gusa, cyangwa iry’uwaba yarasagariye umuntu, baranga ngo ntibabatubwira ngo ni amasezerano yo kubahishira baba bagiranye.”

JPEG - 78.2 kb
Minisitiri w’Ubutabera Johnston Busingye

Yakomeje avuga ko iyo habonetse umupolisi, umusirikare cyangwa undi muntu wese ukorera urugomo abanyagataro n’inzererezi abihanirwa n’amategeko, kuko aba abikoze ku giti cye.

Ati”Nta mahame igihugu gifite yo gutegeka ko abari mu bigo byakira inzererezi bakubitwa. Mu bigo dufite hari amabwiriza ngenderwaho akurikizwa, ntawe ushobora guhohoterwa, ubikora abikora ku giti cye kandi arabihanirwa.”

Busingye kandi yanyomoje amakuru ya HRW avuga ko inzererezi n’abanyagataro bajyanwa mu kigo cya Gikondo (Gikondo Transit Center) bahamara igihe badafite ubakurikirana, hakaba n’amahamara ukwezi.

Yavuze ko utinda kuri icyo kigo aba afite ikibazo cyihariye kandi bikaba bizwi n’ubuyobozi bw’ikigo.

Ati” Iyo ufite abantu ijana cyangwa magana abiri, hari ubwo umwe cyangwa babiri kubera ikibazo cyihariye bafite bashobora gutinda; icyo gihe haba hari impamvu n’ubuyobozi bubizi, bwabisobanura.”

Yongeyeho ko uyu muryango ubeshya nkana ngo abari mu bigo byakira inzererezi ntibiga imyuga, birirwa bafungiye mu byumba kandi nyamara hari umubare munini w’abahavuye bari kwiteza imbere kubera imyuga bahigiye.

Ati” Dukuramo umusaruro ugaragara, harimo ibihumbi 7000 bitatu barangije basubiye mu buzima bwabo, hari abari mu makoperative, hari abafite akazi, abikorera kandi bose bari gutera imbere ku buryo bugaragara.”

Iyi raporo ya Human Rights Watch ije ikurikira iy’umwaka ushize, nayo yaje ishinja u Rwanda gukubita no kwica rubozo abacumbikiwe mu kigo cyakira inzererezi cya Gikondo.

 

Comments

  • MBARAGA THIERRY 1 August

    njyewe nafungiwe i GIKONDO NO MURI GARE YA NYABUGOGO. reka ntange ubuhamya.

    kuba hari abakubitwa i GIKONDO cg muri buriya buzu bashyiramo abantu mbere yuko bajyanwa i Gikondo, byo barakubitwa pe! ariko hari impamvu ituma bakubitwa. iyo winjiye ufite umutwe ukomeye, ushaka kubarwanya baragukubita byo. iyo winjyiye utuje ntabwo ukubitwa.

    i GIKONDO, umuntu arya rimwe ku munsi impungure. HRW rero ibyo ivuga nka 60% nibyo rwose. ariko na none nkiyo ujyanywe i WAWA uba ugize amahirwe kuko uhava wigishijwe umwuga, ku buryo nka nyuma y’umwaka usohoka ushobora kwiteza imbere. iyo akaba ari nayo mpamvu i wawa hadapfa kujyanwa ubonetse wese


pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Ubwiza bw’indege ya mbere nini yaraye itashye mu Rwanda (mu mafoto)
Ubwiza bw’indege ya mbere nini yaraye itashye mu Rwanda (mu mafoto)

Indege nshya yiswe ‘Umurage’ yaraye itashye mu Rwanda ku wa 1 Ukuboza 2016 igaragaza umwihariko mu miterere n’ubwiza bibereye amaso. Ikigo RwandAir cyakiriye iyi ndege ‘Airbus 330-300’ ifite (...)

Abapolisi 60 barangije bahuguwe ku buyobozi bwa sitasiyo za Polisi
Abapolisi 60 barangije bahuguwe ku buyobozi bwa sitasiyo za Polisi

Mu rwego rwo gukomeza kongerera ubumenyi abapolisi, ejo icyiciro cya kabiri cy’amahugurwa y’ubuyobozi bwa sitasiyo za Polisi cyarangijemo abapolisi 60 ku Ishuri rikuru rya Polisi (NPC) riri mu (...)

Kibeho: Ikibazo cy’amaresitora n’amacumbi kiracyari ingorabahizi
Kibeho: Ikibazo cy’amaresitora n’amacumbi kiracyari ingorabahizi

Mu gihe tariki 28 Ugushyingo buri mwaka hizihizwa umunsi w’ibonekerwa i Kibeho mu karere ka Nyaruguru, abaturuka hirya no hino baba bitabiriye uyu munsi mukuru, batangaza ko umutekano basanga mu (...)

U Rwanda rwasabye guhata ibibazo abasirikare 20 b’Abafaransa
U Rwanda rwasabye guhata ibibazo abasirikare 20 b’Abafaransa

Ubushinjacyaha bw’u Rwanda bwasabye Urukiko Rukuru rw’u Bufaransa ubufatanye mu gukurikirana abasirikare b’Abafaransa bakurikiranyweho uruhare bagize muri Jenoside yakorewe Abatutsi muri Mata 1994. (...)

Leta yishimira kuba ibiribwa byinshi mu bitunze Abanyarwanda babyihingira
Leta yishimira kuba ibiribwa byinshi mu bitunze Abanyarwanda babyihingira

Leta y’u Rwanda yagaragaje ko iterwa ishema no kuba ibiribwa byinshi bitunze abaturage biva muri bo, ibindi bikeya akaba ari byo biva mu mahanga. Mu nama mu nama nyungurabitekerezo ku isano iri (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.