2017-06-25 09:02:18 clouds 27o High | Kigali Rwanda

Dukurikire:
 
 

Twamagane abaha Jenoside yakorewe Abatutsi izindi nyito – Murekezi

Yanditswe na IMVAHO NSHYA

Kuya 2017-04-13 05:35:18

 
Share on:
 
Yasuwe:417
 
Yavuzweho:200
 
10
 
10

Minisitiri w’Intebe, Anastase Murekezi, asanga igikorwa cyo gusura inzibutso gifite akamaro ahanini mu guca intege abagipfobya Jenoside yakorewe Abatutsi n’abagishaka kuyita izindi nyito bagamije kuyitesha agaciro.

Bikubiye mu butumwa Minisitiri Murekezi yatangiye ku rwibutso rwa Murambi mu karere ka Nyamagabe rushyinguyemo imibiri isaga ibihumbi mirongo itanu, aho yari ahagarariye guverinoma mu gikorwa cyo kwibuka ku rwego rw’igihugu.

Minisitiri w’Intebe yasabye ko hashyirwa ingufu mu gikorwa cyo gusura inzibutso za Jenoside yakorewe Abatutsi, kuko asanga ari bwo buryo bwiza bwo kumenyekanisha amateka azatuma abakiyipfobya babura ibindi bitwaza.

Yagize ati “Iyo abashyitsi basuye urwibutso rwa Jenoside bibafasha kumva neza amateka ya Jenoside yakorewe Abatutsi n’ingaruka zayo, ku buryo ntawe ushobora kumubwira ibitari ukuri ngo abyemere ko Jenoside itigeze iba, cyangwa ngo yemere ko Jenoside ihabwa izindi nyito.”

JPEG - 219.4 kb
Minisitiri w’Intebe, Murekezi Anastase ashyira indabo ahashyinguye imibiri y’inzirakarengane zishwe muri Jenoside yakorewe Abatutsi zishyinguye ku rwibutso rwa Muramb

Mutangana Simon, yatanze ubuhamya bwagaragaje ko ingabo z’Abafaransa zabaga mu cyitwaga Zone Turquoise zarebereye ubwicanyi buba ntizigire icyo zikora mu kubarokora kandi zifite ubushobozi, atanga ingero z’ubwicanyi bwakorerwaga Abatutsi mu gace ka Remeramu cyahoze ari perefegitura Gikongoro ingabo z’Abafaransa zibireba.

Minisitiri w’Intebe yavuze ko ubuhamya bwa Mutangana bugaragaza ukuri ku bagipfobya Jenoside harimo n’Abafaransa, avuga ko ingabo z’u Bufaransa zari muri Zone Turquoise zarebereye Jenoside ikorwa kandi zari zifite ubushobozi n’ibikoresho.

Minisitiri w’Intebe yakomeje agira ati “ Abafaransa bagize ubucuti n’umubano na Leta yateguraga Jenoside yakorewe Abatutsi ni bo bashyigikiye leta yariho, aho ingabo zicaga abaturage n’Abafaransa bari kuri za bariyeri zatoranyaga Abanyarwanda hashingiwe ku ivangura hakoreshejwe indangamuntu yanditsemo amoko.”

Minisitiri w’Intebe yavuze ko ibyo Abanyarwanda barokotse Jenoside babonye n’abakoze Jenoside bakabyiyemerera, byose ari ikigaragaza ko umugambi wa Jenoside wateguwe, kandi ugashyirwa mu bikorwa.

Ati “Abo bose bagize uruhare muri Jenoside bose bagomba kubibazwa, ndetse n’abatarafatwa bakurikiranwe bisobanure kandi babibazwe n’inzego z’ubutabera.

Urwibutso rwa Jenoside rwa Murambi ruherereye mu bilometero bibiri uturutse mu mujyi wa Nyamagabe, rwubatse ahahoze ikigo cy’imyuga, rukaba rushyinguyemo imibiri isaga ibihumbi mirongo itanu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE