2017-12-11 14:03:29 clouds 27o High | Kigali Rwanda

Dukurikire:
 
 

TAS 2017: Jeannette Kagame yasabye ko havaho icyuho mu ikoranabuhanga

Yanditswe na IMVAHO NSHYA

Kuya 2017-05-13 15:55:12

 
Share on:
 
Yasuwe:103
 
Yavuzweho:200
 
10
 
10

Madamu Jeannette Kagame yasabye inzego zitandukanye kugira uruhare mu kuvanaho icyuho kiri mu ikoreshwa ry’ikoranabuhanga hagati y’abagabo n’abagore, kuko kugeza ubu bataratinyuka.

Ubu butumwa Madamu wa Perezida Paul Kagame yabutangiye mu nama ya “Transform Africa” (TAS) ejo hashize tariki 12 Gicurasi 2017.

Iyi nama yari ifite umwihariko w’insanganyamatsiko igira iti “Africa’s Smart Women Summit”, yigaga ku buryo bwo kuziba icyuho mu bijyanye n’ikoranabuhanga, gituma abakobwa n’abagore bo muri Afurika basigara inyuma mu iterambere Isi igenda igeraho.

Madamu Jeannette Kagame yavuze ko kudakoresha ikoranabuhanga mu buryo bungana biri mu bishobora kudindiza iterambere ry’ibihugu biri ku mugabane w’Afurika.

Yabwiye inzego za Leta n’izitegamiye kuri Leta gushyira imbaraga mu gufasha abagore n’abakobwa kwinjira mu ikoranabuhanga n’ubumenyi kugira ngo bagere ku iterambere isi igenda yerekezamo.

JPEG - 165.6 kb
Madamu Jeannette Kagame ageza ijambo ku bitabiriye inama, aho yasabye inzego bireba gukuraho icyuho kiri hagati y’abagabo n’abagore mu ikoranabuhanga

Jeannette Kagame yagize ati “Abagore baracyari bake mu kugera ku ikoranabuhanga kandi ryakabaye ryifashishwa n’abakobwa n’abagore mu kugira uruhare mu gukemura ibibazo, rikabafasha no kubona amakuru n’uburezi bufite ireme”.

Yasabye ko hatagira usigara mu ikoranabuhanga ubu rifatwa nk’impinduramatwara ya 4 mu rwego rw’iterambere ry’inganda, kuko rizanafasha mu kuziba icyuho gituma abagore n’abakobwa basigara inyuma mu iterambere.

Ku birebana n’ibyakozwe mu Rwanda, Madamu Jeannette Kagame yabwiye abafasha b’abakuru b’ibihugu by’Afurika ko umuryango ayobora wa “Imbuto Foundation” hari ibyo wakoze mu bikorwa bishyigikira bigateza imbere abana b’abakobwa.

Bimwe muri ibyo bikorwa harimo nko guhemba abatsinze neza ibizamini bya Leta buri mwaka hagamijwe kubatera umwete, ndetse no guhemba ba rwiyemezamirimo b’abakobwa bakiri bato bagize ibyo bigezaho.

Yasobanuye ko mu Rwanda hashyizweho n’ikigega cyiswe “Rugori Fund” kizafasha abagore n’abakobwa kubona imari yo gushora mu mishinga ibateza imbere.

Mu bandi bafasha b’abakuru b’ibihugu bitabiriye iyo nama harimo Madamu wa Perezida wa Mali, uwa Minisitiri w’intebe wa Sao Tome na Principe, ndetse na Visi Perezida wa Zambia n’abandi bayobozi b’abagore, bari kumwe n’abafite aho bahurira no guteza imbere umugore.

Madamu Phumzire Mlambo Ngcuka uyobora ishami ry’Umuryango w’Abibumbye ryita ku bagore, UN Women, yibukije ko hakiri icyuho kinini hagati y’abagore n’abagabo mu gukoresha ikoranabuhanga n’ubwo kigenda kigabanuka, ariko kuri ubu ngo kiri kuri 20.3%.

Yasabye ko inzego zose zagira uruhare kugira ngo icyo cyuho kigabanyuke cyane. Ati “Icyuho gihari kivuyeho byafasha Afurika kugera ku cyerekezo yihaye cya 2063 ndetse n’icya 2030 gikubiye mu ntego z’iterambere rirambye, SDGs’’.

Visi Perezida wa Zambia Inonge Wina, yasobanuye akamaro ko gushora imari hagamijwe guteza imbere umwana w’umukobwa, avuga ko ari uguteganyiriza ejo hazaza.

Hahembwe abakobwa ba mbere mu mishinga y’ikoranabuhanga

Madamu Jeannette Kagame na bagenzi be bashyikirije ibihembo abakobwa bakoze imishinga mu ikoranabuhanga.

Uwa mbere yabaye Ruth Njeri Waiganjo wo muri Kenya wabaye Miss Geek Africa wa mbere, yahembwe miliyoni eshatu z’amafaranga y’u Rwanda, abandi babiri bakurikirana ni abakobwa b’Abanyarwanda uwa kabiri yahawe miliyoni ebyiri, uwa gatatu ahembwa miliyoni imwe.

U Rwanda rwasinye amasezerano n’igihugu cya Niger

Muri iyi nama u Rwanda rwasinye amasererano y’ubufatanye n’igihugu cya Niger mu guteza imbere ikoranabuhanga.

Minisitiri w’urubyiruko n’ikoranabuhanga Nsengimana Phibert, avuga ko amasezerano u Rwanda na Nijeri byasinye agamije guteza imbere ikoranabuhanga n’itumanaho nta kabuza azashyirwa mu bikorwa.

Asoza iyo nama ku mugaragaro, Perezida wa Niger Mohamodoun Issouffu, yavuze ko u Rwanda rukomeje kuba intangarugero mu kugira umujyi usukuye kandi ubengerana “smart city”, ibindi bihugu by’Afurika bikwiye gufataho urugero.

Inama ya “Transform Africa” yitabiriwe n’abantu bagera kubihumbi bine, inama y’ubutaha ikazaba kuva ku ya 9 kugeza ku ya 11 Gicurasi 2018.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE