2017-08-20 07:43:19 clouds 27o High | Kigali Rwanda

Dukurikire:
 
 

Sitade eshatu Perezida Kagame yemereye Uburasirazuba zigiye kubakwa

Yanditswe na IMVAHO NSHYA

Kuya 2017-04-06 07:31:12

 
Share on:
 
Yasuwe:1273
 
Yavuzweho:200
 
10
 
10

Ubuyobozi bw’Ikigo cy’imiturire «Rwanda Housing Authority » buravuga ko imirimo yo kubaka Sitade eshatu Umukuru w’Igihugu, Kagame Paul yemereye abaturage b’Intara y’Uburasirazuba itangirana n’impera z’uku kwezi wa Mata 2017.

Izo Sitade zigiye kubakwa mu mujyi wa Nyamata mu Karere ka Bugesera, mu Karere ka Ngoma n’i Nyagatare mu gihe cy’iminsi iri hagati ya 150 na 170 zikure mu bwigunge abaturage bangana na miliyoni 2 n’ibihumbi 800 batagiraga Sitade n’imwe.

Imirimo yo kubaka izo Sitade yagombaga gutangira muri Mutarama 2017, bitinzwa n’uko hari inyigo zari zitararangira nk’uko Serubibi Eric, umukozi wa RHA yabisobanuriye Imvaho Nshya mu kiganiro kihariye.

Ati ’’Imirimo igomba gutangira muri uku kwezi kwa Kane uhereye ku italiki 15, ibikenewe birahari kandi byamaze gushyirwa ku murongo’’.

JPEG - 234 kb
Ikibuga cy’ i Bugesera kimwe mu bigiye gutunganywa (Foto Bugingo F)

Izo Sitade zizaba zigizwe n’ubwatsi bw’ubukorano, aho bakorera imyitozo ngororamubiri (Running Track), Tribune, urwambariro (Vestiaire) na Parikingi. Buri yose izaba ifite ubushobozi bwo kwakira abantu ibihumbi bitatu ku ikubitiro ariko ikazongerwa nyuma.

Umwihariko w’izi Sitade ni amatara ashobora gukinirwaho nijoro ariko atujuje ibisabwa na FIFA ku buryo Televiziyo mpuzamahanga zaza gufotora mu mikino ya nijoro nk’uko kuri ubu bimeze kuri Sitade ya Kigali, Amahoro, Huye na Rubavu.

Ingengo y’imari ku ikubitiro yari miliyari imwe n’igice kuri buri Sitade nk’uko Makombe Anastase wari umunyamabanga w’intara y’Uburasirazuba yabibwiye Imvaho Nshya taliki 17 Nyakanga 2015 ariko kuri ubu habayemo impinduka bisobanuye ko ingengo y’imari ya nyuma izatangazwa imirimo nitangira nk’uko Serubibi abivuga.

Serubibi avuga ko Leta izagena amafaranga izajya iha utu turere, natwo tuyakoreshe muri iyo mishinga.

Tribune zizimurwa mu gihe cyo kwagura Sitade

Undi mwihariko uhari w’izi Stade ni uw’uko Tribune ni ukuvuga aho abantu bicara zizaba zikozwe mu byuma bicomokorwa ku buryo nihaboneka ubushobozi bwo kubaka Sitade zisumbuyeho bazakuraho ibi byuma bubake izindi Tribune.

Serubibi ati ’’Nk’akarere ka Nyagatare na Bugesera bari bafite inyigo ya Sitade ifite yakwakira ibihumbi 10 na 15, ariko ubushobozi bwo kubaka ikintu kingana gutyo ntiburaboneka. Uko biteye, bazashyiraho ikibuga cy’ubwatsi bw’ubukorano ariko icyakabaye Tribune bizaba ari ibintu bikozwe mu byuma ushobora guteranyiriza aho ukaba wanabikura igihe runaka”.

Yakomeje agira ’’Nibashaka kwagura bazubaka n’ubundi hahandi. Bya byuma rero bazashaka ikindi kibuga babishyireyo mu gihe hahandi harimo kubakwa’’.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE