2017-12-11 14:03:29 clouds 27o High | Kigali Rwanda

Dukurikire:
 
 

RSSB iri kwiga ku kibazo cy’abafite mituweli boherezwa kugura imiti muri farumasi zigenga

Yanditswe na IMVAHO NSHYA

Kuya 2017-04-03 09:57:35

 
Share on:
 
Yasuwe:376
 
Yavuzweho:200
 
10
 
10

Ubuyobozi bw’Ikigo cy’Ubwiteganyirize bw’abakozi (RSSB) ari nabwo bufite mituweli mu nshingano, buratangaza ko bugiye kuganira na Minisiteri y’Ubuzima ku kibazo bamwe mu banyamuryango bashinja amavuriro cyo kubagurisha imiti muri farumasi zigenga kandi barishyuye ubwisungane mu kwivuza.

Ibi bivuzwe nyuma y’igihe kitari gito abaturage banenga uburyo bajya kwivuza mu bigo nderabuzima, bagasabwa kujya kwigurira imiti muri farumasi zigenga kandi baratanze imisanzu y’ubwisungane mu kwivuza nk’uko bayisabwa.

Ubwo iki kibazo cyabazwaga Dr Hakiba Solange, Umuyobozi wungirije muri RSSB, ushinzwe ibigenerwa abanyamuryango, yavuze ko iki kigo kigiye kuganira na Minisiteri y’Ubuzima kuri iki kibazo.

Ati “ Twe na Minisiteri y’Ubuzima tugomba kwicara tukaganira kuri icyo kibazo kugira ngo gikemuke. Twe nka RSSB dufite inshingano zo kwakira imisanzu y’abanyamuryango tukishyura serivisi ibitaro n’ibigo nderabuzima biba byahaye abanyamuryango bacu, ariko nayo ikabaha serivisi zose ibagomba, atari ugusuzuma gusa ngo babohereze kugura imiti mu mavuriro yigenga.”

JPEG - 153.7 kb
Dr Solange Hakiba, umuyobozi wungirije ushinzwe ibigenerwa abanyamisanzu muri RSSB

Hakiba kandi yasobanuye ko ubushobozi mituweli ifite budashobora gutuma igirana amasezerano na farumasi zigenga, ahubwo ko Minisiteri y’Ubuzima ikwiye kwita kuri iki kibazo.

Mu gihe hari benshi bifuza ko serivisi y’insimburangingo yakongerwa mu zo mituweli itanga ku banyamuryango bayo, Dr Hakiba yongeye kwibutsa ko ubwisungane mu kwivuza bwa mituweli butarabona amikoro ahagije ku buryo izo serivisi zose zabonekera rimwe, ariko ko bizagenda byigwaho bikanozwa kandi na zo zikagezwa ku banyamuryango mu gihe amikoro yaba yiyongereye.

Naho ku bijyanye imisanzu ya mituweli ishobora kongerwa, Dr Hakiba yavuze ko hari inyigo yatangiye gukorwa ku bufatanye n’inzego zibishinzwe, ariko ikaba itaragira aho igera.

Ati “Ibyo kongera imisanzu ya mituweli si ibya vuba, sinavuga ngo n’uyu mwaka cyangwa se ngo n’utaha, kuko bikiri kure. Gusa inyigo yaratangiye ku bufatanye n’inzego zibishinzwe, nibimara kunozwa tuzabibabwira, ntituzigera tubitura ku banyamuryango, ni ibintu bizitonderwa cyane kandi bigakoranwa ubushishozi.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE