2017-08-20 07:43:19 clouds 27o High | Kigali Rwanda

Dukurikire:
 
 

RCS yishimira ko inganda zo mu magereza y’u Rwanda zayifashije kwigira

Yanditswe na IMVAHO NSHYA

Kuya 2017-07-28 08:51:17

 
Share on:
 
Yasuwe:204
 
Yavuzweho:200
 
10
 
10

Ubuyobozi bw’Urwego rw’igihugu rw’imfungwa n’abagororwa (RCS) buratangaza ko inganda zikorera mu magereza anyuranye y’igihugu zarugabanyirije umugogoro w’amafaranga rwashoraga mu kugura ibikoresho bikenerwa n’abagororwa.

Nk’uko bisobanurwa na SP Sengabo Hilary, Umuvugizi wa RCS, kuri ubu Gereza ya Huye ifite uruganda rukora amasafuriya na za muvero zitekerwamo, rwaje ari igisubizo kuko byatumye amafaranga yashorwaga mu kugura muvero n’amasafuriya agabanuka.

Yagize ati “Mbere uru ruganda rukora amasafuriya rwo muri gereza ya Huye rutarabaho, twaguraga muvero imwe ku mafaranga asaga 5 000 000, ariko ubu ikorwa n’abagororwa ikuzura ihagaze amafaranga angana na 1 500 000.”

JPEG - 213.9 kb
Iyi ni muvero ikorerwa mu ruganda rwa Gereza ya Huye

SP Sengabo avuga ko ari umusaruro waturutse mu mikoranire myiza ya Leta y’u Rwanda na Komite y’umuryango mpuzamahanga wita ku mbabare (CICR) kuko ari wo wahuguye bamwe mu bagororwa mu bijyanye no gukora amasafuriya manini azwi nka muvero n’amato.

Yagize ati “Ubumenyi bwo gukora amasafuriya na za muvero, abagororwa babuhawe na CICR, naho RCS itanga ubushobozi bwo kubona ibikoresho by’ibanze bikorwamo amasafuriya.”

SP Sengabo avuga ko muri Gereza ya Huye hari n’uruganda rukora amasabuni yo gufura n’andi yo gukaraba azwi nk’isabuni y’amazi (Savon Liquide).

Avuga ko aya masabuni nayo akoreshwa n’abagororwa, bigakemura ikibazo cy’amafaranga menshi yatangwaga na RCS mu kugura aya masabuni ku nganda zo hanze ya gereza, kuri ubu amagereza yose yo mu Rwanda akaba akoresha amasabuni akorwa na Gereza ya Huye.

Ati “Ubu gereza zose zikoresha amasabuni akorerwa mu ruganda ruherereye muri gereza ya Huye, hari na gahunda yo gukora umubare munini w’amasabuni kugira ngo nyuma yo guhaza za gereza tubashe no gusagurira amasoko yo hanze ya gereza.”

Umuvugizi wa RCS kandi yemeza ko muri gereza zose z’igihugu hakorerwamo umuti wica udukoko ukoze mu kinyabutabire cyitwa Chlore. Ibi byarafashije gushyira ku iherezo umunuko wumvikanaga iteka aho za gereza zubatse, wari warazengereje abatuzituriye.

Yagize ati “Ubusanzwe muri za gereza zose humvikanaga umunuko uturuka mu byobo bifata imyanda ituruka mu misarani yabo, ukabangamira cyane abantu bazituriye, ariko kuri ubu uwo munuko wagiye nka nyomberi, nta wukirangwa aho ari hose hubatse gereza, icyo kibazo cyakemuwe n’Ikinyabutabire cyitwa Chlore gikorerwa muri gereza zose z’igihugu.”

SP Sengabo yavuze ko ibi byose bikorwa muri gahunda yo kwigira no kugabanya amafaranga akoreshwa mu kugura ibintu bimwe na bimwe bikenerwa na za gereza.

Umuvugizi wa RCS avuga ko nubwo inganda z’amagereza zabanje kwihaza mu byo zikora, hari gahunda yo gusagurira amasoko yo hanze ya gereza, ariko anatangaza ko amasafuriya ndetse na muvero yatangiye kugera ku masoko yo hanze ya gereza no hanze y’igihugu.

Avuga ko hari za muvero bagurishije mu gihugu cya Cameroun, hari n’izigurishwa mu mashuri yo hirya no hino mu gihugu, ndetse ngo hari n’amasafuriya akoreshwa mu miryango agurwa n’abatuye hanze ya za gereza, aho isafuriya imwe usanga igura Frw 15 000, hari igura Frw 10 000, hakaba n’igura Frw 8000 n’izindi.

MUGISHA BENIGNE
Ati “Iki giciro ntigihanitse urebye gukomera kw’aya masafuriya, kuko ashobora kumara imyaka itari munsi ya 10 atarasaza. Abantu bakwiye kumenya kugura ibihenze ariko biramba kuruta kugura ibya make ariko bipfa ubusa.”

Sengabo avuga ko ayo masafuriya ahari muri gereza ya Huye ndetse mu gihe cya vuba akazegerezwa abandi banyarwanda binyujije mu zindi gereza zo mu gihugu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE