2017-09-23 09:22:12 clouds 27o High | Kigali Rwanda

Dukurikire:
 
 

Pro-Femmes yarose neza kandi ikabya inzozi-Jeannette Kagame

Yanditswe na IMVAHO NSHYA

Kuya 2017-07-08 10:43:32

 
Share on:
 
Yasuwe:52
 
Yavuzweho:200
 
10
 
10

Madamu Jeannette Kagame asanga impuzamiryango ‘Pro-Femmes Twese Hamwe’ yararose neza kandi ikaba yarakabije inzozi kubera ibikorwa by’indashyikirwa abanyamuryango bayo bamaze kugeraho.

Ibi yabigarutseho mu muhango wo kwizihiza imyaka 25 ‘Pro-Femmes Twese Hamwe’ imaze ivutse wabereye mu murenge wa Gahanga akarere ka Kicukiro ubwo hatahagwa inyubako yayo y’ikigo cy’icyitegererezo kigamije iterambere ry’umugore.

Madamu Jeannette Kagame avuga ko bitoroshye kubona ibikorwa bitandukanye byagezweho n’impuzamiryango Pro-Femmes byo guhuza abanyarwandakazi ikabaherekeza mu rugendo rwo gukira ibikomere bakubaka ubushobozi bw’imiryango yabo bitari byoroshye nyuma y’ibihe bikomeye bya Jenoside igihugu cyari kivuyemo.

Ati “Turabashimira ko mwakomeje gusigasira agaciro mwasubijwe kuko mwashoboye kubakira ku byo mwahawe. Dutewe ishema no kuba mwarabashije kwesa umuhigo mwari mwihaye ubwo mwizihizaga isabukuru y’imyaka 20 kandi inyubako yo gufasha abagore yuzuye izafashe abanyamuryango banyu kurushaho kubaho bihesha agaciro”.

JPEG - 166.5 kb
Madamu Jeannette Kagame, Minisitiri w’uburinganire n’iterambere ry’umuryango Nyirasafari Esperance(Ibumoso) na Perezida wa Pro-Femmes Twese Hamwe Kanakuze Jeanne d’Arc

Avuga ko u Rwanda rwateye intambwe mu guteza imbere umugore, agaragaza ko abagore bugarijwe n’ubukene bavuye kuri 58% muri 2001 bakaba bari bageze kuri 39% muri 2013-2014. Mu guhanga imirimo abagore bafite konti mu bigo by’imari bavuye kuri 5,1% muri 2006 bagera kuri 44% muri 2013-2014, akavuga ko ari umusanzu wa Pro-Femmes.

Madamu Jeannette Kagame yasabye abayobozi batandukanye gufasha Pro-Femmes gukumira amakimbirane mu miryango, kurwanya ihohoterwa rikorerwa abagore, gutwara inda zitateganyijwe ku bangavu, ikoreshwa ry’ibiyobyabwenge mu rubyiruko n’ibindi.

Umuyobozi w’Impuzamiryango ‘Pro-Femmes Twese Hamwe’ Kanakuze Jeanne d’Arc, avuga ko italiki ya 07 Nyakanga 2017 ari italiki idasanzwe yubatse amateka ku gihugu, kuri ‘Pro-Femmes Twese Hamwe’.

Avuga ku byo Impuzamiryango ‘Pro-Femmes Twese Hamwe’ imaze kugeraho agira ati “Nta bwo tukiganya ibyo tugezeho ni byinshi, inyubako yatashywe n’igice kimwe cy’ikigo cy’icyitegererezo kigamije iterambere ry’umugore ariko hasigaye n’ibindi. Iki kigo cyubatswe hagamijwe kuvugwa amateka y’abanyarwanda mu kwimakaza ihame ry’uburinganire ku buryo bunoze burushijeho ubwo twarimo kandi abanyamahanga n’abanyarwanda bazacyigireho”.

Kanakuze avuga ko hasigaye amezi 4 ngo Pro-Femmes yuzuze imyaka 25 ivutse, yatangiye ari imiryango 13 yishyize hamwe ngo igire ijwi Jenoside yakorewe Abatutsi iyikoma mu nkokora ariko nyuma ya Jenoside iyo miryango yagiye yiyongera ngo iteze igihugu imbere abagore babigizemo uruhare.

Avuga ko ‘Pro-Femmes Twese Hamwe’ yagize uruhare mu kwigisha ihame ry’uburinganire n’ubwuzuzanye, habaho kongerera abagore ubushobozi bakabasha kujya no mu buyobozi n’izindi nzego zifata ibyemezo. Mu bukungu imwe mu miryango igize Pro-Femmes ifite ibigo by’imari, amakoperative n’amabanki.

Mu burezi yashishikarije abana b’abakobwa kujya mu ishuri, mu mategeko ikunganira Leta bigisha amategeko havugururwa abangamira umugore, naho mu mibireho abagore bagenda bafasha bagenzi babo kwiteza imbere.

Kugeza ubu igizwe n’imiryango 57, abanyamuryango 58,000, abagenerwabikorwa 689,000 muri bo umaze kugira icyo yigezaho ava mu bagenerwabikorwa akigira.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE