Advertisement
 
 
 
 
 
 
 
 

Amakuru | Mu Rwanda

Polisi y’u Rwanda yungutse ba Ofisiye bato 415   

  Yanditswe na IMVAHO NSHYA & RNP
 July 2016

 
 

Abapolisi b’u Rwanda 415 bo ku rwego rwa ba Ofisiye bato, basoje amasomo ku wa gatanu tariki ya 29 Nyakanga 2016, bibutswa ko inshingano batangiye ziremereye kandi kuzishyira mu bikorwa neza bisaba kugira umutima ukunda igihugu.

Aba bapolisi bo mu Rwanda basoje amasomo yabo hamwe na bagenzi babo 14 bakomoka mu bindi bihugu, barimo 10 bo muri Sudani y’Epfo, babiri bo muri Uganda ndetse na babiri bo muri Namibiya.

Aba ba Ofisiye bato (bahawe ipeti rya Assistant Inspector of Police, AIP) barangije amahugurwa bose hamwe ni 429, barimo ab’igitsina gore 55.

Minisitiri w’umutekano mu gihugu Sheikh Musa Fazil Harerimana, ni we wayoboye umuhango wo gusoza amasomo yahabwaga aba bapolisi bagize icyiciro cya munani cy’amahugurwa nk’aya, mu bubasha yahawe na Perezida wa Repubulika, nk’uko amategeko abiteganya.

Ubwo yari amaze guha ipeti aba bofisiye bashya, Minisitiri Harelimana yabashimiye uko bitwaye bakarangiza amasomo yabo bamazemo amezi 15.

Ati:”Amahugurwa nk’aya ni ingirakamaro kuri Polisi y’u Rwanda. Yongerera ubumenyi abapolisi, bigatuma barushaho kuzuza inshingano nyamukuru igihugu n’abanyarwanda babatezeho. Iyo nshingano ikaba ari iyo kurinda neza umutekano w’abantu n’ibintu mu gihugu hose”.

JPEG - 157.9 kb
Minisitiri w’umutekano mu gihugu Sheikh Harerimana agenzura abapolisi basoje amasomo

Yanavuze ko amahugurwa nk’aya afasha Polisi y’u Rwanda kugera ku cyerekezo yiyemeje cyo gutanga serivise zinoze, gukorera mu mucyo, guharanira ko amategeko yubahirizwa no gufasha abaturarwanda kuba mu gihugu gifite umutekano kandi kitihanganira abanyabyaha.

Yakomeje avuga ati:”Ibi twabitewe n’uko tuzi neza ikiguzi cyo kutagira umutekano, urugero rwa hafi ni inzirakarengane zirenga miliyoni zazize Jenoside yakorewe abatutsi. Iyo u Rwanda ruza kuba rufite ubuyobozi bwiza n’inzego z’umutekano zikora neza kandi ziharanira inyungu z’igihugu n’abagituye bose, ntituba twaratakaje abantu.”

Yavuze kandi ko kwimakaza umutekano no kuwugiramo uruhare rugaragara bitureba twese nk’uko Nyakubahwa Perezida wa Repubulika Paul Kagame ahora abitwibutsa.

Minisitiri Harelimana yanavuze ko iterambere igihugu cyacu kimaze kugeraho mu nzego z’imiyoborere myiza, ubutabera, ubukungu n’imibereho myiza, ritari kugerwaho iyo inzego z’umutekano zitabigiramo uruhare, aboneraho n’umwanya wo gushimira Polisi y’u Rwanda kubera uko yuzuza inshingano zayo kinyamwuga haba mu gihugu imbere no hanze yacyo aho iba yagiye kubahiriza amahoro.

Umuyobozi w’ishuri rya Polisi riri i Gishari Commissioner of Police (CP) John Bosco Kabera, yavuze ko amasomo nk’aya atuma abari basanzwe ari abapolisi bato biyongera ubumenyi, n’abari abasivili bakagira ubumenyi bubashyira ku rwego rw’abayobozi.

Yagize ati:”Turizera ko amasomo mwaherewe hano azabafasha gufata imyanzuro n’ibyemezo bikwiye igihe muzaba muri gukora akazi kanyu.”

Yanababwiye ati:”Mufite uruhare runini nk’abayobozi muri Polisi y’u Rwanda, mukaba musabwa kugera ku ntego z’itegeko nshinga, mufasha mu iyubahirizwa ry’amategeko, kandi ibi ntibyagerwaho hatabayeho ubufasha n’uruhare by’abaturage dukorera. Ubushake bw’abaturage bwo gukorana na Polisi y’u Rwanda mu kurwanya iibyaha buzaturuka ku mikorere yanyu ya buri munsi.”

Abapolisi basoje amasomo basabwe gufatanya na bagenzi babo basanze mu kazi, mu gusigasira umutekano w’abanyarwanda.

Umuhango wo gusoza aya masomo yatangiye kuwa 4 Gicurasi 2015, mu ishuri rya Polisi i Gishari mu Karere ka Rwamagana, witabiriwe na Minisitiri w’ingabo Gen. James Kabarebe, ndetse n’abandi bayobozi batandukanye muri Polisi y’u Rwanda na Uganda.

 

Comments

 
 
Min. Kanimba  yasabye umunyamabanga wa EAC gushyira ingufu mu mavugurura
Min. Kanimba yasabye umunyamabanga wa EAC gushyira ingufu mu mavugurura

Minisitiri w’Ubucuruzi, Inganda n’Ibikorwa by’Umuryango w’Afurika y’Uburasirazuba, François Kanimba, yakiriye mu biro bye Umunyamabanga Mukuru w’Umuryango wa Afurika y’Uburasirazuba, EAC, Amb. Libérat (...)

Abahoze ari abajura muri Nyabugogo bashinze ihuriro
Abahoze ari abajura muri Nyabugogo bashinze ihuriro

Urubyiruko rugera ku 157 rwahoze rukora ibikorwa by’ubujura bitandukanye mu gace ka Nyabugogo mu Mujyi wa Kigali rwiyemeje kubireka, ubu rukaba rwarashyizeho ihuriro ryabo ryitwa” Hinduka uhindure (...)

Polisi y’u Rwanda yafatiye ibiyobyabwenge na magendu mu mikwabu
Polisi y’u Rwanda yafatiye ibiyobyabwenge na magendu mu mikwabu

Imikwabu Polisi y’u Rwanda yakoze mu mpera z’icyumweru gishize mu turere twa Huye, Kirehe, Gicumbi na Nyanza yayifatiyemo ibiyobyabwenge by’ubwoko butandukanye na magendu. Uwitwa Ntirenganya Jean (...)

Abatwara imodoka zijyana  abana ku ishuri  baravugwaho kubatendeka
Abatwara imodoka zijyana abana ku ishuri baravugwaho kubatendeka

Ishami rya Polisi y’u Rwanda rishinzwe umutekano wo mu muhanda rirasaba abatwara ibinyabiziga bijyana cyangwa bivana abana b’abanyeshuri ku mashuri yabo, kubahiriza amategeko y’umuhanda kuko hari (...)

U Rwanda na Ecosse byiyemeje ubufatanye mu kurwanya ihohoterwa rishingiye ku gitsina
U Rwanda na Ecosse byiyemeje ubufatanye mu kurwanya ihohoterwa rishingiye ku gitsina

Abapolisi babiri bo ku rwego rwa Ofisiye bakuru bo mu gihugu cya Ecosse bari kumwe na Ambasaderi w’u Bwongereza mu Rwanda, William Gelling, ku wa mbere tariki ya 6 Gashyantare basuye Polisi y’u (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.