Advertisement
 
 
 
 
 
 
 
 

Amakuru | Mu Rwanda

Polisi y’u Rwanda irakira inama mpuzamahanga n’imyitozo kabuhariwe   

  Yanditswe na IMVAHO NSHYA
 3 months ago

 
 

Polisi y’u Rwanda yiteguye kwakira abarenga 100 baturutse mu bihugu bitandukanye bya Afurika bitabiriye imitozo kabuhariwe yo kurwanya ibyaha byifashisha ikoranabuhanga (Cyber Enabled Table-Top Exercise) yitezwe i Kigali guhera kuri iki cyumweru tariki 28 Kanama kugeza tariki 2 Nzeri 2016.

Iyi myitozo yateguwe na Polisi y’u Rwanda ku bufatanye n’Umuryango wa Polisi Mpuzamahanga (Interpol) igamije kongerera ibigo bya polisi nyafurika ubumenyi n’imbaraga, ihuriranye n’Inama rusange ya 18 ihuza Umuryango w’Abayobozi ba Polisi ya Afurika y’Uburasirazuba (Eastern Africa Police Chief Cooperation Organisation-Annual General Meeting/ EAPCCO-AGM) na yo itegerejwe i Kigali.

Perezida Paul Kagame afungura ku mugaragaro Imyitozo ‘Command Post Exercise Africa UNiTE II’ mu 2015, ku guhangana n’ihohoterwa rikorerwa abagore n’abakobwa


Ikoranabuhanga rikorerwaho ibyaha rikanabikumira

Ibyaha bikorwa higashishijwe ikoranabuhanga bigenda byiyongera kandi ababikora benshi bagendana n’umuvuduko w’iterambere ryaryo. Uko riborohereza kugera ku ntego n’uburyo rishobora kubahishira bagakora ibyaha mu bwisanzure batitaye ku mipaka bisiga ibibazo bikomeye mu baturiye Isi.

Ibyaha bikorerwa ku ikoranabuhanga bikomeza kongera ubukana uko iminsi ihita kubera ko abahuzwa na ryo n’ibikoresho bibahuza bigenda biyongera ubutitsa. Buri cyaha kigira mudasobwa cyangwa inzira y’umwijima gikorerwamo. Nubwo nta gisobanuro cyihariye wagenera ibyaha nk’ibi, nk’uko Interpol ibisobanura, imbaraga zashyizwe mu kubikurikirana zatumye haboneka ibyiciro bibonekamo.

Minisitiri w'Umutekano mu gihugu Sheikh Musa Fazil Harelimana, mu muhango wo gutangiza amahugurwa (PCPX)


• Hari ibikoresha ikoranabuhanga ryo hejuru: ni ibitero bigabwa kuri mudasobwa cyangwa ibindi bikoresho by’ikoranabuhanga.

• Hari kandi n’ibyaha byoroshywa n’ikoranabuhanga- Ibyinshi byajyaga bikorwa mu buryo bwa gakondo bigenda bifata indi ntera iyo byifashishije ikoranabuhanga. Ibi byaha birimo ibikorerwa abana (icuruzwa ry’abantu n’ihohoterwa), ibijyanye n’imari (ubujura), n’iterabwoba.

Ibi byaha bigenda byiyongera kandi bigahindura isura ubutitsa kuko n’ibyakorwaga mu buryo bwa gakondo ntibigifite ingufu cyane. Bimwe mu byaha bikorerwa ku ikoranabuhanga n’ibiryifashishisha birimo ubujura bw’amakuru y’ingenzi mu bigo byangwa inzego za Leta, kwigana amafaranga, kuyobya inkunga n’andi mafaranga yoherezwa, ihohoterwa rikorerwa abana, kubagira ibikoresho no kubacuruza, ikwirakwizwa ry’amakuru n’amashusho atemewe, kumviriza amakuru mu buryo butemewe n’iterabwoba.

Ibi byaha ni imbogamizi ku nzego zishinzwe umutekano, haba mu kubaka ubushobozi no gukoresha ikoranabuhanga mu guhangana na byo. Amahugurwa, guhanahana amakuru no kubaka ubushobozi bw’izi nzego biri mu bitanga amahirwe yo kongera ubushobozi bwo gutahura no kwirinda ibyaha byose bikorerwa ku ikoranabuhanga.

Bamwe mu bitabiriye imyitozo yiswe ‘Command Post Exercise Africa UNiTE II’ n’abandi banyacyubahiro mu ifoto y’urwibutso na Perezida Kagame nyuma yo kuyifungura ku mugaragaro


Bumwe mu buryo bw’amahugurwa ni ukongera imyitozo ihuje inzego z’umutekano ziturutse mu gihugu bitandukanye, ari na yo mpamvu Polisi y’u Rwanda na Interpol byihurije hamwe mu gutegura iyi myitozo izibanda ku nzego z’ibihugu bya Afurika.

Bimwe mu bikorwaho imyitozo birimo

• Kurwanya no gukumira ibyaha byifashisha ikoranabuhanga, n’icuruzwa ry’abantu
• Amahugurwa yibanda ku mikorere ya Interpol (ikoranabuhanga rikoreshwa, amabwiriza, n’irindi koranabuhanga rikoreshwa mu gutahura ibyaha nyambukamipaka: I-24/7)
• Na none kandi hazibandwa cyane ku mikino yigisha abitabiriye uruhare rwabo mu kurwanya ibyaha.

Abayobozi b’inzego z’umutekano muri Afurika bakeneye guhuza imyumvire yo gukorana no gutabarana bya kinyamwuga kuko ibyaha bikorerwa ku ikoranabuhanga n’ibiryifashisha badatinya imipaka, kandi iyi myitozo yateguwe mu gukangura abayobozi no kubongerera ubumenyi n’ubushobozi mu guhangana na byo.

Guhuza Polisi yaAfurika ni yo ntego nyamukuru

Iyi myitozo iribanda ku gukora iperereza ryifashishije atangwa n’ikoranabuhanga nk’imbuga nkoranyambaga, telefoni zigendanwa, mudasobwa ndetse n’ibindi bikoresho byifashisha murandasi. Byitezwe ko aya mahugurwa azagera ku ntego zikurikira:

• Kuzamura ikigero cy’imikoranire ya Polisi ya Afurika;
• Kongera ubumenyi ku byaha bikorerwa ku ikoranabuhanga n’imikorere ya bimwe mu bikoresho by’ikoranabuhanga byifashishwa mu iperereza;
• Kongera ubumenyi ku bijyanye n’imikorere ya Interpol harimo ikoranabuhanga n’amabwiriza bifashisha
• Kongera ubumenyi ku buryo bukoreshwa mu iperereza ryerekeye icururuzwa ry’abantu

Umuhango w’Ishyirwaho ry’imyitozo ‘Police Command Post Exercise (PCPX)’ ryiswe “Solidarity” mu 2012


Intego nyamukuru ni ukwiga no kongera ubumenyi, guhuza no gukoresha ubushobozi bwose mu kurwanya ibi byaha, ku iperereza ryifashisha ikoranabuhanga mu gukurikirana ibyaha birikorerwaho no gukirikizana icuruzwa ry’abantu hifashishijwe ibikoresho bya Interpol. Ibi bigamije kongera ubushobozi bw’abahagarariye ibihugu byabo bitabiriye kugira ngo bahuze imyumvire mu guhangana n’ibi bibazo.

Abitabiriye bazahakura ubumenyi buhanitse

Imyitozo ihuje abarenga 100 baturutse mu bihugu bitandukanye bya Afurika. Kubera ko uyu uzaba ari umwihariko usaba gukuramo amasomo afatika, aboherejwe barimo abafite ubumenyi butandukanye mu guhangana n’icuruzwa ry’abantu, ku iperereza ry’ibyaha bikorerwa ku ikoranabuhanga cyangwa ku gukoresha ikoranabuhanga no kubahiriza amategeko.

Imyitozo iri mu byiciro bibiri birimo amahugurwa ku byaha byifashisha ikoranabuhanga n’ukoikoranabuhanga ryakwifashishwa mu kubirwanya; no gukina imikino ijyanye n’iperereza, kurwanya no gukumira ibi byaha.

Imyitozo ibonwa nk’ amahirwe y’inzego z’umutekano ku mugabane wa Afurika yo guhuza imyumvire mu guhangana n’imbogamizi zitandukanye zikururwa n’ibyaha bikorerwa ku ikoranabuhanga. Ibizigirwa muri iyi myitozo bizakomeza gufasha abahagarariye bihugu byabo mu guhangana n’ibi byaha.

Inama rusange ya 18 ya EAPCCO ibaye iya gatatu mu Rwanda

Umuryango w’Abayobozi ba Polisi ya Afurika y’Uburasirazuba (EAPCCO) washinzwe mu mwaka 1998 i Kampala muri Uganda mu nama y’abayobozi bakuru ba Polisi z’ibihugu bya Afurika y’Uburasirazuba, ukaba ugizwe n’ibihugu 13 ari byo u Rwanda, Uganda, Burundi, Comoros, Ethiopia, Eritrea, Djibouti, Kenya, Sudani, Sudani y’Epfo, Seychelles, Somalia na Tanzania.

Washinzwe mu guhangana n’ibyaha nyambukamipaka ndetse n’ibiba byateguwe. Ibiro bya Interpol mu karere biherereye i Nairobi muri Kenya bikora nk’ubunyamabanga bukuru.
Inama rusange ya 18 ya EAPCCO ibaye iya gatatu ibereye mu Rwanda nyuma y’ebyiri zabaye mu mwaka wa 2001 na 2011.

JPEG - 334.1 kb
Abayobozi ba Polisi bitabiriye PCPX

Umuryango EAPCCO washinzwe ufite intego 7 zikurikira:
• Kuzamura, kongera imbaraga no gukurikirana ubufatanye bw’ibihugu ndetse no gushyiraho uburyo buhuriweho mu gukumira ibyaha nyambukamipaka mu bihugu by’ibinyamuryango.
• Gutegura no gukwiza amakuru afatika yafasha ibihugu by’ibinyamuryango mu bwirinzi ku byaha binuganugwa.
• Igenzura rihoraho ku buryo bwashyiriweho guhangana n’ibyaha kugira ngo buhindurwe mu gihe budafasha guhangana n’iby’ibanze.
• Guharanira ko ibikorwa no kubika amakuru y’ibyaha biba nta makemwa, ndetse Interpol ikanafasha mu gutanga ibyangombwa bikenewe mu guhangana n’ibyaha nyambukamupaka .
• Gufasha Guverinoma z’ibihugu by’ibinyamuryango kumenya ibibazo bifitanye isano n’ibyibasiriye akarere ka Afurika y’Amajyepfo.
• Gushyiraho gahunda zihamye zihuriweho mu karere n’ingamba ziganisha ku mikorere myiza ya Polisi.
• Ibi byose bigamije kongera umubano wa Polisi y’Akarere n’imikoranire y’uburyo bwose bushoboka.

Ibyaha by’ibanze EAPCCO ihangana na byo

• Iterabwoba
• Ubujura bw’amatungo
• Ibyaha bishingiye ku bidukikije
• Ibyaha bikorerwa mu mazi magari
• Ubucuruzi bw’abantu n’abimukira batemewe
• Gucuruza ibiyobyabwenge
• Ubujura bw’umutungo n’ibyifashisha ikoranabuhanga ryo hejuru
• Ubucuruzi bw’intwaro
• Gukurikirana abahunze igihugu
• N’ubujura bwa moto ndetse n’imodoka



Uruhare rwa Polisi y’u Rwa mu bufatanye mpuzamahanga

Imikorere ya polisi ikomeje gutera imbere mu buryo bugoye irasaba guhuza imbaraga. Bityo, ubufatanye mpuzamahanga ni bimwe mu by’ibanze Polisi y’u Rwanda iha agaciro mu kubaka urwego rushoboye kandi rwiteguye guhangana n’ibyaha bihungabanya umutekano mu gihugu n’ibyambuka imipaka.

Inama rusange ya 18 ya EAPCCO n’imyitozo yo kurwanya ibyaha bikorerwa ku ikoranabuhanga, byateguwe mu rwego rwo gukomeza kugira uruhare mu guharanira kurema isi itekanye.



Kuva Polisi y’u Rwanda yashingwa mu mwaka wa 2000, yiyunze ku zindi nzego za polisi mu karere ndetse no ku isi yose harimo Iterpol, EAPCCO, Ishyirahamwe mpuzamahanga ry’abayobozi ba Polisi (IACP), Umutwe wa Polisi ushinzwe gutabara aho rukomeye muri EAC (EASF), Ikigo gishinzwe intwaro nto (RECSA), Polisi Nyafurika (AfriPol), Umuryango wa Afurika y’Iburasirazuba-Umushinga wo guteza imbere Umuhora wa Ruguru (EAC-NCIP), kwitabira ubutumwa bw’amahoro mu bihugu bitandukanye n’ibindi.

Polisi y’u Rwanda kandi yasinye amasezerano y’ubufatanye 30 n’ibihugu ukwabyo n’andi 10 ahuriweho n’ibihugu byinshi. Bimwe mu bihugu Polisi y’u Rwanda yafatanyije na byo mu kwakira imyitozo ‘Command Post Exercise/CPX’ na ‘Field Training Exercises/FTX’ ni Uganda, Kenya, u Burundi, Namibia, Tanzania, Turikiya, Sudan, Sudani y’Epfo, Somalia, Ethiopia, Zambia na Qatar.

Ubufatanye ntamakemwa nk’ubu bwafashije cyane mu guhanahana amakuru, gukurikirana no gufata abahunze cyane cyane abakurikiranyweho ibyaha bya Jenoside, nka kimwe mu byashyizwemo imbaraga nyinshi; gusa na none hari abandi bafashwe banoherezwa na polisi z’ibindi bihugu.

Imikoranire nk’iyi yazamuwe cyane n’ubufatanye hagati ya Polisi y’u Rwanda n’izindi nzego za Polisi mu bihugu bitandukanye.



 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Gasabo: Yapfuye agwiriwe n’ikirombe yibagamo gasegereti
Gasabo: Yapfuye agwiriwe n’ikirombe yibagamo gasegereti

Minani Selvirien yapfuye ubwo yacukuraga gasegereti mu buryo butemewe n’amategeko mu murenge wa Nduba, mu karere ka Gasabo. Uyu mugabo yagwiriwe n’ikirombe ubwo yibaga ariya mabuye ahasanzwe (...)

Minisitiri Murekezi yakiriye indahiro z’abashinjacyaha bane
Minisitiri Murekezi yakiriye indahiro z’abashinjacyaha bane

Minisitiri w’Intebe Anastase Murekezi yakiriye indahiro z’Abashinjacyaha bane, ku wa Kabiri ku ya 7 Ukuboza 2016. Batatu barahiriye gukora mu bushinjacyaha ku rwego rwisumbuye ni Murigirwa (...)

Kigali: Abana batatu bamaze gupfa barohamye mu minsi 10 gusa
Kigali: Abana batatu bamaze gupfa barohamye mu minsi 10 gusa

Abana batatu barohamye mu bidendezi by’amazi n’imigezi aho baba bidumbaguza mu Mujyi wa Kigali honyine mu minsi icumi ishize. Umuvugizi wa polisi mu mujyi wa Kigali, SP Emmanuel Hitayezu, (...)

Kigali: Polisi yafashe ibyuma by’imodoka bya miliyoni  24
Kigali: Polisi yafashe ibyuma by’imodoka bya miliyoni 24

Polisi y’u Rwanda mu karere ka Nyarugenge yafashe ibyuma by’imodoka bifite agaciro ka Miliyoni 24 z’amafaranga y’u Rwanda byibwe Kompanyi ikora imirimo y’Ubwubatsi yitwa NPD- COTRACO. Umuvugizi wa (...)

Jeannette Kagame arishimana n’abana mu birori bisoza umwaka
Jeannette Kagame arishimana n’abana mu birori bisoza umwaka

Kuri iki cyumweru tariki 4 Ukuboza 2016, Madamu Jeannette Kagame arakira abana baturutse muturere 30 tw’igihugu mu birori byo gusoza umwaka wa 2016 anabifuriza Umwaka Mushya Muhire wa 2017. (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.