2017-07-23 11:30:24 clouds 27o High | Kigali Rwanda

Dukurikire:
 
 

Perezida Kagame yakiriye abashoramari baguze impapuro mpeshamwenda z’u Rwanda

Yanditswe na IMVAHO NSHYA

Kuya 2017-07-18 05:29:33

 
Share on:
 
Yasuwe:92
 
Yavuzweho:200
 
10
 
10

Perezida Kagame ku wa 17 Nyakanga yakiriye abashoramari babarirwa muri 60 b’ikigo Pharo Management Company, bamwizeza ko bagiye kurushaho gushora imari mu Rwanda, bakagira uruhare mu iterambere ryarwo.

Abo bashoramari baturutse mu mijyi ya New York muri Leta Zunze Ubumwe za Amerika, i London mu Bwongereza na Hong Kong. Nyuma y’ibiganiro na Perezida Kagame, umuyobozi wa Pharo Management Company, Guillaume Fonkenell yavuze ko bagiye kongera ibikorwa bashoramo imari mu Rwanda.

Yagize ati “ Tumaze gushora imari mu bintu bitandukanye mu Rwanda, twaguze impapuro mpeshamwenda zashyizwe ku isoko mu 2013 za miliyoni 400. Dushora imari no mu rwego orw’abikorera, natanga urugero ku nyubako ya Kigali Heights, turi bamwe mu bayishoyemo amafaranga. Dushaka kugira uruhare rugaragara mu gushora imari mu Rwanda nk’uko twabiganiriye na Perezida Kagame.”

Minisitiri w’Imari n’Igenamigambi, Amb. Claver Gatete, yavuze ko kugira na umubano n’abo bashoramari bizihutisha iterambere ry’igihugu.

Ati “Icyo tubona cyiza cyane ni uko bashaka umubano natwe. Ni ikigo cyatangiye mu 2000 ariko ubu kigeze ku mutungo wa miliyari icyenda z’amadorali kandi ziracyazamuka. Turabona ko ari bantu twagirana umubano mwiza nabo bagashyira amafaranga menshi hano mu bikorwa bigiye bitandukanye.”

Abo bashoramari bari baje mu Rwanda mu mwiherero wabereye mu karere ka Rubavu. Pharo Management Company ikunze gushora imari mu nyandiko mpeshwamwenda no ku isoko mpuzamahanga ry’imigabane.

Ifite imigabane ingana na 10 % mu nyubako y’ubucuruzi ya Kigali Heights iherereye ku Kimuhurura mu mujyi wa Kigali.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE