Advertisement
 
 
 
 
 
 
 
 

Amakuru | Mu Rwanda

Nyarugenge: Yafatiwe mu cyuho atanga impushya zo kubaka z’inyiganano   

  Yanditswe na RNP
 5 months ago

 
 

Polisi y’u Rwanda mu karere ka Nyarugenge yafashe Eric Peterson Mugwaneza uri mu kigero cy’imyaka 32 ushinjwa gutanga impushya zo kubaka z’inyiganano yiyita Umuyobizi w’Urwego rw’ibanze, kuri ubu afungiye kuri Sitasiyo ya Polisi ya Kigali mu gihe iperereza rikomeje kugira ngo harebwe niba hari abandi yibye kuri ubwo buryo.

Umuvugizi wa Polisi y’u Rwanda mu Mujyi wa Kgali, Superintendent of Police (SP) Emmanuel Hitayezu yavuze ko ukekwaho Mugwaneza yafatiwe mu cyuho ku wa 28 Nzeri afite uruhushya rwo kubaka rw’urwiganano yendaga kugurisha amafaranga y’u Rwanda ibihumbi 30.

Yagize ati "Mugwaneza yamenye ko uwitwa Ndacyayisenga yaguze ubutaka mu murenge wa Kanyinya, kandi ko afite gahunda yo kubwubakamo inzu. Yamuhamagaye kuri telefoni igendanwa yiyita Umunyamabanga Nshingwabikorwa w’uwo murenge, amubwira ko ashaka kumuha icyangombwa cyo kubaka ariko ko agomba kumuha ibihumbi 30 by’amafaranga y’u Rwanda byo gukoresha muri gahunda zo kwihutisha iyo serivisi."

SP Hitayezu yongeyeho ko Ndacyayisenga yagize amakenga ubwo Mugwaneza yakomezaga kumutitiriza amusaba ayo mafaranga, maze abitekerereza umwe mu bayobozi b’inzego z’ibanze wamugiriye inama yo guhita abimenyesha Polisi.

Umuvugizi wa Polisi y’u Rwanda mu Mujyi wa Kigali yagize kandi ati "Bakigera aho bari bumvikanye guhurira kugira ngo bahererekanye amafaranga n’urwo ruhushya rw’urwiganano, Polisi yahise ibagwa gitumo maze isangana Mugwaneza uruhushya rwo kubaka rw’urwiganano ruteyeho Kashe y’Umurenge wa Kanyinya; ndetse ruriho na Sinyatire y’Umunyamabanga Nshingwabikorwa wawo."

Yibukije ko serivisi za Leta zitangwa mu buryo buzwi kandi busobanutse, bityo asaba buri wese kurangwa n’ubushishozi kugira ngo adacuzwa utwe na ba Rutemayeze, kandi bagatanga amakuru y’abo babikekaho.

Ingingo ya 318 yo mu gitabo cy’amategeko ahana ibyaha mu Rwanda ivuga ko umuntu wese, abigiriye kwambura ikintu icyo ari cyo cyose cy’undi, agatuma bakimuha ari uko akoresheje amayeri y’ubwambuzi, wiyitirira amazina atari ye cyangwa imirimo adafitiye ububasha cyangwa agira ngo yizeze icyiza cyangwa atinyishe ko hari ikizaba kibi maze akambura undi imari ye yose cyangwa igice cyayo, ahanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva kuri miliyoni eshatu (3.000.000) kugeza kuri miliyoni eshanu (5.000.000).

Iya 609 yacyo ivuga ko umuntu wese uhimba cyangwa uhindura mu buryo ubwo ari bwo bwose inyandiko, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, ahanishwa igifungo kirenze imyaka itanu (5) kugeza ku myaka irindwi (7) n’ihazabu y’amafaranga y’u Rwanda kuva ku bihumbi magana atatu (300.000) kugeza kuri miliyoni eshatu (3.000.000).

 

Comments

 
 
Minisitiri Busingye yasabye Polisi y’u Rwanda kugendana n’ibigezweho
Minisitiri Busingye yasabye Polisi y’u Rwanda kugendana n’ibigezweho

Minisitiri w’Ubutabera, akaba n’Intumwa Nkuru ya Leta, Johnston Busingye ku cyumweru tariki 26 z’uku Kwezi yabwiye abagize Inama Nkuru ya Polisi y’u Rwanda ko ibikorwa by’uru rwego rw’umutekano (...)

Abanyarwanda barasabwa guteza imbere ururimi kavukire
Abanyarwanda barasabwa guteza imbere ururimi kavukire

Abanyarwanda barasabwa kurebera hamwe uburyo hashyirwa ingufu mu guteza imbere Ikinyarwanda mu burezi, ni mu gihe hizihizwa umunsi mpuzamahanga w’ururimi kavukire tariki 24 Werurwe 2017. (...)

Antoine Hey yasabwe guhesha Amavubi itike ya CAN 2019
Antoine Hey yasabwe guhesha Amavubi itike ya CAN 2019

Umudage Antoine Hey yasinye amasezerano yo gutoza ikipe y’igihugu y’u Rwanda ejo hashize tariki 21 Werurwe 2017 ; yahawe amasezerano y’umwaka umwe ushobora kongerwa igihe yitwaye neza. Perezida (...)

Ingabo z’u Rwanda zirahugurwa ku kurinda ikoreshwa ry’abana mu gisirikare
Ingabo z’u Rwanda zirahugurwa ku kurinda ikoreshwa ry’abana mu gisirikare

Abasirikare 30 batangiye amahugurwa azamara ibyumweru bibiri, aho bazahabwa ubumenyi buzabafasha kugira uruhare mu gukumira iyinjizwa n’ikoreshwa ry’abana mu gisirikare. Ni amahugurwa (...)

 Arkiepiskopi wo muri Pologne yagizwe intumwa ya Papa mu Rwanda
Arkiepiskopi wo muri Pologne yagizwe intumwa ya Papa mu Rwanda

Arkiepiskopi wa diyosezi ya Lauriaco muri Pologne , Musenyeri Andrzej Jowzowicz, yagizwe intumwa y’umushumba wa Kiliziya Gatolika, Papa Francis mu Rwanda kuri uyu wa 18 Werurwe 2017. Jozwowicz (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.