2017-08-22 09:34:31 clouds 27o High | Kigali Rwanda

Dukurikire:
 
 

Muri 2018 ingo 500 000 zizahabwa amashanyarazi akomoka ku zuba

Yanditswe na IMVAHO NSHYA

Kuya 2017-05-25 05:17:33

 
Share on:
 
Yasuwe:367
 
Yavuzweho:200
 
10
 
10

Minisitiri w’Ibikorwaremezo, Musoni James, avuga ko mu rwego rwo kwihutisha gahunda yo kwegereza abaturage amashanyarazi, umwaka utaha wa 2018 uzarangira ingo ibihumbi 500 zo mu bice by’icyaro zihawe amashanyarazi akomoka ku mirasire y’izuba.

Ingo zizahabwa amashanyarazi akomoka ku mirasire y’izuba ni iziri mu bice by’icyaro, ahitaruye imiyoboro ijyana amashanyarazi asanzwe. Amashanyarazi akomoka ku mirasire y’izuba abaturage bazahabwa ngo azaba afite ingufu, ku buryo abaturage bayifashisha mu bikorwa bibafasha kwihutisha iterambere nk’inganda nto n’imirimo y’ubukorikori itandukanye yinjiza amafaranga.

Ubu butumwa Minisitiri Musoni yabugarutseho mu ijambo yagejeje ku baturage b’Umudugudu wa Gatare, Akagari ka Gatare mu Murenge wa Nyakariro mu karere ka Rwamagana, mu muhango yayoboye wo gutaha ku mugaragaro inzu 108 zahawe amashanyarazi akomoka ku mirasire y’izuba yatanzwe na Polisi y’u Rwanda mu rwego rw’ibikorwa by’icyumweru cyahariwe ibikorwa bya Polisi, “Police week”.

Minisitiri Musoni yagize ati “Hateguwe uburyo bubiri kugira ngo tugeze amashanyarazi ku baturage kandi ahagije. Icya mbere ni ugukoresha iriya miyoboro isanzwe y’insinga z’amashanyarazi, turateganya ko umwaka utaha warangira nibura dukoresheje insinga z’amashanyarazi bigeze hafi kuri 45%.

JPEG - 248.4 kb
Minisitiri w’Ibikorwaremezo Musoni James, aganira n’abaturage

Ahasigaye tugakoresha amashanyarazi akomoka ku mirasire y’izuba, aya mashanyarazi ashobora gukora nk’uko aya yandi asanzwe akora, biterwa n’ingufu mwashyizemo. Ubu rero umwaka utaha uzarangira tumaze guha ingo ibihumbi 500 ziri mu cyaro zitegeranye n’ahari insinga z’amashanyarazi.”

Yakomeje agira ati “Kandi tunafitanye gahunda n’abarimo kubikora ngo banashyiremo amashanyarazi afite imbaraga, ku buryo ashobora gutuma za nganda ziciriritse, zoroheje, zishobora kuvuka mu cyaro nk’uko bisanzwe.”

Mu kagari ka Gatare mu murenge wa Nyakariro ni hamwe mu hantu imiyoboro y’amashanyarazi ica kure y’abaturage, ndetse bakaba bakoresha amashanyarazi akomoka ku mirasire y’izuba.

Ntibimana Evariste, umwe mu bahatuye, amaze kumva ko bazafashwa kubona amashanyarazi afite imbaraga, yagaragaje ko byabafasha kurushaho kwihutisha iterambere ryabo.

Yagize ati “Aya mashanyarazi nibayatugezaho bizaba ari ibintu byiza cyane kuko twahoraga twifuza uko tuzabona amashanyarazi amaso yaraheze mu kirere, ubu icyo tugiye gukora ni ukwikusanya tukishyira hamwe nk’uko tubigenza kuri mituweli, kuko ni byo bizatworohereza kwishyura aya mashanyarazi akomoka ku zuba. Twishimiye kandi kumva ko ayo tuzahabwa azaba afite imbaraga nk’iz’amashanyarazi asanzwe.”

Mu karere ka Rwamagana mu murenge wa Rubona hari uruganda rutanga amashanyarazi akomoka ku mirasire y’izuba, yunganira amashanyarazi asanzwe, angana na Megawati 8,5.
HAKIZIMANA YUSSUF

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE