2017-08-20 07:43:19 clouds 27o High | Kigali Rwanda

Dukurikire:
 
 

Murekezi yasabye abikorera kongera ubwiza bw’ibikorerwa mu Rwanda

Yanditswe na IMVAHO NSHYA

Kuya 2017-05-01 15:26:29

 
Share on:
 
Yasuwe:1269
 
Yavuzweho:200
 
10
 
10

Minisitiri w’Intebe Murekezi Anastase yasabye abikorera kurushaho kongera ubwiza n’ubwinshi bw’ibyo bakora muri gahunda ya “Made in Rwanda”, ari yo gahunda y’ibikorerwa mu Rwanda, kuko asanga ari bwo bizabashobokera kugeza ku masoko umusaruro w’ibyo bakora.

Ibyo bikubiye mu butumwa Minisitiri w’Intebe Murekezi Anastase yagejeje ku bakozi n’abakoresha ubwo u Rwanda rwari rwifatanyije n’ibindi bihugu kwizihiza umunsi mpuzamahanga w’umurimo wizihirijwe ku rwego rw’igihugu mu gace kahariwe inganda i Kigali.

JPEG - 282.8 kb
Minisitiri w’Intebe, Anastase Murekezi mu gikorwa cyo kwizihiza umunsi mpuzamahanga w’umurimo

Yasabye abashoramari gukora ibintu byiza bishobora gupiganwa ku isoko mpuzamahanga.

Murekezi yagize ati “Abanyarwanda bafite ingufu zo gukora bakwiye guhaguruka bagakora kandi bishimiye ibyo bakora, umurimo wabo bakawunoza, kuko ari bimwe mu bizatuma biteza imbere hamwe n’igihugu.

Bizatworohereza muri gahunda yo kwesa imihigo twihaye yo guha agaciro no gukoresha iby’iwacu byo mu Rwanda tudategereje ibiva ahandi. Erega Abanyarwanda bafite ubushake bwo gukoresha no kwambara imyenda myiza, iramba kandi yakorewe hano.”

Minisitiri w’Intebe yagarutse kuri bimwe mu bibazo bikigaragara mu rwego rw’umurimo birimo umubare munini w’abatagira akazi, ari nayo mpamvu Leta yashyizeho politiki ishingiye ku kwigisha ubumenyingiro mu mashuri izafasha mu kuvanaho ikibazo cy’ubushomeri mu gihugu.

Yashimye abakozi ba Leta n’abikorera kubera akazi keza kajyanye no gukunda umurimo, abasaba kubahiriza amasaha y’akazi no gukorana n’amasendika y’abakozi mu Rwanda. Yibukije abakoresha n’abakozi kwitabira gutanga serivise nziza, kuko ari bimwe mu bizateza imbere umusaruro w’ikigo n’uw’igihugu.

Yakomoje ku nsanganyamatsiko igira ati “Duteze imbere umurimo dusigasira ibyagezweho dukesha imiyoborere myiza, yo soko y’iterambere rya buri wese.” Asanga hakiri icyuho muri gahunda ya Hanga Umurimo, aboneraho gusaba ko urwo rwego rwashyirwamo imbaraga.

Mu gace kahariwe inganda i Kigali (Special Economic Zone) hamaze kugera inganda zigera kuri 32 zatangiye gukora mu gihe hari izindi zatangiye kubakwa zizatanga umusaruro mubikorwa bitandukanye nk’imyambaro n’ibikoresho byo mu rugo.

Perezida w’Urugaga rw’amasendika y’abakozi mu Rwanda (CESTRAR), Mubera Martin, asanga nubwo hari ibimaze gukorwa ku ruhande rwa Leta y’u Rwanda, ko hakiri tumwe mu tubazo nk’umushahara fatizo utarajyaho, amafaranga agenerwa abakozi bajya mu kiruhuko cy’izabukuru atajyanye n’ibiciro ku masoko, agasaba ko hagira igikorwa.

Minisitiri w’Intebe yahaye igihembo umunyamakuru Pascal Nyandwi amushimira ikiganiro cye gitambuka kuri Radio Rwanda cyitwa “Kazi ni kazi”, kigamije gushishikariza urubyiruko kwitabira no gukunda umurimo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE