2017-07-23 11:30:24 clouds 27o High | Kigali Rwanda

Dukurikire:
 
 

Mu myaka 7 twakoze ibirenze ibyo twateganyaga-Kagame

Yanditswe na IMVAHO NSHYA

Kuya 2017-06-22 17:38:49

 
Share on:
 
Yasuwe:233
 
Yavuzweho:200
 
10
 
10

Perezida Paul Kagame atangaza ko mu myaka irindwi ishize ya manda ye hagezweho byinshi, mu bushobozi buke bwari buhari ndetse binarenga ibipimo byari byagenwe.

Ibi Umukuru w’Igihugu yabitangaje ejo hashize ku wa 22 Kamena 2017 mu kiganiro n’Abanyamakuru, nyuma yo gutanga kandidatire ku mwanya wa Perezida wa Repubulika, kandidatire yagejeje muri Komisiyo y’Igihugu y’Amatora, aho Abanyarwanda baturutse imihanda yose bari baje kumusanganira bamwereka ko bamushyigikiye.

Muri iki kiganiro, Perezida Paul Kagame yagarutse ku nshingano zo kuyobora zitoroshye, avuga no ku byagezweho mu myaka irindwi ishize, maze agira ati “Twageze kuri byinshi bitashobokaga mu bushobozi buke dufite. Twarenze byinshi mu bipimo twihaye.”

Nyamara ariko n’ubwo ibyagezweho ari byinshi ndetse birenze ibyari biteganyijwe, Umukuru w’Igihugu avuga ko kwikorera umugogoro w’inshingano bitoroha, ati “Kwikorera umugogoro w’inshingano nta bwo biba byoroshye, ariko impamvu yabyo, n’icyo abantu bashaka kugeraho, ni byo bifite uburemere. Wemera guhangana n’uwo mugogoro kubera ibyo abantu bifuza.”

Gusa ariko, akaba avuga ko ubufatanye n’icyizere abaturage baba bafitiye ubuyobozi bituma uwo mugogoro w’ubuyobozi yikoreye woroha. Ubu bufatanye kandi, ngo ni bwo butuma hagerwa kuri byinshi, aho yagize ati “Abayobozi n’abayoborwa bose barakenerana. Ubufatanye hagati yacu ni bwo butuma tugera ku ntego twiha […] Ugomba gukora kugira ngo ugere ku cyo wifuza. Nta wundi uzabigukorera, nta n’igitangaza kizabaho ngo byikore.”

Perezida Paul Kagame akaba avuga ko u Rwanda yifuza ari u Rwanda rutarangwamo ibyabaye mbere y’imyaka 23 ishize. Ati “Turashaka kubona u Rwanda aho Abanyarwanda bunze ubumwe, bigenga kandi bateye imbere uko babyifuza.”

Perezida Kagame atanze kandidatire ye nyuma yo kwemezwa na Kongere idasanzwe y’Umuryango FPR-Inkotanyi nk’umukandida uzawuhagararira mu matora y’Umukuru w’Igihugu azaba ku ya 3 Kanama ku Banyarwanda baba mu mahanga, no ku ya 4 Kanama 2017 ku baba mu gihugu.

Ni nyuma kandi yo gutangwa n’amashyaka yandi akorera mu Rwanda ageze kuri arindwi yavuze ko azamushyigikira akanamwamamaza, kubera ko ashyigikiye ibyo yagejeje ku Banyarwanda, kandi bikaba byaranifujwe n’abayoboke bayo. Ayo akaba ari PSD, PL, PDC, PDI, PSR, UDPR na PPC.

Ni nyuma na none y’uko Abanyarwanda 98.3% bagejeje igihe cyo gutora bemeje muri ‘referandumu’ ivugururwa ry’Itegeko Nshinga kugira ngo Perezida Paul Kagame yongere kwiyamamariza kuyobora u Rwanda, nyuma y’uko Abanyarwanda barenga miliyoni enye bari basabye Inteko Ishinga Amategeko ko havugururwa Itegeko nshinga, kugira ngo yongere kwiyamamariza kuyobora u Rwanda kubera ibyo yabagejejeho.

Abandi bakandida ku mwanya wa Perezida wa Repubulika bamaze kugeza kandidatire zabo kuri Komisiyo y’Amatora, ni Mpayimana Philippe wayitanze na we ejo hashize, hakaza Diane Rwigara, Mwenedata Gilbert, na Dr. Frank Habineza wo mu ishyaka rya “Green Party”.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE