2017-06-24 12:54:56 clouds 27o High | Kigali Rwanda

Dukurikire:
 
 

Minisitiri w’Intebe yahaye umukoro inzego z’ubuhinzi mu Rwanda

Yanditswe na IMVAHO NSHYA

Kuya 2016-07-05 10:46:22

 
Share on:
 
Yasuwe:6
 
Yavuzweho:200
 
10
 
10

Kuri uyu wa 05 Nyakanga 2016, Minisitiri w’Intebe Anastase Murekezi,yahaye umukoro inzego zitandukanye ziyoboye ubuhinzi mu Rwanda RAB gushyira imbaraga nyinshi mu bushakashatsi bushingiye ku bibazo by’Abahinzi n’Aborozi ndetse no guharanira kongera ibyoherezwa hanze.

Ibi Minisitiri w’Intebe, Anastase Murekezi, yabivugiye mu karere ka Huye ubwo yasozaga itorero mu rwego rw’ubuhinzi n’ubworozi, itorero ryitabiriwe n’abagera kuri 1001 bakora mu buhinzi n’ubworozi mu gihugu hose.

Muri iri jambo Minisitiri Murekezi yasabye inzego zirebwa n’ubuhinzi mu Rwanda zirimo Minisiteri y’Ubuhinzi n’Ubworozi n’ikigo cy’Igihugu cy’Ubuhinzi ( RAB) gushyira imbaraga nyinshi mu bushakashatsi bushingiye ku bibazo by’abahinzi n’aborozi ndetse no kohereza hanze ibikomoka ku buhinzi n’ubworozi.

Yagize ati “Nsabye nkomeje Minisiteri y’Ubuhinzi n’Ubworozi n’Ikigo RAB gushyira imbaraga nyinshi mu bushakashatsi bushingiye ku bibazo by’Abahinzi n’Aborozi.”

Yakomeje asaba abari mu itorero gukora batiganda baharanira kuba ku isonga ry’impinduramatwara y’ubuhinzi n’ubworozi ndetse no kurangwa n’ubunyangamugayo mu kazi ka buri munsi.

Yagize ati “Ndabasaba kurangwa n’ Umuco w’ubupfura ujye ubaranga muri gahunda zigenewe abatishoboye nka Girinka mwirinda kurangwa n’umuco w’ubusambo.”

Umunyamabanga wa Leta muri Minisiteri y’Ubuhinzi n’Ubworozi, Tony Nsanganira,yavuze ko iri torero ryateguwe rigamije kunoza imikorere muri uru rwego hagamije kongera umusaruro.

Ubusanzwe urwego rw’ubuhinzi rwitabirwa n’Abanyarwanda basaga 72% rutanga kimwe cya gatatu cy’umusaruro mbumbe w’Igihugu (GDP).

Urwego rw’Ubuhinzi n’ubworozi kandi rutanga 90% rw’ibiribwa mu Rwanda , rukagira n’uruhare mu kurwanya ubukene.

Mu ishusho y’umusaruro mbumbe w’igihugu yasohowe n’ikigo cy’igihugu cy’ibarurishamibare muri Werurwe 2016 yerekana ko urwego rw’ubuhinzi rwinjije 33% by’umusaruro wose u Rwanda rwabonye mu mwaka wa 2015.

Mu ingengo y’imari yo muri 2016/2017 ubuhinzi buziharira amafaranga y’u Rwanda asaga miliyari 61, angana na 8% by’ingengo y’imari yose.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE